បេក្ខជន Nicolas Maduro ទទួលជោគជ័យ បក្សប្រឆាំងទាមទារអោយរាប់សន្លឹកឆ្នោតឡើងវិញ
ការបោះឆ្នោតប្រធានាធិបតីដែលបានប្រព្រិត្តិទៅកាលពីថ្ងៃអាទិត្យម្សិលមិញនេះ លោក Nicolas Maduro ដែលជាប្រធានាធិបតីបណ្តោះអាសន្ន បានទទួលជោគជ័យយ៉ាងប្រកិតប្រកើយជាមួយនឹងសម្លេង ៥០,៦៦ ភាគរយ ទៅលើលោក Heinrique Capriles ដៃគូប្រជែងមកពីគណបក្សប្រឆាំង ដែលទទួលបានសម្លេងរហូតដល់ ៤៩,០៧ភាគរយ។ គណបក្សប្រឆាំងបានបដិសេធនឹងលទ្ធផលបោះឆ្នោតនេះ ហើយបានទាមទារអោយមានការរាប់សន្លឹកឆ្នោតឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
សម្លេង ៥០,៦៦ ភាគរយរបស់គណបក្សកាន់អំណាច ទល់នឹង៤៩,០៧ភាគរយដែលទទួលបានដោយគណបក្សប្រឆាំង នេះគឺជាលទ្ធផលនៃការបោះឆ្នោតប្រធានាធិបតីនៅវេណេស៊ុយអេឡា ដែលបានប្រព្រិត្តិទៅ កាលពីថ្ងៃអាទិត្យម្សិលមិញ។ គណបក្សកាន់អំណាចទទួលបានជោគជ័យយ៉ាងប្រកិតប្រកើយ គឺទទួលបានសន្លឹកឆ្នោតប្រហែលជា ៣សែនតែប៉ុណ្ណោះ លើគណបក្សប្រឆាំង។
លទ្ធផលនេះ បានផ្តល់ជោគជ័យដល់បេក្ខជន Nicolas Maduro អោយឡើងកាន់ដំណែងជាប្រធានាធិបតី សំរាប់អណត្តិ៦ឆ្នាំ បន្តពីអតីប្រធានាធិបតី Hugo Chavez។ លទ្ធផល នេះ បានបង្កអោយមានភាពតានតឹងក្នុងប្រទេស។ គួររំលឹកថា វេណេស៊ុយអេឡា បានបែកចែកជាពីរបក្សពួក បន្ទាប់ពីមានការបះបោរនៅក្នុងសង្គមអស់រយៈពេល១៤ឆ្នាំ កន្លងមក។
បក្សប្រឆាំងដែលដឹកនាំដោយបេក្ខជន Heinrique Capriles ជាអភិបាលរដ្ឋMiranda ស្ថិតនៅភាគខាងជើងប្រទេស បានបដិសេធមិនទទួលស្គាល់លទ្ធផលនៃការបោះឆ្នោត ហើយទាមទារអោយមានការរាប់សន្លឹកឆ្នោតឡើងវិញ។ គួរបញ្ជាក់ថា នៅពេលមុននេះបន្តិច ក្រុមប្រឹក្សាជាតិទទួលបន្ទុករៀបចំការបោះឆ្នោត បានប្រកាសថា លោក Nicolas Maduro បានទទួលជោគជ័យដ៏លើសលុបជាមួយសម្លេង ៩៩ ភាគរយ។ ប៉ុន្តែ សមាជិកម្នាក់នៅក្នុងក្រុមប្រឹក្សាបានទាមទារអោយត្រួតពិនិត្យមើល សន្លឹកឆ្នោតឡើងវិញ។
នៅវេណេស៊ុយអេឡា ប្រជាជនបានបោះឆ្នោតតាមម៉ាស៊ីនអេឡិចត្រូនិក។ គណបក្សប្រឆាំងចង់អោយរាប់សន្លឹកឆ្នោតនៅក្នុងម៉ាស៊ីន អេឡិចត្រូនិកនេះឡើងវិញ។ អ្នកវិភាគគិតថា ដោយសារតែលោក Heinrique Capriles ជាមេដឹកនាំសំខាន់របស់បក្សប្រឆាំង ការប្រកែករបស់លោក មិនទទួលស្គាល់ជោគជ័យរបស់បក្សកាន់អំណាច អាចនឹងធ្វើអោយសកម្មភាពតស៊ូនយោបាយរបស់បក្សប្រឆាំងអាចបន្តទៅ បានយូរអង្វែងទៀត។
ទោះយ៉ាងនេះក៏ដោយ គណបក្សកាន់អំណាចមានការសប្បាយរីករាយនឹងជោគជ័យរបស់ខ្លួន។ “នៅថ្ងៃនេះ យើងអាចនិយាយបានថា យើងទទួលបានជោគជ័យមួយប្រកបដោយយុត្តិធម៌ ស្របតាមច្បាប់ និងរដ្ឋធម្មនុញ្ញ។” នេះជាការលើកឡើងរបស់លោក Nicolas Maduro។
ប្រធានាធិបតីអាហ្សង់ទីន លោកស្រី Christina Kirchner ជាប្រធានាធិបតីទីមួយ ដែលបានសំដែងការអបអរចំពោះជោគជ័យរបស់លោក Nicolas Maduro។ ជាគោលការណ៏ ប្រសិនបើ លោក Maduro កាន់ដំណែងជាប្រធានាធិបតីនោះ លោកត្រូវតែប្រឈមមុខនឹងសេដ្ឋកិច្ចដ៏ផុយស្រួយ ដោយសារថាបំណុលជាតិ មានដល់ទៅពាក់កណ្តាលនៃផលិតផលសរុបក្នុងស្រុក។ ហើយអតិផរណាមានដល់ទៅ២០ភាគរយ គឺខ្ពស់បំផុតនៅអាមេរិកឡាទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ