ជំងឺផ្តាសាយបក្សី H៧N៩រាលដាលដល់ខេត្តចិនថ្មីមួយទៀត
នៅប្រទេសចិន ជំងឺផ្តាសាយបក្សី ដែលបង្កដោយវីរុសH៧N៩ បានរាលដាលទៅដល់ខេត្តមួយទៀតហើយ គឺខេត្តHenan ស្ថិតនៅភាគកណ្តាលប្រទេស។ នៅថ្ងៃអាទិត្យនេះនៅខេត្ត Henan ចិនបានរកឃើញអ្នកជំងឺពីរនាក់បន្ថែមទៀត។ គិតចាប់តាំងពីពេលដែលអាជ្ញាធរចិនបានប្រកាសអំពីជំងឺផ្តាសាយបក្សីនេះ កាលពីពីរសប្តាហ៍មុនមក ចំនួនអ្នកឆ្លងផ្តាសាយបក្សីសរុបមាន៥១នាក់ ក្នុងនោះ១១នាក់បានស្លាប់បាត់បង់ជីវិត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
នៅថ្ងៃអាទិត្យនេះ ចិនបានរកឃើញអ្នកឆ្លងជំងឺផ្តាសាយបក្សីចំនួនពីរនាក់បន្ថែមទៀត នៅក្នុងខេត្តថ្មីមួយទៀត គឺខេត្ត Henan ស្ថិតនៅភាគកណ្តាលប្រទេស។ អ្នកជំងឺម្នាក់ជាចុងភៅចំអិនអាហារ អាយុ៣៤ឆ្នាំ។ គាត់មានស្ថានភាពជំងឺធ្ងន់ធ្ងរ។ ហើយម្នាក់ទៀតជាអ្នកបំរើការក្នុងកសិដ្ឋាន អាយុ៦៥ឆ្នាំ ស្ថានភាពជំងឺមានលក្ខណៈនឹងនរ។
គិតសរុបមកដល់ពេលនេះ ជំងឺផ្តាសាយបក្សីបង្កដោយវីរុស H៧N៩ បានកើតឡើងក្នុងខេត្តចិនចំនួន៤ គឺខេត្ត Zhejiang Jiangsu និង Anhui ដែលជាខេត្តបី ស្ថិតនៅភាគខាងកើតប្រទេស។ ហើយនៅថ្ងៃអាទិត្យនេះ ឆ្លងដល់ខេត្ត Henan នៅភាគកណ្តាលប្រទេស។ រហូតមកដល់ពេលនេះ ជំងឺនេះបានសំលាប់មនុស្ស ១១នាក់ហើយ។
កាលពីថ្ងៃសៅរ៍ម្សិលមិញ អាជ្ញាធរចិនបានប្រាប់ថា កុមារីអាយុ៧ឆ្នាំម្នាក់ ដែលមានឪពុកម្តាយលក់ដូរសត្វស្លាបនោះ បានឆ្លងជំងឺនេះ ហើយត្រូវបានបញ្ជូនទៅមន្ទីរពេទ្យ។ ស្ថានភាពជំងឺរបស់កុមារី មានភាពនឹងនរទេ។
អ្នកវិទ្យាសាស្ត្រមានការព្រួយបារម្ភខ្លាចក្រែងមេរោគនេះធ្វើការវិវត្តន៍ផ្លាស់ប្តូរ បណ្តាលអោយមានការឆ្លងពីមនុស្សទៅមនុស្ស។ នៅសប្តាហ៍នេះ អង្គការសុខភាពពិភពលោក OMS បានរំលឹកឡើងវិញថា ជំងឺនេះមិនចំលងពីមនុស្សទៅមនុស្សនោះទេ។ មនុស្សទាំង១៩នាក់ ដែលបានប៉ះពាល់អ្នកជំងឺពីររូបនៅខេត្ត Henan នេះ ក៏មិនមានបង្ហាញនូវអាការៈជំងឺអ្វីនោះដែរ។
ដើម្បីចៀសវៀងមិនអោយមានការឆ្លងរាលដាលរវាងសត្វស្លាប ក្រុងប៉េកាំងនិងក្រុងសៀងហៃ បានចាត់វិធានការយ៉ាងហ្មត់ចត់ ដោយបានបិទផ្សារនានាដែលលក់សត្វស្លាប និងហាមឃាត់មិនអោយមានការប្រកួតប្រណាំងបង្ហោះសត្វព្រាប ដែលជាល្បែងមានប្រជាប្រិយភាពនៅចិន។ លើសពីនេះ ក្រុងប៉េកាំងបានកំចាត់សត្វស្លាបជាង៥០០ក្បាល។ រីឯក្រុងសៀងហៃវិញ បានកំចាត់រាប់ម៉ឺនក្បាលផងដែរ។ ទង្វើនេះបង្កអោយប៉ះពាល់ធ្ងន់ដល់ផ្នែកចិញ្ចឹមសត្វស្លាបក្នុងស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ