បាតុកម្មរបស់ក្រុមអាវក្រហមនៅបាងកកម្សិលមិញ
នៅឱកាសខួបឆ្នាំលើកទី៨០នៃការធ្វើរដ្ឋប្រហារដែលបានបញ្ចប់របបរាជានិយមផ្តាច់ការថៃថ្ងៃទី២៤មិថុនាឆ្នាំ១៩៣២ ក្រុមអាវក្រហម បានកេណ្ឌគ្នីគ្នានៅទីក្រុងបាងកកម្សិលមិញជាច្រើនពាន់នាក់បានអំពាវនាវតុលាការថៃកុំឲ្យជ្រៀតជ្រែកក្នុងបញ្ហានយោបាយ។ បាតុកម្មរបស់ក្រុមអាវក្រហមថៃដែលមួយភាគធំជាជាបក្សព័ន្ធគាំទ្រអតីតនាយករដ្ឋមន្ត្រីថៃគឺលោកថាក់ស៊ីនបានប្រព្រឹត្តទៅនៅចំពេលដែលវិបត្តិនយោបាយនៅក្នុងប្រទេសថៃចាប់រើខ្លាំងឡើងវិញនៅក្នុងរយៈពេលប៉ុន្មានសប្តាហ៍ចុងក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០២
យោងតាមនគរបាលថៃ ក្រុមអាវក្រហមប្រមាណជា៣ម៉ឺននាក់ បានប្រមូលផ្តុំគ្នានៅថ្ងៃអាទិត្យ២៤មិថុនាម្សិលមិញ ក្នុងទីក្រុងបាងកក ដើម្បីរំលឹកខួប៨០ឆ្នាំនៃការធ្វើរដ្ឋប្រហារមួយដែលបានបញ្ចប់របបរាជានិយមផ្តាច់ការនៅថ្ងៃទី២៤មិថុនាឆ្នាំ១៩៣២ ។
នៅម្សិលមិញ២៤មិថុនា២០១២ ក្នុងឱកាសខួបនេះ ក្រុមអាវក្រហម ដែលមួយភាគធំជាបក្សព័ន្ធគាំទ្រលោកអតីតនាយករដ្ឋមន្ត្រីថាក់ស៊ីន បានសំដែងការព្រួយបារម្ភខ្លាំងអំពីការគំរាមលទ្ធិប្រជាធិបតេយ្យនៅក្នុងប្រទេសថៃ។
« យើងទាំងអស់គ្នាត្រូវប្រុងប្រៀបខ្លួនជាស្រេច ដើម្បីធ្វើការប្រយុទ្ធតស៊ូមួយដែលមិនទាន់ចប់នៅឡើយទេ »-នេះជាសេចក្តីប្រកាសរបស់មេដឹកនាំម្នាក់នៃក្រុមអាវក្រហមឈ្មោះ Kokaew Pikulthong ដែលបានរំលឹកផងដែរ ថាប្រទេសថៃធ្លាប់បានស្គាល់រដ្ឋប្រហារ ឬក៏ការប៉ុនប៉ងធ្វើរដ្ឋប្រហារ ប្រមាណ២០លើកមកហើយចាប់តាំងពីឆ្នាំ១៩៣២។
មេដឹកនាំក្រុមអាវក្រហមថៃ ដដែលនេះ បានថ្លែងបន្តទៀតថា « នាអំឡុងប៉ុន្មានឆ្នាំចុងក្រោយនេះ ប្រទេសថៃ បានឆ្លងកាត់ពីវិបត្តិ រដ្ឋប្រហារយោធាមកវិបត្តិ រដ្ឋប្រហារប្រព័ន្ធតុលាការ»។ ដោយហេតុថា នៅឆ្នាំ២០០៨ សេចក្តីសម្រេចចិត្តនានារបស់តុលាការថៃ បានជំរុញ ឲ្យនាយករដ្ឋមន្ត្រីថៃពីររូបដែល ជិតដិតនឹងលោកថាក់ស៊ីន លាលែងចេញពីមុខតំណែង ។ ចំណែក លោកថាក់ស៊ីនវិញ បានធ្លាក់ចេញពីមុខតំណែងនាយករដ្ឋមន្ត្រី ដោយការធ្វើរដ្ឋប្រហាររបស់ពួកយោធានៅឆ្នាំ២០០៦។
ចាប់តាំងពីលោកថាក់ស៊ីន ធ្លាក់ចេញពីមុខតំណែងនាយករដ្ឋមន្ត្រីមក ប្រទេសថៃ បានឆ្លងកាត់វិបត្តិដ៏ធ្ងន់ធ្ងរជាច្រើន ដោយហេតុ មានការបែកបាក់គ្នាខ្លាំងនៅក្នុងសង្គម។ ជាការបែកបាក់គ្នា រវាង ស្រទាប់វណ្ណៈមធ្យម និងវណ្ណៈអ្នកក្រីក្រតាមជនបទដែលគាំទ្រលោកថាក់ស៊ីនជាប់ជានិច្ច ជាមួយនិងក្រុមអ្នកបញ្ញវ័ន្ត ដែលនៅជុំវិញព្រះបរមរាជវាំងក្នុងរាជធានីបាងកក ។ ពួកបញ្ញវន្តថៃ បានចាត់ទុករូបលោកថាក់ស៊ីន ថាជាការគំរាមមួយយ៉ាងខ្លាំងសំរាប់របបរាជានិយម។
សូមបញ្ជាក់ថា ការបែកបាក់គ្នាទាំងអស់នេះហើយ ដែលបានជំរុញឲ្យប្រទេសថៃ ធ្លាក់ជ្រៅទៅក្នុងវិបត្តិនយោបាយដ៏ធ្ងន់ធ្ងរមួយទៀតនៅនិទាឃរដូវឆ្នាំ ២០១០ ។ នៅជំនាន់នោះ ពួកអាវក្រហមថៃ ប្រមាណជា ១០ម៉ឺននាក់ បានប្រមូលផ្តុំគ្នានិងបានកាន់កាប់ទីក្រុងបាងកកអស់២ខែ ដើម្បីស្រែកទាមទារបង្ខំ ឲ្យរដ្ឋាភិបាលជំនាន់នោះគឺជំនាន់លោកអាភិស៊ីត ចុះចេញពីមុខតំណែង។ ក៏ប៉ុន្តែ ក្រុមបាតុករអាវក្រហម ត្រូវបានពួកយោធារបស់រដ្ឋាភិបាល លោកអាភិស៊ីត វាយបង្ក្រាបបំបែក បាតុករយ៉ាងកាចសាហាវបំផុតនិងបានបណ្តាលឲ្យស្លាប់មនុស្សចំនួន៩០នាក់និងរបួសជន ១៩០០នាក់ក្នុងនោះមួយភាគធំ គឺជាជនស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ