អូស្ត្រាលីតវ៉ាឥរិយាបថរបស់ឥណ្ឌូនេស៊ីចំពោះអ្នកទោសអូស្ត្រាលី
អូស្ត្រាលីទើបតែបានធ្វើការតវ៉ាទៅកាន់ស្ថានទូតឥណ្ឌូនេស៊ីប្រចាំទីក្រុងកង់បេរ៉ា ចំពោះឥរិយាបថរបស់ប៉ូលីសឥណ្ឌូនេស៊ី ដែលប្រព្រឹត្តទៅលើអ្នកទោសជាតិអូស្ត្រាលីពីរនាក់។ នេះបើតាមការឲ្យដឹងពីលោកនាយករដ្ឋមន្ដ្រីអូស្ត្រាលី ថូនី អាប៊ត នៅថ្ងៃសុក្រនេះ។ ការតវ៉ារបស់អូស្ត្រាលីនាពេលនេះ ធ្វើឡើងចំពេលដែលមានពាក្យចចាមអារ៉ាមថា ការកាត់ទោសប្រហារជីវិតអ្នកទោសជាតិអូស្ត្រាលីទាំងពីរនាក់នោះ អាចនឹងពន្យារពេលដល់ទៅ១០ថ្ងៃឯណោះ។
ចុះផ្សាយនៅថ្ងៃ៖
ស្តាប់ - ០១:៥៥
ប្រតិកម្មខ្លាំងៗពីអូស្ត្រាលីផ្ទុះឡើងភ្លាម ក្រោយពីមានការបែកធ្លាយរូបថតពីរសន្លឹក របស់អ្នកទោសជនជាតិអូស្ត្រាលី២នាក់ ដែលត្រូវបញ្ជូនតាមយន្តហោះទៅកាន់កោះហ្សាវ៉ា កាលពីថ្ងៃពុធ ដើម្បីរង់ចាំការប្រហារជីវិត។ រូបថតមួយសន្លឹក បង្ហាញឲ្យឃើញពីស្នងការប៉ូលីសរបស់ឥណ្ឌូនេស៊ី លោក Djoko Hari Utomo ដែលកំពុងដាក់ដៃលើខ្នងអ្នកទោសម្នាក់ ព្រមទាំងញញឹមយ៉ាងស្រស់មកកាន់កាម៉េរ៉ា។ រូបថតមួយសន្លឹកទៀត បង្ហាញពីលោកស្នងការប៉ូលីសដដែល យកដៃដាក់លើស្មាអ្នកទោសអូស្ត្រាលីម្នាក់ទៀត ដែលកំពុងតែងើយមុខសម្លឹងមកកាន់លោកស្នងការ។
នៅក្នុងរូបថតទាំងពីរសន្លឹកនោះ គេក៏បានឃើញផងដែរ ក្រុមប៉ូលីសឥណ្ឌូនេស៊ីដែលស្ថិតក្នុងឯកសណ្ឋានខ្មៅ ពាក់មួកការពារ ព្រមទាំងប្រដាប់ដោយអាវុធគ្រប់ដៃផង អង្គុយពេញត្រៀបត្រាពេញយន្តហោះ។ ការបែកធ្លាយរូបថតពីក្នុងយន្តហោះយ៉ាងដូច្នេះ ត្រូវបានអូស្ត្រាលីហៅថា ជាការប្រមាថ។
នៅថ្ងៃសុក្រ ទី០៦ខែមីនានេះ នាយករដ្ឋមន្ដ្រីអូស្ត្រាលី លោកថូនី អាប៊ត មានប្រសាសន៍ប្រាប់អ្នកកាសែតអំពីរូបថតដែលបែកធ្លាយថា វាជារឿងមិនសមរម្យ និងបានបង្ហាញពីការខ្វះការគោរព និងសេចក្ដីថ្លៃថ្នូរ។ លោកបន្តថា អូស្ត្រាលីបានធ្វើការតវ៉ាទៅកាន់ឯកអគ្គរដ្ឋទូតអូស្ត្រាលីប្រចាំទីក្រុងកង់បេរ៉ារួចហើយ អំពីរឿងនេះ។
គួររំលឹកថា អ្នកទោសជនជាតិអូស្ត្រាលីចំនួន២នាក់ ត្រូវបានតុលាការចេញសាលក្រមកាត់ទោសប្រហារជីវិតកាលពីឆ្នាំ២០០៦ ពីបទដឹកនាំបណ្ដាញជួញដូរគ្រឿងញៀនពីឥណ្ឌូនេស៊ីទៅអូស្ត្រាលី។ ទីក្រុងកង់បេរ៉ា បានស្នើដោះដូរអ្នកទោសជាមួយទីក្រុងចាកាតា នៅថ្ងៃព្រហស្បតិ៍ទី៥មីនា ប៉ុន្តែត្រូវសំណើរនេះ ត្រូវបានទីក្រុងចាកាតាបដិសេធមិនទទួលយកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ