អាមេរិកលបស្តាប់ទូរស័ព្ទរបស់នាយករដ្ឋមន្ត្រីអ៊ីស្រាអែល
ភ្នាក់ងារស៊ើបការណ៍សម្ងាត់របស់សហរដ្ឋអាមេរិក បានលបស្តាប់ខ្សែទូរស័ព្ទរបស់លោក បេនយ៉ាមីន ណេតាន់យ៉ាហ៊ូ នាយករដ្ឋមន្ត្រីអ៊ីស្រាអែល។ នេះបើតាមការចុះផ្សាយរបស់កាសែត Wall Street Journal ដែលបានចុះផ្សាយកាលពីថ្ងៃអង្គារ ទី២៩ ធ្នូ។ អ្នកនាំពាក្យរដ្ឋាភិបាលអាមេរិក មិនបានបដិសេធព័ត៌មាននេះទេ ដោយអះអាងថា វាមានហេតុផលជាច្រើន នៅពីក្រោយការលបស្តាប់នេះ បើទោះណាជាកន្លងមកលោក បារ៉ាក់ អូបាម៉ា បានសន្យាថានឹងកាត់បន្ថយ ការលបស្តាប់ ខ្សែទូរស័ព្ទរបស់មេដឹកនាំប្រទេសជាមិត្តក៏ដោយ។
ចុះផ្សាយនៅថ្ងៃ៖
ស្តាប់ - ០២:២៥
ឆ្លើយនឹងសំណួរសុំការបំភ្លឺរបស់ភ្នាក់ងារព័ត៌មានបារាំង AFP អ្នកនាំពាក្យសេតវិមាន បានបញ្ជាក់ថា ការចុះផ្សាយរបស់កាសែត Wall Street Journal គឺវាជារឿងពិត គឺថាភ្នាក់ងារស៊ើបការណ៍អាមេរិក ពិតជាបាន និងកំពុងបន្តលបស្តាប់ខ្សែទូរស័ព្ទរបស់លោកណេតាន់យ៉ាហ៊ូ នាយករដ្ឋមន្ត្រីអ៊ីស្រាអែល ប្រកដមែន។ អ្នកនាំពាក្យដដែលបញ្ជាក់ថា ការលបស្តាប់តាមខ្សែទូរស័ព្ទនេះ គឺសហរដ្ឋអាមេរិក អាចធ្វើទៅលើជនបរទេសបាន ដោយសំអាងលើផលប្រយោជន៍ជាតិជាពិសេស ហើយដែលវាជាប់ទាក់ទងនឹងសន្តិសុខជាតិ។ ក្នុងករណីដែល រដ្ឋាភិបាលយល់ថាវាចាំបាច់ សកម្មភាពស៊ើបការណ៍នេះ ត្រូវធ្វើទៅលើ មិនថាថ្នាក់ដឹកនាំទេ សូម្បីប្រជាជនសាមញ្ញក៏ធ្វើដែរ។
យើងនៅចាំ រឿងអាស្រូវដែលបានធ្លាយចេញ កាលពី២ឆ្នាំមុន ស្តីពីសកម្មភាពស៊ើបការណ៍សំងាត់ ដ៏ទូលំទូលាយរបស់ក្រុមស៊ើបការណ៍អាមេរិក ដែលបានធ្វើទៅលើមេដឹកនាំតាមបណ្តាប្រទេសនានា មិនថាប្រទេសជាសត្រូវ រឺជាសម្ព័ន្ធមិត្តរបស់អាមេរិកទេ។ រាប់ទាំងលោកស្រីអង់ហ្គេឡា មែគែល ប្រមុខរដ្ឋាភិបាលអាល្លឺម៉ង់ លោកហ្រ្វង់ស័រ ហូឡង់ ប្រធានាធិបតីបារាំង និងលោកនាយករដ្ឋមន្រី្តជប៉ុនជាដើម។
ក្រោយរឿងអាស្រូវនេះ លោកអូបាម៉ា បានសន្យាថានឹងកាត់បន្ថយ ការលបស៊ើបការណ៍សំងាត់គ្នាឯងបែបនេះ។ កាត់បន្ថយ តែមិនមែនមានន័យថាឈប់ធ្វើទាំងស្រុងនោះទេ។ ជាការពិត លោកអូបាម៉ា មិនបានបញ្ជា ឲ្យកាត់ផ្តាច់ រឺបញ្ឈប់ការលបស្តាប់ទេ តែលោកបានបញ្ជាថា ការលបស្តាប់មេដឹកនាំអន្តរជាតិធំៗ គឺមិនត្រូវធ្វើវាជាលក្ខណៈស្វ័យប្រវត្តិទៀតទេ។ ប៉ុន្តែសម្រាប់មេដឹកនាំមួយចំនួន ដូចជាក្នុងករណី លោកនាយករដ្ឋមន្ត្រីអ៊ីស្រាអែល និងលោកប្រធានាធិបតីតួកគី គឺវាមានហេតុផលសន្តិសុខ ដែលអាមេរិកត្រូវតែប្រុងប្រយ័ត្ន។ ដូច្នេះ ការស៊ើបការណ៍ត្រូវតែបន្តធ្វើ។ នេះបើតាមការចុះផ្សាយរបស់កាសែត Wall Street Journal។
រដ្ឋាភិបាលអាមេរិក បានសារភាពថា ប្រព័ន្ធលបស្តាប់ដែលបានភ្ជាប់ឡើង ដើម្បីស៊ើបការណ៍ នៅតាមបរទេស គឺជាប្រព័ន្ធដែលមានលក្ខណៈស្មុគស្មាញណាស់ ហើយមានការលំបាកណាស់ ទម្រាំអាចដាក់ឲ្យវាដំណើរការបាន។ ដូច្នេះបើបិទផ្តាច់វាទាំងស្រុង គេមិនងាយបើកវាវិញ ដោយស្រួលៗនោះទេ។
ចំណែកខាងខុទ្ទកាល័យនាយករដ្ឋមន្ត្រីអ៊ីស្រាអែល មិនបានធ្វើអត្ថាធិប្បាយអ្វីទាំងអស់ ជុំវិញបញ្ហានេះ។ យ៉ាងណាក៏ដោយ គេមិនជឿថា អ៊ីស្រាអែលមិនដឹងថា អាមេរិកលបស្តាប់ទូរស័ព្ទរបស់នាយករដ្ឋមន្ត្រីខ្លួននោះទេ។ កាសែត Wall Street Journal ក៏ធ្លាប់បានចុះផ្សាយផងដែរថា ភ្នាក់ងារស៊ើបការណ៍សំងាត់អ៊ីស្រាអែល បានបង្កើតប្រព័ន្ធលបស្តាប់ការចរចាស្វែងរកកិច្ចព្រមព្រៀងនុយក្លេអ៊ែរអ៊ីរ៉ង់ កាលពីពាក់កណ្តាលឆ្នាំនេះ។ អ៊ីស្រាអែលបានបដិសេធការចុះផ្សាយនេះ ថាជារឿងមិនពិត។ យ៉ាងណាក៏ដោយ បើយើងក្រលេកមើលទៅលើ បច្ចេកវិទ្យាជាន់ខ្ពស់ របស់វិស័យការពារជាតិអ៊ីស្រាអែល គេពិបាកនឹងជឿណាស់ ថាអ៊ីស្រាអែល មិនលបស្តាប់ការណ៍សំងាត់ របស់អាមេរិក រឺក៏របស់បរទេសផ្សេង វិញនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ