៧០ប្រទេសសន្យាគិតគូរឡើងវិញ ធ្វើឲ្យវិស័យសំណង់គោរពនិងទ្រទ្រង់ភពផែនដី
នៅទីក្រុងប៉ារីស កាលពីថ្ងៃទី៨មីនា គេបានរៀបចំ “វេទិកាពិភពលោកស្តីពីសំណង់និងបរិស្ថាន” ដោយមានការចូលរួម ពីតំណាងក្រុមហ៊ុនផលិតគ្រឿងសំណង់ ក្រុមហ៊ុនអចលនទ្រព្យ សហព័ន្ធស្ថាបត្យករ-វិស្វករ ព្រមទាំងតំណាងរដ្ឋាភិបាលប្រទេសជាច្រើន។ នៅក្នុងកិច្ចប្រជុំជាលើកទី១នេះ មានប្រទេស៧០ប្រទេស បានចុះហត្ថលេខាសន្យា ថានឹងគិតគូរឡើងវិញ ដើម្បីធ្វើយ៉ាងណាឲ្យវិស័យសំណង់អគារ ក្លាយជាវិស័យដែលមិនបំពុលបរិស្ថាន មិនបញ្ចេញឧស្ម័នកាបូនិក និងដែលទ្រទ្រង់ដល់តុល្យភាពអាកាសធាតុនៃភពដែនដីយើង។
ចុះផ្សាយនៅថ្ងៃ៖
ស្តាប់ - ០៣:៥៩
ជាលើកទី១ដែល ទីភ្នាក់ងារអង្គការសហប្រជាជាតិទទួលបន្ទុកបរិស្ថាន រួមសហការជាមួយរដ្ឋាភិបាលបារាំង បានរៀបចំ «វេទិកាពិភពលោកស្តីសំណង់និងបរិស្ថាន » ដើម្បីកំណត់ទិសដៅរួមគ្នា ឈានទៅធ្វើឲ្យវិស័យសំណង់ ក្លាយជាវិស័យដ៏ស្អាតស្អំ មិនបំពុលបរិស្ថានធម្មជាតិ។
សេចក្តីថ្លែងការណ៍រួមមួយ ត្រូវបានអនុម័តនៅចុងបញ្ចប់នៃកិច្ចប្រជុំនេះ ដោយមានរដ្ឋមន្ត្រីបរិស្ថាននៃប្រទេសចំនួន៧០ បានចុះហត្ថលេខា ក្នុងនោះមានទាំងបារាំង សហរដ្ឋអាមេរិក អារ៉ាប៊ីសាអូឌីត និងចិនជាដើម។ ក្រសួងបរិស្ថាននិងអន្តរកម្មថាមពលបារាំង បានលើកឡើងថា សេចក្តីថ្លែងការណ៍រួមនេះ នឹងបើកចំហររងចាំស្វាគមន៍ប្រទេសផ្សេងទៀត ដែលមិនទាន់សម្រេចចិត្តចុះហត្ថលេខា។
សេចក្តីថ្លែងការណ៍ ដែលគេដាក់ឈ្មោះថា « Déclaration de Chaillot » មានខ្លឹមសារថា នៅក្នុងវិស័យសំណង់ ប្រទេសហត្ថលេខីសន្យាថានឹង ផ្តល់អាទិភាពដល់ការជួសជុលកែលំអសំណង់ចាស់ ជាជាងការសាងសង់ថ្មីបន្ថែម និងផ្តល់អាទិភាពដល់ការយកមកប្រើប្រាស់ឡើងវិញ នូវសម្ភារៈសំណង់ចាស់ៗជាជាងការផលិតថ្មី។ ប្រទេសទាំងអស់ នឹងត្រូវគិតគូរ ហើយសម្របរបៀបនៃការសាងសង់សំណង់ ដើម្បីធ្វើយ៉ាងណា ចូលរួមឲ្យបានច្រើនបំផុតដល់ការទប់ស្កាត់ការឡើងកំដៅផែនដី និងដោយធ្វើយ៉ាងណា ឲ្យសំណងរឹងមាំធន់ អាចទប់ជាមួយលក្ខខណ្ឌធម្មជាតិដែលមិនទៀតទាត់។
គួររំលឹកដែរថា លោកស្រី Regina Gonthier ប្រធានសហភាពស្ថាបត្យករអន្តរជាតិ ធ្លាប់បានប្រកាសថា វិស័យស្ថាបត្យកម្មសំណង់សូមសន្យា ថានឹងផ្តល់អាទិភាព ដល់ការជួសជុលកែលំអដើម្បីប្រើប្រាស់ឡើងវិញ ជាជាងការសាងសង់សំណង់ថ្មី។ តែយ៉ាងណាលោកស្រីទទួលស្គាល់ថា ការងារនេះជាការងារលំបាកព្រោះត្រូវដើរបញ្ច្រាស នឹងគំនិតមោទនភាពរបស់ម្ចាស់គម្រោងសំណង់នីមួយៗ ដែលចង់តែសាងសង់ថ្មី។
លោកស្រី Ligia Noronha អគ្គលេខារងនៃអង្គការសហប្រជាជាតិ បានអំពាវនាវឲ្យវិស័យឯកជន ចូលរួមឲ្យបានច្រើន នៅក្នុងលំហូរហិរញ្ញវត្ថុ ព្រមទាំងការកំណត់បទដ្ឋានរួម។ យ៉ាងហោចណាស់ គេត្រូវការប្រាក់ ចំនួន២៤ពាន់លានអឺរ៉ូ នៅរវាងឆ្នាំ២០៣០ ដើម្បីឲ្យវិស័យសំណង់ឈានទៅមានអព្យាក្រិត្យភាពកាបូន។ ដោយឡែក លោក Fatih Birol នាយកប្រតិបត្តិទីភ្នាក់ងារថាមពលអន្តរជាតិ បានត្អូញត្អែរថា គិតត្រឹមពេលនេះ មានប្រទេស១១០ប្រទេស ដែលនៅតែមិនទាន់មាន “ក្រិត្យក្រមជាកាតព្វកិច្ច ស្តីពីប្រសិទ្ធិថាមពល”។
គួរបញ្ជាក់ថា វិស័យសំណង់ត្រូវគេដឹងថាជាវិស័យ ដែលបញ្ចេញនូវឧស្ម័នផ្ទះកញ្ចក់ច្រើនបំផុត។ យោងតាមសេចក្តីថ្លែងការណ៍រួមChaillot ២១%នៃឧស្ម័នផ្ទះកញ្ចក់ទូទាំងពិភពលោក គឺកើតចេញពីវិស័យសំណង់ ហើយមានចំណែក៣៧%នៃឧស្ម័នកាបូនិក ដែលបញ្ចេញចោលដោយថាមពលអគ្គិសនី។ ការប្រើប្រាស់ចរន្តអគ្គិសនី ដើម្បីបើកម៉ាស៊ីនកំដៅ ឬម៉ាស៊ីនត្រជាក់ គឺមានទំហំដល់ទៅ៣៤%នៃទំហំប្រើប្រាស់ចរន្តអគ្គីសនីពិភពលោក។ បន្ថែមពីនេះ ជារៀងរាល់ឆ្នាំ ការវាយរំលំសំណង់ចាស់ៗ ឬការជួសជុលសំណង់ បានបង្កើតឲ្យមានកាកសំណល់ ចំនួន១០០ពាន់លានតោន ដោយភាគច្រើនលើសលុប មិនត្រូវគេយកទៅកែច្នៃប្រើឡើងវិញទេ ហើយមាន៣៥%ត្រូវគេយកទៅកប់ដីចោលទៀត។
យោងតាមអ្នកជំនាញនៃវិស័យនេះ កម្មវត្ថុកាត់បន្ថយការបញ្ចេញឧស្ម័នផ្ទះកញ្ចក់នៃវិស័យសំណង់ គឺត្រូវធ្វើគ្រប់ដំណាក់កាលទាំងអស់ ដោយរាប់ចាប់តាំងពី ការផលិតសម្ភារៈគ្រឿងបរិក្ខាសំណង់ ក្រិត្យក្រមស្តង់ដារនៃការសាងសង់ ព្រមទាំងការប្រើប្រាស់ថាមពលចរន្តអគ្គិសនី នៅក្នុងសំណង់នីមួយៗជាដើម។ ទន្ទឹមគ្នានឹងការរិះរកមធ្យោបាយ បច្ចេកទេសថ្មីទាំងនេះ អ្នកជំនាញត្រូវគិតគូរផងដែរ ធ្វើឲ្យសំណង់កាន់តែរឹងមាំ ធន់ ហើយឆ្លើយតបទៅនឹងកត្តាអាកាសធាតុ ដែលអាចជាគ្រោះធម្មជាតិទឹកជំនន់ ខ្យល់ព្យុះ សីតុណ្ហភាពត្រជាក់ខ្លាំង ឬក្តៅខ្លាំងជាដើម។ យ៉ាងណាមិញ ប្រទេសក្រីក្រ នៅតំបន់ខាងត្បូងភពផែនដី គឺជាប្រទេសងាយរងគ្រោះបំផុត ដោយសារកត្តាអាកាសធាតុប្រែប្រួលទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ