ដើមបូព៌ាប្រឈមនឹងជ្រោះនៃសង្គ្រាមបន្ទាប់ពីឃាតកម្មសម្លាប់មេយោធាហាម៉ាស
អំពើហិង្សា ឬប្រតិបត្តិការយោធាផ្លូវគោក អាចនឹងផ្ទុះឡើងបានគ្រប់ពេលវេលា បន្ទាប់ពីមរណភាពរបស់ប្រមុខយោធាចលនាហាម៉ាស Ahmad Jaabari នៅតំបន់ហ្កាហ្សា រសៀលម្សិលមិញ។ ជាចម្លើយតបនឹងការបាញ់ផ្លោងសម្លាប់មេទាហានហាម៉ាស ដែលជាប្រតិបត្តិការការពារខ្លួន ចលនាអ៊ីស្លាមជ្រុលនិយម បានស្បថសច្ចាថា រដ្ឋអ៊ីស្រាអែលជាអ្នកបើកទ្វារនរកខ្លួនឯងទេ ! នៅលើផ្នែកការទូតវិញ ក៏កំពុងពុះកញ្ជ្រោល អេហ្ស៊ីប បានកោះហៅអគ្គរដ្ឋទូតរបស់ខ្លួន ឱ្យត្រលប់ចូលស្រុក ដើម្បីពិគ្រោះ។ លោកប្រធានាធិបតីអាមេរិក បារ៉ាក់ អូបាម៉ា ក៏បានជួបសន្ទនាតាមទូរស័ព្ទជាមួយនឹងលោក នាយករដ្ឋមន្ត្រីអ៊ីស្រាអែល បិនយាមីន នេតាន់យ៉ាហ៊ូ (Benyamin Netanyahu) និង លោក Mohamed Morsi ប្រធានាធិបតីអេហ្ស៊ីប។ ជំនួបប្រជុំបន្ទាន់ នៅក្រុមប្រឹក្សាសន្តិសុខអង្គការសហប្រជាជាតិ ក៏ទំនងជាត្រូវបានរៀបចំឡើងដែរ នៅយប់ថ្ងៃពុធឆ្លងមកថ្ងៃព្រហស្បតិ៍នេះ។
ចុះផ្សាយនៅថ្ងៃ៖
ស្តាប់ - ០២:១៧
គ្រាប់ផ្លោងទៅកាន់តំបន់ហ្កាហ្សា របស់យោធាអ៊ីស្រាអែល បានសម្លាប់ប្រមុខយោធារបស់ចលនាហាម៉ាស អាមាទ ហ្សាប៉ារី និងអង្គរក្ស។ បន្ទាប់មក អ៊ីស្រាអែលបានបន្ថែមការវាយប្រហារ បាញ់ផ្លោងជាងម្ភៃទៀតទៅលើទីតាំងបាញ់ចេញគ្រាប់រ៉ុកកែត។
មរណភាពនេះមិនមែនជាការចៃដន្យទេ ! អ៊ីស្រាអែលបានគ្រោងនិង ដៅទិស ដោយចោទប្រកាន់ថា អាមាទ ហ្សាប៉ារី បានរៀបចំប្រតិបត្តិការភេរវកម្ម។ វាយប្រហារនេះអាចនឹងមានបន្តដោយផែនការវាយប្រហារថ្មើរជើងទៀតផង។ អ៊ីស្រាអែលមិនបានបដិសេធចំណុចនេះទេ និងថែមទាំងមានការអនុញ្ញាតពីរដ្ឋមន្ត្រីក្រសួងការពារជាតិ ឱ្យកងទ័ពអ៊ីស្រាអែលទាំងអស់ពង្រឹងកម្លាំងបំរុង ដើម្បីអាចឆ្លើយតបទៅនឹងសេចក្តីត្រូវការជាក់ស្តែង។ នេះបើតាមខុទ្ទកាល័យនាយករដ្ឋមន្ត្រី ដែលរូបលោក នេតាន់យាហ៊ូ ផ្ទាល់ បានចេញមុខពន្យល់តាមកញ្ចក់ទូរទស្សន៍នៅយប់ថ្ងៃពុធម្សិលមិញ អំពីមូលហេតុនៃការបាញ់ផ្លោងទៅលើតំបន់ហ្កាហ្សានេះ។
ក្រុងវ៉ាស៊ីនតោនជាសម្ព័ន្ធមិត្ត ក៏បានគូសបញ្ជាក់អំពីសិទ្ធិការពារខ្លួនរបស់អ៊ីស្រាអែល និងសន្យាតាមដានស្ថានការណ៍ដោយកៀកកិត។ លោក បារ៉ាក់អូបាម៉ា បានជួបពិភាក្សាភ្លាមនៅយប់មិញ ជាមួយនឹងលោកប្រមុខរដ្ឋាភិបាលអ៊ីស្រាអែលតាមទូរស័ព្ទ។ នេះបើតាមប្រសាសន៍របស់ឯកអគ្គរដ្ឋទូតអ៊ីស្រាអែលនៅអាមេរិកមកកាន់ភ្នាក់ងារព័ត៌មានបារាំង AFP។
លោកប្រធានាធិបតីអេហ្ស៊ីប Mohamed Morsi បានសម្រេចចិត្តកោះហៅឯកអគ្គរដ្ឋទូតត្រឡប់ចូលស្រុកវិញដើម្បីជាការព្រមាន។ ហើយក៏បានប្រគល់សំបុត្រប្រឆាំងមួយទៅស្ថានទូតអ៊ីស្រាអែលប្រចាំក្រុងឡឺគែរ។ លោកប្រធានាធិបតីអេហ្ស៊ីបក៏បានស្នើឱ្យមានការកោះប្រជុំបន្ទាន់នៅអង្គការសហប្រជាជាតិ។ ចំណែកលោកប្រធានរដ្ឋអំណាចប៉ាឡេស្ទីន មាមូត អាបាស Mahmoud Abbas បានថ្កោលទោសយ៉ាងដាច់អហង្ការទង្វើបាញ់ផ្លោងរបស់អ៊ីស្រាអែល និងបានស្នើសុំឱ្យជំនួបប្រជុំ សម្ព័ន្ធអារ៉ាប ជាបន្ទាន់។ បាឡេស្ទីន អំពាវនាវឱ្យសហគមន៍អន្តរជាតិ ព្រមទាំងភាគីអ៊ីស្រាអែលបញ្ឈប់អំពីហិង្សា។ ហើយក្នុងពេលរង់ចាំ តំបន់ហ្កាហ្សាក្លាយជាវាលរហោឋាន បណ្តាជនប៉ាឡេស្ទីន ត្រូវសំងំលាក់ខ្លួនក្នុងផ្ទះ ឮតែសំឡេងស៊ីរ៉ែនឡានពេទ្យនិងគ្រាប់ផ្លោង។ ក្រុមអង្គការមនុស្សធម៌ បានទទួលបញ្ជាហាមប្រាមមិនឱ្យចេញក្រៅធ្វើសកម្មភាព ប៉ុន្តែត្រូវត្រៀមខ្លួន ជម្លៀសជនស៊ីវិល ក្នុងករណីមានប្រតិបត្តិការយោធាកាន់តែសន្ធាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ