មន្ត្រីរដ្ឋការកែណ្ឌគ្នីគ្នាប្រឆាំងគម្រោងថវិការត្បិតត្បៀតថ្មីរបស់រដ្ឋាភិបាល
ប្រទេសអេស្ប៉ាញបានស្គាល់ការគាំងស្ទះសារជាថ្មីនៅថ្ងៃព្រហស្បតិ៍១៩កក្កដាម្សិលមិញ។ មន្ត្រីរដ្ឋការជាច្រើនរយពាន់នាក់ បានកេណ្ឌគ្នីគ្នាដង្ហែក្បួនបាតុកម្មនៅតាមទីក្រុងប្រមាណជា៨០នៅទូទាំងប្រទេស ដើម្បីប្រឆាំងនឹងផែនការរឹតត្បឹតថវិការថ្មីរបស់រដ្ឋាភិបាលអេស្ប៉ាញ។
ចុះផ្សាយនៅថ្ងៃ៖
ស្តាប់ - ០២:៣៥
លើកនេះ បាតុករអេស្ប៉ាញស្ទើរតែទូទាំងប្រទេស បានកេណ្ឌគ្នីគ្នា តាមការអំពាវនាវ របស់អង្គការសហជីពនៅក្នុងប្រទេស។ នៅទីក្រុងម៉ាឌ្រីដ (Madrid) ម្សិលមិញ ក្រុមបាតុករដែលជាមន្ត្រីរដ្ឋការ បានកេណ្ឌប្រមូលកម្លាំងគ្នាជាថ្មីទៀត ដើម្បីស្រែកប្រឆាំងនឹងផែនការថវិការត្បិតត្បៀតជាថ្មីរបស់រដ្ឋាភិបាលអេស្ប៉ាញ។
អ្នកស្រី Julia Calvo ដែលជាមន្ត្រីរដ្ឋការមួយរូបនៅក្រសួងវប្បធម៌និងអប់រំ បានមកចូលរួមក្នុងមហាបាតុកម្មនេះ ដើម្បីនិយាយបញ្ជាក់ អំពីការនឿយណាយធុញទ្រាន់របស់គាត់និងស្រែកប្រឆាំងផែនការ កាត់បន្ថយថវិការជាថ្មី នៅគ្រប់ក្រសួងរដ្ឋ ដែលជំរុញឲ្យមន្ត្រីរដ្ឋការ កាន់តែមានជីវភាពលំបាកយ៉ាប់យឺនខ្លាំង។
លោក Pablo ពាក់មួកព័ណ៌មាស ក៏មកចូលរួមក្នុងបាតុកម្មរបស់ក្រុមអ្នកលត់ភ្លើងនៃរដ្ឋធានីអេស្ប៉ាញ ដែរ ដើម្បី ប្រឆាំងនឹងការលុបចោលប្រាក់ខែ-ខែទី១៣(treizième mois)របស់ពួកគាត់។ "យើងជាអ្នករាជការ ជាពលករតំណែងសាធារណៈហើយឥឡូវនេះរដ្ឋាភិបាល កំពុងតែបំផ្លិចបំផ្លាញវណ្ណៈកម្មករ"-នេះជាការសម្រែក ដ៏ឈឺចាប់របស់ពួកបាតុករខាងលត់ភ្លើង។
ប្រកបដោយកំហឹងនិងប្រឆាំងកំណែទម្រង់របស់រដ្ឋាភិបាលស្តាំនិយមអេស្ប៉ាញ ប្រជាជន បានសម្តែងការព្រួយបារម្ភយ៉ាងខ្លាំងនៅចំពោះមុខអវត្តមាននៃវិធានការរបស់រដ្ឋាភិបាល ក្នុងការផ្តល់សន្ទុះ ដល់ការងារនិងសេដ្ឋកិច្ចនៅក្នុងប្រទេសឡើយ។ "រីឯ មន្ត្រីរដ្ឋការវិញ ត្រូវ គេបញ្ឈប់ពីការងារជារៀងរាល់ថ្ងៃ "។ "ប្រទេសអេស្ប៉ាញ នៅពេលអនាគតច្បាស់ជាជួបនឹងវិបត្តិហិរញ្ញវត្ថុ អាក្រក់ជាងប្រទេសក្រិកទៅទៀត"- នេះជាសំរែករបស់បាតុករអេស្ប៉ាញ។
នៅពេលចុងបញ្ចប់ក្បួនដង្ហែបាតុកម្មនៅពេលយប់ ការប៉ះទង្គិចគ្នាមួយបានផ្ទុះឡើង។ ក្រុមនគរបាល ប្រឆាំងកុបកម្ម បានធ្វើអន្តរាគមន៍ វាយបំបែកក្រុម យុវជនបាតុករ ដោយប្រើដំបងនិងបាញ់គ្រាប់កៅស៊ូ ជាហេតុបណ្តាលឲ្យមានអ្នករបួសស្រាល៦នាក់និងចាប់ខ្លួនជន៧នាក់ផ្សេងទៀត។
សូមបញ្ជាក់ថារដ្ឋាភិបាលអេស្ប៉ាញ មានបំណងសន្សំសំចៃថវិការឲ្យបានចំនួន ៦៥ ពាន់លានអឺរ៉ូ នៅក្នុងរយៈពេល២ឆ្នាំ ។ ដើម្បីសន្សំសំចៃថវិកានេះ រដ្ឋាភិបាលអេស្ប៉ាញតម្រូវឲ្យប្រជាជនខ្លួន ធ្វើពលិកម្មហិរញ្ញវត្ថុជាប្រវត្តិសាស្ត្រតទៅទៀត នៅខណៈដែលអេស្ប៉ាញ កំពុងទទួលរងឥទ្ធិពលនៃវិបត្តិសេដ្ឋកិច្ចយ៉ាងពេញទំហឹងនៅក្នុងប្រទេស តាំងពី ៤ឆ្នាំកន្លងមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ