៣០ឆ្នាំក្រោយ ប្រធានាធិបតីម៉ាក្រុងថាបារាំងអាចរារាំងអំពើប្រល័យពូជសាសន៍នៅរវ៉ាន់ដា តែមិនធ្វើ
ថ្ងៃ៧មេសា២០២៤ ជាគម្រប់ខួប៣០ឆ្នាំគត់នៃការចាប់ផ្តើមអំពើប្រល័យពូជសាសន៍នៅរវ៉ាន់ដា នាឱកាសនេះប្រធានាធិបតីបារាំងលោកអេម៉ានុយអែល ម៉ាក្រុង បានថ្លែងសារវីដេអូ ចាក់ផ្សាយតាមបណ្តាញសង្គម ប្រកាសថា “បារាំងជាមួយសម្ព័ន្ធមិត្តលោកខាងលិច និងអាហ្វ្រិក អាចរារាំងអំពើប្រល័យពូជសាសន៍កុំឱ្យកើតមាននៅក្នុងប្រទេសរវ៉ាន់ដាបាន ប៉ុន្តែគ្មានឆន្ទៈនឹងធ្វើ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ក្នុងឱកាសដែលរវ៉ាន់ដាប្រារព្វខួប៣០ឆ្នាំនៃអំពើប្រល័យពូជសាសន៍ ដែលបានចាប់ផ្តើមនៅថ្ងៃទី៧មេសា១៩៩៤ និងបានផ្តាច់ជីវិតមនុស្ស ភាគច្រើនជាជាតិពិន្ធុទូតស៊ីប្រមាណពី៨សែនទៅ១លាននាក់ លោកប្រធានាធិបតីបារាំងអេម៉ានុយអែលម៉ាក្រុង បានប្រកាសថា “បារាំងនិងសម្ព័ន្ធមិត្តលោកខាងលិច ព្រមទាំងអាហ្វ្រិក អាចរារាំងអំពើប្រល័យពូជសាសន៍នៅរវ៉ាន់ដាបាន កាលពី៣០ឆ្នាំមុន ប៉ុន្តែមិនធ្វើ”។
នៅក្នុងសារវីដេអូថតទុកសម្រាប់ចាក់ផ្សាយតាមបណ្តាញសង្គម នៅថ្ងៃអាទិត្យទី៧មេសា២០២៤នេះ លោកម៉ាក្រុងបានរំលឹកជាពិសេសថា នៅពេលសកម្មភាពប្រល័យពូជសាសន៍ឈានដល់ដំណាក់ការសម្លាប់ផ្តាច់ពូជជាតិពន្ធុទូតស៊ី សហគមន៍អន្តរជាតិមានមធ្យោបាយដឹង និងមានបញ្ចេញប្រតិកម្ម ព្រោះធ្លាប់ឆ្លងកាត់បទពិសោធន៍ប្រល័យពូជសាសន៍លើជនជាតិអារមេនី និងពីសំណាក់ពួកហ្វាស៊ីសអ៊ីត្លែរ ហើយបារាំងដែលជាមួយបណ្តាសម្ព័ន្ធមិត្តបស្ចិមលោក និងអាហ្វ្រិក អាចបញ្ឈប់អំពើប្រល័យពូជសាសន៍នោះបាន បែរជាគ្មានឆន្ទៈ។ នៅ២សប្តាហ៍ ក្រោយការចាប់ផ្តើមសកម្មភាពប្រល័យពូជសាសន៍ កងកម្លាំងមួកខៀវរបស់អង្គការសហប្រជាជាតិប្រចាំរវ៉ាន់ដា ស្រាប់តែនាំគ្នាដកកងកម្លាំងអស់ប្រមាណ៩០%ពីប្រទេស។ នេះបើតាមប្រភពប្រធានាធិបតីបារាំងដដែល។
សម្រាប់លោកម៉ាក្រុង សេចក្តីប្រកាសនេះជាការទំនួលខុសត្រូវបន្តពីអ្វីដែលលោកធ្លាប់បានសន្យាជាមួយប្រធានាធិបតីរវ៉ាន់ដា លោក ម៉ាហ្កាលី កាលពីឆ្នាំ២០២១។ នៅថ្ងៃទី២៧ឧសភា ឆ្នាំ២០២១ នាឱកាសបំពេញទស្សនកិច្ចជាលើកទីមួយនៅរវ៉ាន់ដា ដើម្បីស្តារទំនាក់ទំនងរវាងប្រទេសទាំងពីរ ឱ្យបានធូរស្រាលឡើង លោកប្រធានាធិបតីបារាំង បានប្រកាសទទួលស្គាល់ទំនួលខុសត្រូវរបស់បារាំងចំពោះអំពើប្រល័យពូជសាសន៍ ដោយផ្អែកលើរបាយការណ៍របស់គណៈកម្មការអ្នកប្រវត្តិសាស្រ្ត។ របាយការណ៍ចេញផ្សាយនៅថ្ងៃទី៧មេសា២០២១ បានសន្និដ្នានថា បារាំងមានការទទួលខុសត្រូវលើសលុបណាស់លើអំពើប្រល័យពូជសាសន៍នៅរវ៉ាន់ដា។
ថ្ងៃនេះលោកម៉ាក្រុង បានបោះជំហានថ្មីដ៏សំខាន់មួយទៀត ដោយប្រើពាក្យ “បារាំងគ្មានឆន្ទៈ” ដឹងហើយមិនធ្វើ។ ប៉ុន្តែបារាំងគួរតែក្លាហាន ហ៊ានសុំទោស។ នេះបើតាមប្រតិកម្មរបស់ក្រុមសមាគមអ្នករួចពីស្លាប់ជាតិពិន្ធុទូតស៊ី ឬសង្គមស៊ីវិលរវ៉ាន់ដាដែលយល់ថាសេចក្តីប្រកាសរបស់លោកម៉ាក្រុងនេះ ល្អហើយតែ តិចតូចណាស់បើប្រៀបទៅនឹងការរង់ចាំរបស់អ្នករួចពីស្លាប់និងជនរងគ្រោះ។
រដ្ឋមន្ត្រីការបរទេស លោក ស្តេហ្វាន សេហ្សួរណេ ជាតំណាងប្រធានាធិបតីអញ្ជើញទៅចូលរួមខួប៣០ឆ្នាំ ជាកិច្ចឆ្លើយតបទៅនឹងការអញ្ជើញរបស់ប្រធានាធិបតីរវ៉ាន់ដាជាមិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ