សញ្ញាបីបញ្ជាក់ពីការធ្លាក់ស្រុតចុះនៃកំណើនសេដ្ឋកិច្ចចិន
ទីក្រុងប៉េកាំងបានផ្សាយនៅថ្ងៃសៅរ៍ទី៩មិថុនាឆ្នាំ២០១២នេះឲ្យដឹងពីសញ្ញាបីដែលបញ្ជាក់បង្ហាញឲ្យឃើញពីដំណើរធ្លាក់ស្រុតចុះនៃកំណើនសេដ្ឋកិច្ចចិននៅខែឧសភាកន្លងទៅ។ សញ្ញាទាំងបីនោះមាន៖ ការកើនឡើងនៃផលិតផលឧស្សហកម្មចិនដែលមានអត្រាតិចជាង១០%សម្រាប់រយៈពេលពីរខែចុងក្រោយនេះបន្តបន្ទាប់គ្នា។ ការធ្លាក់ចុះនៃពាណិជ្ជកម្មលក់រាយ ហើយនិងការថយស្រុតចុះនៃការបោះទុនធ្វើវិនិយោគ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ផលិតផលឧស្សាហកម្មចិនបានកើនឡើងទាបជាង១០%ក្នុង១ឆ្នាំសម្រាប់ខែឧសភាឆ្នាំ២០១២ពោលគឺមាន៩,៦%ទល់នឹង៩,៣%សម្រាប់ខែមេសាឆ្នាំ២០១២។ ដូច្នេះឃើញថា ពីរខែបន្តបន្ទាប់គ្នាដែលផលិតផលឧស្សាហកម្មចិនមានកំណើនតិចជាង១០%ក្នុង១ឆ្នាំ។ នេះបើយោងតាមតួលេខរបស់ការិយាល័យជាតិខាងស្ថិតិដែលបានផ្សាយឲ្យដឹងនៅថ្ងៃសៅរ៍នេះ។
នៅខែមេសាកន្លងទៅ សភាពទន់ខ្សោយនៃផលិតផលឧស្សាហកម្មចិនបានធ្វើឲ្យអ្នកវិភាគជាច្រើនកើតមានក្តីបារម្ភម្តងរួចទៅហើយ។ អត្រានៃកំណើនផលិតផលឧស្សាហកម្មចិនបានធ្លាក់មកនៅកម្រិតមួយដ៏ទាបពុំដែលកើតមាន ចាប់តាំងពីខែឧសភាឆ្នាំ២០០៩មក។ ជាពិសេសក្នុងខណៈដែល អត្រានៃកំណើនផលិតផលឧស្សាហកម្មចិនបានកើនឡើងដល់១១,៦%ក្នុង១ឆ្នាំនៅត្រីមាសទី១ឆ្នាំ២០១២កន្លងទៅនេះ។
ចំណែកឯការបោះទុនធ្វើវិនិយោគនៅក្នុងតំបន់ទីក្រុងចិនវិញបានកើនឡើង២០,១%សម្រាប់រយៈកាលប្រាំខែនៃឆ្នាំ២០១២កន្លងទៅនេះ។ នេះបើគេប្រៀបផ្ទឹមទៅនឹងកំណើននៃការបោះទុនធ្វើវិនិយោគសម្រាប់រយៈពេលដដែលនៅឆ្នាំ២០១១។
គួរបញ្ជាក់ថា ការបោះទុនធ្វើវិនិយោគដែលតំណាងដល់ទៅជាង៥០%នៃផលិតផលដុលក្នុងប្រទេសចិន បានឆ្លៀតទាញយកផលពីវិធានការរបស់រដ្ឋាភិបាលនៃទីក្រុងប៉េកាំងដើម្បីជួយគាំទ្រសកម្មភាពសេដ្ឋកិច្ច ជាពិសេសតាមរយៈការសាងសង់ហេដ្ឋារចនាសម្ព័ន្ធ។
រីឯវិស័យពាណិជ្ជកម្មលក់រាយ ដែលអនុញ្ញាតឲ្យគេវាស់ដឹងពីជោគជ័យនៃវិធានការរបស់រដ្ឋាភិបាលចិនក្នុងការជួយជំរុញ ឲ្យមានសន្ទុះក្នុងការទិញដូរហូបចុកផ្ទៃក្នុង បានកើនឡើងតែ១៣,៨%ប៉ុណ្ណោះក្នុង១ឆ្នាំសម្រាប់ខែឧសភាកន្លងទៅទល់នឹង១៤,១%សម្រាប់ខែមេសាឆ្នាំ២០១២។ គឺការទិញដូរហូបចុកផ្ទៃក្នុងនេះឯងដែលរដ្ឋាភិបាលចិនរំពឹងថាអាចជួយអូសទាញម៉ាស៊ីនសេដ្ឋកិច្ចចិនដែលជាមហាអំណាចសេដ្ឋកិច្ចទីពីរពិភពលោក ហើយដែលបច្ចុប្បន្ននេះរំពឹងខ្លាំងទៅលើការបោះទុនធ្វើវិនិយោគ ហើយនិងការនាំផលិតផលឧស្សាហកម្មចេញទៅលក់ក្រៅប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ