លោកបារ៉ាក់អូបាម៉ា រិះគន់លោកនេតាន់យ៉ាហ៊ូដោយចំហ
ការបោះឆ្នោតសភានៅអ៊ីស្រាអែល ទើបតែបានបញ្ចប់ទៅ ដោយជ័យជំនះ ត្រូវបានទៅលើ គណបក្សរបស់លោក នេតាន់យ៉ាហ៊ូ នាយករដ្ឋមន្រ្តីបច្ចុប្បន្ន របស់អ៊ីស្រាអែល។ នេះជាជ័យជំនះ ដ៏គួរឲ្យភ្ញាក់ផ្អើលបំផុត ដែលសហរដ្ឋអាមេរិក បានសំដែងការខកចិត្តជាខ្លាំង។ ប៉ុន្មានថ្ងៃចុងក្រោយនេះ សម្តីរិះគន់មានកាន់តែខ្លាំង ទៅលើលោក នេតាន់យ៉ាហ៊ូ ពីសំណាក់ថ្នាក់ដឹកនាំអាមេរិក ជាពិសេស លោកបារ៉ាក់អូបាម៉ាតែម្តង ដោយបាននិយាយរិះគន់ចំៗ ទៅលើសកម្មភាពមិនសមគួរ មួយចំនួន របស់លោកនេតាន់យ៉ាហ៊ូ មុនពេលបោះឆ្នោត ដែលបង្ហាញពីទឹកចិត្ត ស្អប់ខ្ពើមជនជាតិអារ៉ាប់ប៉ាឡេស្ទីន របស់លោក នេតាន់យ៉ាហ៊ូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
គ្មាននរណាម្នាក់ មិនសំដែងការភ្ញាក់ផ្អើលនោះទេ ជុំវិញជ័យជំនះ របស់លោកនេតាន់យ៉ាហ៊ូ ក្នុងពេលបោះឆ្នោតសភាអ៊ីស្រាអែល កន្លងទៅនេះ។ ព្រោះថារហូតដល់នាទីចុងក្រោយ មុនការបោះឆ្នោត ការស្ទាប់ស្ទង់មតិទូទៅ បានបង្ហាញថា លោក នេតាន់យ៉ាហ៊ូ ប្រាកដជាមិនបានសម្លេងឆ្នោត ច្រើនជាងគេទេ។ ប៉ុន្តែទោះបីជាយ៉ាងណា នេះជាការសម្រេចចិត្ត របស់ប្រជាជាតិអ៊ីស្រាអែលទាំងមូល។
សហរដ្ឋអេមេរិក ដែលកន្លងមក ជាមិត្តចាក់ទឹកមិនលិចជាមួយអ៊ីស្រាអែល ប៉ុន្តែពេលនេះ ហាក់ក្លាយជាអ្នកទីមួយ ដែលហ៊ានរិះគន់ដោយចំហ ទៅលើលោក នេតាន់ យ៉ាហ៊ូ។ រដ្ឋាភិបាលរបស់លោក ប៉ារ៉ាក់ អូបាម៉ា មិនចុះសម្រុងនឹងគោលជំហនយោបាយ របស់លោក នេតាន់ យ៉ាហ៊ូ ទាក់ទិនទៅនឹង បញ្ហាសន្តិសុខ តំបន់ដើមបូព៌ា និងការបញ្ចប់ជម្លោះ រវាង អ៊ីស្រាអែល-ប៉ាឡេស្ទីន។
ថ្លែងក្នុងបទសម្ភាសន៍ ជាមួយទូរទស្សន៍ កាលពីថ្ងៃសុក្រ លោក បារ៉ាក់ អូបាម៉ា បាននិយាយរិះគន់ចំៗ ពីសកម្មភាពរបស់លោក នេតាន់យ៉ាហ៊ូ ក្នុងថ្ងៃបោះឆ្នោត នៅអ៊ីស្រាអែល។ លោក នេតាន់យ៉ាហ៊ូ បានធ្វើវីដេអូមួយ ដាក់នៅលើទំព័រហ្វេសប៊ុក របស់លោកនៅថ្ងៃនោះដែលមានខ្លឹមសារថា អំណាចរបស់ក្រុមស្តាំនិយមកំពុងតែជួបគ្រោះថ្នាក់ហើយ ព្រោះថា មានប្រជាជនអារ៉ាប់អ៊ីស្រាអែល ទៅបោះឆ្នោតច្រើនណាស់។
សម្តីបែបនេះ របស់លោក នេតាន់យ៉ាហ៊ូ ត្រូវបានលោក បារ៉ាក់អូបាម៉ា ចាត់ទុកថា ជាការឆ្គាំឆ្គងខ្លាំងណាស់ ក្នុងនាមអ៊ីស្រាអែល ជាប្រទេសដែលមានរបបប្រជាធិបតេយ្យសេរី។ ពាក្យថាប្រជាធិបតេយ្យ មានន័យថា ប្រជាជនគ្រប់ពូជសាសន៍ មានសិទ្ធិស្មើគ្នា លើឆាកនយោបាយ ក្នុងការបញ្ចេញមតិរបស់ខ្លួន។ ពាក្យសម្តីរបស់លោកនេតាន់យ៉ាហ៊ូ បង្ហាញយ៉ាងច្បាស់ ថាលោក ស្អប់ខ្ពើមជនជាតិអ៊ីស្រាអែល ដែលមិនមែនកាន់សាសនាជ្វីហ្វ។
ចំណុចសំខាន់ដែលរដ្ឋាភិបាលអាមេរិក មិនពេញចិត្តលោក នេតាន់យ៉ាហ៊ូ គឺអត្តចរិកសួនតួនិយម គិតតែពីប្រយោជន៍ផ្ទាល់ខ្លួន របស់ជនជាតិជ្វីហ្វ ជ្រុលហួសហេតុពេក។ លោក នេតាន់យ៉ាហ៊ូ បានប្រើប្រាស់នយោបាយជាតិនិយមជ្រុល ការពារតែជនជាតិជ្វីហ្វ មិនខ្វល់ពីជាតិសាសន៍ដ៏ទៃ ដូចជាជនជាតិអារ៉ាប់ ប៉ាឡេស្ទីនជាដើម។ អ្នកនាំពាក្យសេតវិមានម្នាក់ ធ្លាប់បានបញ្ជាក់ថា ដរាបណាមាន នេតាន់យ៉ាហ៊ូ អ៊ីស្រាអែល មិនអនុញ្ញាតិឲ្យមានរដ្ឋប៉ាឡេស្ទីន ពេញអធិបតេយ្យឡើយ។ រដ្ឋាភិបាលអាមេរិក បានរិះគន់ថា លោក នេតាន់យ៉ាហ៊ូ មានចេតនា អូសបន្លាយបញ្ហា ជាមួយប៉ាឡេស្ទីន ធ្វើយ៉ាងណា មិនឲ្យប៉ាឡេស្ទីន ងើបមុខរួច ជាដាច់ខាត។ នយោបាយបែបនេះ ជាគ្រោះថ្នាក់ធំណាស់ ដល់ស្ថេរភាពតំបន់ដើមបូព៌ា ព្រោះវានឹងធ្វើឲ្យ អ្នកកាន់សាសនាអ៊ីស្លាម មានកំហឹងកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ