ជំនួបកំពូលអឺរ៉ុបរកឃើញកិច្ចព្រមព្រៀងតែមួយផ្នែក
ជំនួបកំពូលអឺរ៉ុប នៅទីក្រុងព្រុចសែល បានបិទបញ្ចប់ជាមួយនឹងការរកឃើញកិច្ចព្រមព្រៀងមួយភាគ លើសន្ធិសញ្ញាថ្មីស្តីពីការពង្រឹងវិន័យផ្នែកថវិកា។ សមាជិកអឺរ៉ុបចំនួន២៥ប្រទេសបានយល់ព្រម លើកលែងតែអង់គ្លេស និងសាធារណរដ្ឋឆែក។ ជំនួបលើកនេះក៏ជាឱកាសពិភាក្សាអំពីស្ថានភាពប្រទេសក្រិកដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ប្រមុខរដ្ឋ និងរដ្ឋាភិបាលប្រទេសជាសមាជិកអឺរ៉ុប ២៥ បានព្រមព្រៀងគ្នាអនុម័តលើសន្ធិសញ្ញាថ្មី ដែលគេចាត់ទុកជាជំហានដ៏សំខាន់មួយនាំអឺរ៉ុបចេញពីវិបត្តិប្រាក់បំណុល។ សន្ធិសញ្ញាថ្មី ដែលនឹងកំណត់ឱ្យប្រទេសពាក់ព័ន្ធគោរពវិធានមាស ពោលគឺត្រូវទទួលទណ្ឌកម្មដោយស្វ័យប្រវត្ត ឬសឹងជាស្វ័យប្រវត្ត ប្រសិនឩនភាពថវិកាលើសពី៣%នៃផលិតផលសរុបក្នុងស្រុក។
នាយករដ្ឋមន្ត្រីអង់គ្លេស ដែលបានអញ្ជើញមកចូលរួមក្នុងជំនួបនេះដែរ បានបង្ហាញជំហរដដែល ដូចកាលពីខែធ្នូ ២០១១ គឺមិនទទួលយកសន្ធិសញ្ញាថ្មី។ ចំណែកសាធារណរដ្ឋឆែក បានដកខ្លួនចេញ ដោយយកលេសគោរពរដ្ឋធម្មនុញ្ញ។ នេះបើតាមការពន្យល់បំភ្លឺរបស់ប្រធានាធិបតីបារាំង លោក នីកូឡា សាកូហ្ស៊ី ក្នុងសន្និសីទកាសែតក្រោយជំនួប។
សន្ធិសញ្ញាថ្មីនេះ នឹងត្រូវអនុម័តជាផ្លូវការ នៅខែមីនា នាឱកាសជំនួបអឺរ៉ុបលើកក្រោយ និងអាចចូលជាធរមាននៅថ្ងៃទី១មករា ២០១៣បាន លុះណាតែមានសមាជិក១២ប្រទេស ផ្តល់សច្ចាប័ន។
ជំនួបម្សិលមិញ ក៏ជាឱកាសមួយសំរាប់ប្រទេសក្រិកដែរ។ ប្រមុខរដ្ឋ និងរដ្ឋាភិបាលអឺរ៉ុបទាំងអស់ ទំនងជានឹងអាចសម្រេច ដាច់ស្រេច លើផែនការទីពីរជួយស្រោចស្រង់ប្រទេសក្រិក ក្នុងពេលឆាប់ៗខាងមុខនេះ។ លោកប្រធានគណៈកម្មការអឺរ៉ុប មានទំនុកចិត្តយ៉ាងពេញទំហឹង ថានឹងអាចរកឃើញកិច្ចព្រមព្រៀង ដើម្បីឱ្យក្រិកអាចកាត់បន្ថយប្រាក់បំណុលរបស់ខ្លួនបាន ពីពេលនេះដល់ឆ្នាំ២០២០។
ប៉ុន្តែមេដឹកនាំប្រទេសសំខាន់ៗរបស់សហភាព មានជាអាទិ៍បារាំង បានច្រានចោលគំនិតផ្តួចផ្តើមរបស់អាល្លឺម៉ង់ ដែលចង់ដាក់ប្រទេសក្រិកឱ្យស្ថិតក្រោមការត្រួតពិនិត្យរបស់អឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ