អាមេរិកបញ្ជូនយានអវកាសគ្មានមនុស្សមួយគ្រឿង ទៅកាន់ឋានព្រះចន្ទ
នៅយប់ថ្ងៃសុក្រម្សិលមិញនេះ អង្គការណាសាបានបាញ់បញ្ជូនយានអវកាសគ្មានមនុស្ស មួយគ្រឿង ឈ្មោះថា ឡាដេ LADEE ឡើងទៅឋានព្រះចន្ទ ដើម្បីធ្វើការសិក្សាពីភាពអាថ៌កំបាំងនៃបរិយាកាសដ៏ស្រាល នៅឋានព្រះចន្ទ។ បេសកកម្មយានអវកាសនេះ ធ្វើឡើង បន្ទាប់ពីអ្នកអវកាសអាមេរិកចុងក្រោយបង្អស់នៃកម្មវិធីអាប៉ូឡូ បានចាកចេញពីឋានព្រះចន្ទ កាលពី៤០ឆ្នាំមុន។ បេសកកម្មយានអវកាសឡាដេ អាចនឹងជួយផ្តល់ការយល់ដឹងពីវត្ថុផ្សេងៗនៃប្រព័ន្ធព្រះអាទិត្យ ដូចជាអាចមន៍ផ្កាយ រឺក៏ភពពុធផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
យានអវកាសដែលអង្គការណាសា បានបញ្ជូនទៅឋានព្រះចន្ទកាលពីយប់ថ្ងៃសុក្រ មានទំហំស្មើនឹងរថយន្តតូចមួយ គឺមានទំងន់៣៨៣គីឡូក្រាម មានទិសដៅសិក្សាពីបរិយាកាសឋានព្រះចន្ទ។ គឺជាយានអវកាសគ្មានមនុស្សនៅ មានឈ្មោះថា « បរិយាកាសឋានព្រះចន្ទ និងអ្នករុករកធូលីនៃបរិដ្ឋាន » ហៅកាត់ថា LADEE។
យានអវកាស LADEE ត្រូវចំណាយពេល១ខែ ដើម្បីធ្វើដំណើរទៅដល់គន្លងឋានព្រះចន្ទ។ LADEEនឹងប្រមូលយកទិន្នន័យនៃប្រព័ន្ធនិងធាតុផ្សំគីមីដែលមានក្នុងបរិយាកាសនៅឋានព្រះចន្ទ។ កំហាប់បរិយាកាសនៅទីនោះ គឺស្រាលខ្លាំងណាស់ គិតទៅគឺមានត្រឹមតែកម្រិតមួយភាគមួយសែន (១/១០០០ ០០០) នៃកំហាប់ផែនដីប៉ុណ្ណោះ។ អាមេរិកចង់ដឹងថា តើកំទេចធូលីអាចនឹងទើរជាប់នៅទីនោះ រឺក៏ទើរជាប់ក្បែរដីទីនោះដែរ រឺយ៉ាងណា។ ជាពិសេសទៅទៀតនោះ កំទេចធូលីប្រហែលជាអាចជួយពន្យល់អ្នកវិទ្យាសាស្ត្រ ពីភាពអាថ៌កំបាំងនៃពន្លឺព្រឹមៗ ដែលអ្នកអវកាសកម្មវិធីអាប៉ូឡូ ធ្លាប់បានសង្កេតឃើញ ក្នុងចន្លោះឆ្នាំ១៩៦៩ និងឆ្នាំ១៩៧២ នៅជើងមេឃ គឺមុនពេលថ្ងៃរះ។
កាលពីឆ្នាំ២១០២ អង្គការណាសាក៏ធ្លាប់បានបញ្ជូនយានអវកាសភ្លោះពីរគ្រឿង ឈ្មោះថា GRAIL ទៅឋានព្រះចន្ទផងដែរ ដើម្បីស្វែងរកភាពអាថ៌កំបាំងនៅក្នុងឋានព្រះចន្ទ និងវាស់វែងដែនកំលាំងស្រូបទាញទីនោះ។
អាមេរិកចង់សិក្សាពីបរិយាកាសឋានព្រះចន្ទ អោយបានមុនបេសកម្មរុករកផ្សេងៗទៀត ដែលបេសកកម្មទាំងនោះ អាចនឹងប៉ះពាល់បរិដ្ឋានដ៏ផុយស្រួយនៃឋានព្រះចន្ទ។ យោងតាមអង្គការណាសា សូម្បីតែការចុះចតឧបករណ៍តូចមួយ ក៏អាចប៉ះពាល់ដល់ឋានព្រះចន្ទបានដែរ។ កាលពីសប្តាហ៍មុន ចិនបានប្រកាសថា នឹងបញ្ជូនយានអវកាសខ្លួនទៅឋានព្រះចន្ទ យ៉ាងយូរបំផុតចុងឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ