អាមេរិកប្រកាសរក្សាសមយុទ្ធធ្វើនៅប្រទេសថៃ
សហរដ្ឋអាមេរិកបានប្រកាស កាលពីថ្ងៃសៅរ៍ ទី ២៥ តុលា ថា ខ្លួននៅតែរក្សាធ្វើលំហាត់សមយុទ្ធប្រចាំឆ្នាំ ដែលត្រូវនៅប្រទេសថៃ។ ដោយសារតែរដ្ឋប្រហាររបស់ពួកយោធា ដណ្តើមអំណាចពីរដ្ឋាភិបាលស្របច្បាប់ ទីក្រុងវ៉ាស៊ីនតោនបានសម្រេចផ្អាកជំនួយយោធាដល់ប្រទេសថៃ និងបានគំរាមលុបចោល សមយុទ្ធអន្តរជាតិ ដែលត្រូវធ្វើនៅឆ្នាំក្រោយក្នុងប្រទេសថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
អាមេរិកមិនបានធ្វើទៅតាមការគំរាមរបស់ខ្លួន។ កាលពីថ្ងៃសៅរ៍ ទីក្រុងវ៉ាស៊ីនតោន តាមរយៈអ្នកនាំពាក្យរបស់ស្ថានទូតអាមេរិកប្រចាំទីក្រុងបាងកកបានបញ្ជាក់ថា សមយុទ្ធអន្តរជាតិនៅខែកុម្ភៈឆ្នាំក្រោយនឹងនៅតែត្រូវធ្វើនៅក្នុងទឹកដីថៃ។
កាលពីខែមិថុនា ទីក្រុងវ៉ាស៊ីនតោនដែលបានថ្កោលទោសរដ្ឋប្រហារ ដណ្តើមអំណាចរបស់ពួកយោធាថៃ ធ្លាប់បានប្រកាសផ្អាកជំនួយរបស់ខ្លួនប្រមាណជិត៥លានដុល្លារសម្រាប់ផ្នែកសន្តិសុខថៃ និងបានព្រមានឈប់ធ្វើសមយុទ្ធយោធានៅក្នុងប្រទេសថៃ។
ប៉ុន្តែ ៤ខែ ក្រោយរដ្ឋប្រហារថៃ អាមេរិកបានប្រកាសរក្សាធ្វើសមយុទ្ធនៅក្នុងទឹកដីថៃដដែល។ តាមអ្នកនាំពាក្យរបស់ស្ថានទូតអាមេរិកក្នុងទីក្រុងបាងកក ដោយយោងទៅលើស្ថានភាពនយោបាយបច្ចុប្បន្នក្នុងប្រទេសថៃ គេនឹងកាត់បន្ថយការប្រើប្រាស់អាវុធធ្វើសង្រ្គាម នៅក្នុងសមយុទ្ធ ប៉ុន្តែ គេនឹងផ្តោតសំខាន់ទៅលើការជួយសង្រ្គោះ ផ្នែកមនុស្សធម៌ វិញ។
ទោះបីជាថ្កោលទោសរដ្ឋប្រហារយោធាថៃ ប៉ុន្តែ អាមេរិកនៅតែត្រូវការថៃដែលជាសម្ព័ន្ធមិត្តដ៏សំខាន់មួយដែររបស់ខ្លួន នៅអាស៊ី។ តាំងពីឆ្នាំ ១៩៨០ អាមេរិក និងថៃតែងតែរួមគ្នាធ្វើសមយុទ្ធជារៀងរាល់ឆ្នាំ។ សមយុទ្ធឈ្មោះ កូប្រា ដឹកនាំដោយអាមេរិក មានចូលរួមពីទាហាន ប្រមាណ១ម៉ឺន ៣ពាន់នាក់ ដែលនៅក្នុងនោះមានមួយចំនួនមកពីប្រទេសអាស៊ីផ្សេងទៀត។ សមយុទ្ធកូបា្រដើរតួនាទីសំខាន់នៅក្នុងយុទ្ធសាស្រ្តយោធារបស់អាមេរិកដែលចង់យកអាស៊ីប៉ាស៊ីហ្វិក ធ្វើជាទីតាំងរបស់ខ្លួន ទប់ទល់នឹងការពង្រីកអំណាចឥទ្ធិពលរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ