មូលនិធិរូបិយវត្ថុអន្តរជាតិFMI ប្រមាណថាកំណើនសេដ្ឋកិច្ចពិភពលោកនៅឆ្នាំ២០១១នឹងមានអត្រាខ្ពស់ជាងការគ្រោងទុក
នៅថ្ងៃអង្គារទី២៥មករានេះ មូលនិធិរូបិយវត្ថុអន្តរជាតិFMI បានប្រកាសឲ្យដឹងថាកំណើនសេដ្ឋកិច្ចពិភពលោកនៅឆ្នាំ២០១១អាចមានអត្រា កើនឡើងខ្ពស់ជាងការគ្រោងទុក។ ទាំងនេះក៏ដោយសារតែកំណើនសេដ្ឋកិច្ចអាមេរិកាំងនៅឆ្នាំ២០១១អាចមាន អត្រាកើនឡើងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
បើយោងតាមការប្រកាសឲ្យដឹងនៅថ្ងៃអង្គារទី២៥មករានេះ ដោយមូលនិធិរូបិយវត្ថុអន្តរជាតិFMIស្ដីពី” ទស្សនវិស័យនៃសេដ្ឋកិច្ចពិភពលោក” បានឲ្យដឹងថា កំណើនសេដ្ឋកិច្ចពិភពលោកនៅឆ្នាំ២០១១អាចមានអត្រាកើនឡើងដល់ទៅ៤,៤%ទល់នឹង៤,២%ដែលបានប្រមាណទុកកាលពីខែតុលាកន្លងទៅ។
អត្រានៃកំណើនសេដ្ឋកិច្ចពិភពលោកនៅឆ្នាំ២០១១ស្ទុះឡើងខ្លាំងក៏ដោយសារតែកំណើននៃសេដ្ឋកិច្ចអាមេរិកាំងនៅឆ្នាំ២០១១ដែលជាមហាអំណាចសេដ្ឋកិច្ចទីមួយពិភពលោកអាចមានអត្រាកើនឡើងដល់៣%ទល់នឹង២,៣%ដែលបានគ្រោងទុកពីពេលមុន។ មូលនិធិរូបិយវត្ថុអន្តរជាតិFMIបានថ្លែងពន្យល់ថា ទាំងនេះក៏ដោយសារតែមានសេចក្តីសម្រេចចិត្តរបស់ទីក្រុងវ៉ាស៊ីនតោនដែលបានយល់ព្រមបន្តនយោបាយកាត់បន្ថយពន្ធដារដែលបានសម្រេចនៅឆ្នាំ២០០១និងនៅឆ្នាំ២០០៣ដែលបានហុចចេញជាផ្លែផ្កាដ៏វិជ្ជមានពោលគឺជួយដំឡើងបាន០,៥%ដល់អត្រានៃកំណើនសេដ្ឋកិច្ចអាមេរិកាំងនៅឆ្នាំ២០១១។
សម្រាប់តំបន់អឺរ៉ូវិញ ការប្រមាណរបស់មូលនិធិរូបិយវត្ថុអន្តរជាតិFMIពុំមានការប្តូរប្រែអ្វីឡើយ គឺកំណើនសេដ្ឋកិច្ចអាចមាន១,៥%។ ដូចគ្នាអ៊ីចឹងដែរសម្រាប់ប្រទេសបារាំងដែលកំណើនសេដ្ឋកិច្ចអាចឋិតនៅប្រមាណ១,៦%ទល់នឹង២,២%សម្រាប់ប្រទេសអាល្លឺម៉ង់។ បើយោងតាមការវិភាគរបស់មូលនិធិរូបិយវត្ថុអន្តរជាតិFMI វិបត្តិប្រាក់បំណុលដ៏សែនធ្ងន់ធ្ងរនៃតំបន់អឺរ៉ូគឺពិតជាឧបស័គ្គមួយដ៏ធំមកខាឃាំងសន្ទុះកំណើនសេដ្ឋកិច្ចអឺរ៉ុប។
មូលនិធិរូបិយវត្ថុអន្តរជាតិFMIបានគូសបញ្ជាក់ទៀតថា សន្ទុះខ្លាំងបង្គួរនៃកំណើនសេដ្ឋកិច្ចពិភពលោកបច្ចុប្បន្ននៅតែបន្តឲ្យកើតមាន” សន្ទុះកំណើនសេដ្ឋកិច្ចពិភពលោកពីរខុសគ្នា” ។
គួរកត់សម្គាល់ថា សម្រាប់ប្រទេសកំពុងអភិវឌ្ឍន៍ដែលមានការរីកចម្រើនខ្លាំងដូចជាប្រទេសចិនអាចមានកំណើនសេដ្ឋកិច្ចដល់ទៅ៩,៦%នៅឆ្នាំ២០១១ទល់នឹង៨,៤%សម្រាប់ប្រទេសឥណ្ឌា។
ហើយដើម្បីឲ្យកំណើនសេដ្ឋកិច្ចពិភពលោកមានស្ថិរភាព មូលនិធិរូបិយវត្ថុអន្តរជាតិFMIបានស្នើឲ្យទីក្រុងប៉េកាំងធ្វើការដំឡើងថ្លៃប្រាក់យ័នរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ