អ្នកស្រុកឆោឡោនឹងអាចម៍ផ្កាយ ធ្លាក់ព្រឹកមិញទៅលើតំបន់ភ្នំ Oural ប្រទេសរុស្ស៊ី
បាតុភូតដ៏កម្រនេះបានកើតឡើងនៅតំបន់នោះ ដែលនាំឲ្យបណ្តាជនក្រុង Chelyabinsk នៅចម្ងាយប្រមាណ ១.៨០០គ.ម. ខាងកើតពីរដ្ឋធានីម៉ូស្គូ រងគ្រោះច្រើនជាងគេ។ តាមតួលេខចុងក្រោយ មានមនុស្សជាង៤០០នាក់ទៅហើយ បានសុំជំនួយពេទ្យ មកពីគេភាគច្រើនមុតនឹងកញ្ចក់ដែលខ្ទៀតបែកទៅក្រោមចំហាយរលក បង្កដោយការហោះល្បឿនលឿន ឥតឧបមានៃអាចម៍ផ្កាយ នៅកំពស់ ៥គ.ម.ពីដី។
ចុះផ្សាយនៅថ្ងៃ៖
ស្តាប់ - ០២:៤៦
ជាបឋម គួរនិយាយថាព្រឹត្តិការណ៍នេះ កើតឡើងព្រឹកថ្ងៃ១៥ កុម្ភៈនេះ វេលាម៉ោង ៩-២២នាទី ដោយអាចម៍ផ្កាយមុនដំបូង បានហោះចូលក្នុងដែនអាកាស ប្រទេស Kazakhstan រួចមកឆាបលើខេត្ត Sverdovsk, ខេត្ត Chelyabinsk តំបន់ភ្នំ Oural ប្រទេសរុស្ស៊ី បានន័យថា ក្នុងលំហដែលស្ថិតនៅចម្ងាយពី ១.៧០០គម ដល់២.០០០គម ខាងកើត និងអគ្នេយ៍ពីរដ្ឋធានីម៉ូស្គូ។
អ្នកស្រុកជាសាក្សីដែលបានឃើញបាតុភូតចម្លែកនេះដោយផ្ទាល់ភ្នែក នាំគ្នារៀបរាប់ទាំងស្លន់ស្លោថា ក្នុងផ្ទៃមេឃ គេឮសូរស្នូរផ្ទុះម្តងហើយម្តងទៀត បែកចេញជាពន្លឺភ្លឺចិញ្ចាចរួចមក ធ្លាក់គ្ឌុកៗមកលើដី គឺអំបែងក្តៅគគុក ប្រៀបបានជាភ្លៀងអាចម៍ផ្កាយ។ នៅខេត្ត Chelyabinsk បណ្តាញទូរសព្ទដៃស្រាប់តែដើរលែងស្រួល ហើយក្រុមសង្គ្រោះចាប់ផ្តើមជម្លៀសអ្នកស្រុកចេញខ្លះៗទៅផង។ ល្បឿនហោះលឿនសែនលឿននៃអាចម៍ផ្កាយ បានបង្កជារលកបោកបក់ ឲ្យកញ្ចក់ផ្ទះអ្នកស្រុក បែកខ្ទៀតមុតសាច់គេតែម្តង។ តាមតួលេខចុងក្រោយ អ្នករងគ្រោះបែបនេះ មានចំនួនដល់ជាង ៤០០នាក់ ពីក្នុងនោះ៥នាក់ ត្រូវបានដឹកទៅព្យាបាលនៅមន្ទីរពេទ្យ។
រីឯការខូចខាតសម្ភារៈ មានដូចតទៅ ៖ អំបែងមួយនៃអាចម៍ផ្កាយ បានធ្លាក់ទៅចំរោងចក្រដែលផលិតស័ង្កសី បណ្តាលឲ្យជញ្ជាំង និងដំបូលវាបែកបាក់អស់មួយភាគ។ ប៉ុន្តែសំណាងល្អ ឥតបណ្តាលឲ្យកម្មកររោងចក្ររងគ្រោះឡើយ។ នៅកន្លែងមួយផ្សេងទៀត ការធ្លាក់នៃអំបែងអាចម៍ផ្កាយ បានបំបះជាពពកផ្សែងនិងធូលីហុយ ទាល់តែនាំឲ្យផ្អាកចរាចរណ៍។ ក្នុងឃុំមួយនៅចម្ងាយ៣០គ.ម. ពីទីរួមខេត្ត Chelyabinsk អំបែងអាចម៍ផ្កាយបានបំផ្លាញក្លោងទ្វារដែកនៃអគារមួយ ប៉ុន្តែគ្មានអ្នករងគ្រោះទេ។ ចំណែកសាលារៀនបានផ្អាកការសិក្សាមួយរយៈ។
ក្រសួងរុស្ស៊ីខាងស្ថានការណ៍អាសន្ន ថ្លែងថាបុគ្គលិកខ្លួនទាំង ២០.០០០នាក់ នៅលើដី ក៏ដូចជាយន្តហោះ៣គ្រឿងរបស់ខ្លួន កំពុងពិនិត្យមើលសភាពការណ៍តំបន់ នៅលើដីផ្ទាល់ ក៏ដូចពីលើអាកាសតែម្តង។ គឺនៅក្នុងខេត្ត Chelyabinsk ដែលគេរកឃើញទៅហើយអាចម៍ផ្កាយនោះទម្ងន់តែ១ គីឡូក្រាមសោះ។
តាមដែលពួកអ្នកប្រាជ្ញក្នុងលោកនាំគ្នារង់ចាំ គឺយប់នេះឯង នៅវេលាកណ្តាលអធ្រាត្រ ម៉ោងម៉ូស្គូ នឹងមានអាចម៍ផ្កាយមួយធំសំបើម ទំហំដល់ ៤៥ម៉ែត្រ ស្មើនឹងអគារកំពស់១៥ជាន់ ហោះដោយល្បឿនជិត៨គ.ម. ក្នុង១វិនាទី មកជិតផែនដី នៅចម្ងាយតែ ២ម៉ឺន៨ពាន់គម ពីផែនដី។
ប្រសិនបើវាបុកនឹងផែនដីនោះ តួខ្លួនវាដែលមានទម្ងន់ ១៣០.០០០តោន អាចធ្លាយចេញជាថាមពលស្មើនឹង ២,៤ Megatonnes ឬរាប់ពាន់ដងនៃកម្លាំងផ្ទុះរបស់គ្រាប់បែកបរមាណូ ដែលស.រ.អា.បានទម្លាក់លើក្រុងជប៉ុន Hiroshima ក្នុងឆ្នាំ១៩៤៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ