ប៉ារីសបើកសន្និសីទមនុស្សធម៌កុំឱ្យភ្លេចស៊ូដង់ ដែលអាចធ្លាក់ក្នុងមហន្តរាយគ្មានប្រៀប
ស៊ូដង់អាចនឹងធ្លាក់ក្នុងវិបត្តិស្បៀងអាហារធំធេងបំផុតដែលពិភពលោកមិនធ្លាប់ជួបប្រទះពីមុនមកទេ។ នេះជាពាក្យព្រមានរបស់អគ្គនាយកអង្គការកម្មវិធីស្បៀងអាហារពិភពលោក ក្នុងពេលបើកសន្និសីទស្តីពីប្រទេសស៊ូដង់នៅទីក្រុងប៉ារីស ថ្ងៃទី ១៥មេសា២០២៤។ ផ្តួចផ្តើមឡើងដោយបារាំង ដើម្បីតើនរំឮកសហគមន៍អន្តរជាតិកុំឱ្យភ្លេចស៊ូដង់មួយនេះ សន្និសីទមានកម្មវត្ថុប្រមូលជំនួយនិងសម្របសម្រួលឱ្យមានការចរចាបិទបញ្ចប់ជម្លោះដែលអូសបន្លាយពេលមួយឆ្នាំគត់ហើយ។
ចុះផ្សាយនៅថ្ងៃ៖
ស្តាប់ - ០២:៤៧
ស្ថានភាពនៅស៊ូដង់អាក្រក់ខ្លាំងណាស់។ ស្ទើរជាក្លាយជាមហន្តរាយ។ នៅក្នុងផ្ទៃប្រទេសមានតែភាពអត់ឃ្លាន អត់ឃ្លានខ្លាំងហួសនិស្ស័យ ដែលបើប្រកាសដាក់ប្រទេសក្នុងភាពអាសន្នទុរ្ភិក្សក៏សឹងហួសពេលទៅហើយ។ នេះជាប្រសាសន៍របស់លោកស្រី ស៊ីនឌី ម៉ាក់កែន អគ្គនាយិកាអង្គការកម្មវិធីស្បៀងអាហារពិភពលោកនៃអង្គការសហប្រជាជាតិ នាឱកាសបើកសន្និសីទស្តីពីប្រទេសស៊ូដង់ នៅទីក្រុងប៉ារីស។
តំណាងអង្គការសហប្រជាជាតិរូបនេះបានអះអាងទៀតថា នៅប៉ុន្មានខែខាងមុខទៀតនេះ ប្រជាពលរដ្ឋស៊ូដង់ជិត៥លាននាក់នឹងធ្លាក់ក្នុងអន្លង់ អស្ថិរភាពស្បៀងអាហារដ៏មហាមហន្តរាយបំផុត ពោលគឺក្នុងកំរិតដ៏អាក្រក់បំផុតនៃមាត្រដ្ឋានសុវត្ថិភាពចំណីអាហារពិភពលោក។ ប៉ុន្តែអង្គការមិនអាចបញ្ជាក់បានថា មានគ្រោះទុរ្ភិក្សឬយ៉ាងណាទេ ព្រោះគ្មានមធ្យោបាយអាចចូលទៅដល់ផ្ទៃក្នុងប្រទេសស៊ូដង់។ បើតាមអង្គការសហប្រជាជាតិ នៅពេលសង្គ្រាមបានផ្ទុះឡើង ពលរដ្ឋជាង៨លាននាក់កន្លះបានបង្ខំចិត្តធ្វើបំលាស់ទី ហើយរចនាសម្ព័ន្ធដ៏ទន់ខ្សោយស្រាប់របស់ប្រទេសត្រូវបំផ្លាញស្ទើរអស់។ បច្ចុប្បន្ន ស៊ូដង់បានទទួលហិរញ្ញវត្ថុជាជំនួយមនុស្សធម៌ត្រឹមកំរិតប្រមាណ៥%ប៉ុណ្ណោះ។ ហេតុដូច្នេះហើយបានជាលោកស្រី ស៊ីនឌី ម៉ាក់កែន ស្រែកព្រមានថាស៊ូដង់អាចនឹងក្លាយជាប្រទេសមានវិបត្តិស្បៀងអាហារធំជាងគេនិងខ្លាំងជាងគេនៅពិភពលោក ដែលមិនធ្លាប់ជួបប្រទះពីមុនមកទេ។
ជាមួយនឹងសេចក្តីអំពាវនាវដាស់ពិភពលោកថាមិនគួរបំភ្លេចប្រទេសដូចយ៉ាងស៊ូដង់ឡើយទោះវក់វីនឹងសង្គ្រាមហ្កាហ្សាខ្លាំងយ៉ាងណាក៏ដោយនោះ លោកស្រីអគ្គនាយិកាអង្គការកម្មវិធីស្បៀងអាហារក៏បានទទូចឱ្យភាគីជម្លោះស៊ូដង់បើកច្រកមនុស្សធម៌នាំជំនួយទៅជួយពលរដ្ឋប្រមាណ៩០%ទៀត ដែលកំពុងត្រដររស់។
សង្គ្រាមនៅស៊ូដង់បានផ្ទុះឡើងនៅថ្ងៃទី ១៥មេសា២០២៣។ តាំងពីមួយឆ្នាំមកនេះ ពលរដ្ឋស៊ូដង់បានក្លាយជាជនរងគ្រោះនៃសង្គ្រាមក្នុងផ្ទៃប្រទេស ហើយគ្មាននរណាសូវនឹកចាប់អារម្មណ៍ជួយទៀត។ ទើបតែនៅថ្ងៃនេះ បារាំង សហការជាមួយអាល្លឺម៉ង់និងសហភាពអឺរ៉ុបបានរៀបចំសន្និសីទមនុស្សធម៌ឡើង ដើម្បីដាស់ស្មារតីពិភពលោកកុំឱ្យភ្លេចសង្គ្រាមនៅស៊ូដង់ ដែលញាំញីក្នុងប្រទេសអាហ្វ្រិកមួយនេះអស់ពេលមួយឆ្នាំគត់ហើយ។ មានតែសម្ពាធអន្តរជាតិប៉ុណ្ណោះ ដែលអាចរុញភាគីជម្លោះឱ្យចូលចរចាផ្អាកប្រយុទ្ធនិងបញ្ចប់សង្គ្រាម។ កម្មវត្ថុមួយទៀតនៃសន្និសីទ គឺប្រមូលជំនួយមនុស្សធម៌បន្ទាន់ឱ្យបានជាង១ពាន់លានអឺរ៉ូ ទៅជួយពលរដ្ឋជាង៣លានបួនសែននាក់ដែលត្រូវការស្បៀងអាហារជាបន្ទាន់។ សង្គ្រាមស៊ូដង់អាចជាហានិភ័យនាំឱ្យមានអស្ថិរភាពដល់តំបន់ស្នែងអាហ្វ្រិកទាំងមូលផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ