ការបោះឆ្នោតបេក្ខជនប្រធានាធិបតីអាមេរិក ៖ លោកស្រីហ៊ីលឡារី គ្លីនតុន កំពុងក្លាយជាបេក្ខជនប្រធានាធិបតីជាស្ថាពរ
រដ្ឋPennsylvanie, Maryland, Delaware, Connecticut និងRhode Island បានរៀបចំការបោះឆ្នោតជ្រើសរើសបេក្ខជន ប្រធានាធិបតី នៅថ្ងៃអង្គារម្សិលមិញ។ ខាងបក្សសាធារណរដ្ឋ លោក ដូណាល់ ត្រាំ ឈ្នះទាំងអស់។ ឯនៅខាងបក្សប្រជាធិបតេយ្យវិញ លោកស្រី គ្លីនតុន ក៏ឈ្នះដាច់ លោក បែរនី សិនដឺ ជាគូប្រជែងដែរ ដោយដណ្តើមបានបួនរដ្ឋ។ ថ្វីបើពេលនេះ ដំណើរការបោះឆ្នោតបេក្ខជនប្រធានាធិបតីមិនទាន់ចប់មែន ប៉ុន្តែគេសឹងអាចកំណត់បានថានរណាជាបេក្ខជនប្រធានាធិបតី សម្រាប់ការបោះឆ្នោតប្រធានាធិបតីអាមេរិក ថ្ងៃទី ៨ វិច្ឆិកា ២០១៦បានហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ជាគម្លាតដែលទំនងជាមិនអាចស្តារបានឡើយ សម្រាប់លោក សិនដឺ នៃបក្សប្រជាធិបតេយ្យ ! លោកស្រី គ្លីនតុន បានឈ្នះដាច់ និងដណ្តើមបានការគាំទ្រពីស្ទើរគ្រប់រដ្ឋសំខាន់ៗ និងប្រមូលបានសំឡេងជិតគ្រប់គ្រាន់សម្រាប់ក្លាយជាបេក្ខជនប្រធានាធិបតីបក្សប្រជាធិបតេយ្យដោយស្វ័យប្រវត្តិហើយ !
នៅក្នុងសុន្ទរកថា យប់មិញ លោកស្រីបានផ្តើមវាយប្រហារដោយផ្ទាល់លោក ដូណាល់ ត្រាំ នៃបក្សសាធារណរដ្ឋ ដែលនេះជាសញ្ញាមួយបញ្ជាក់ថា លោកស្រីបោះជំហានចូលដំណាក់កាលថ្មីមួយទៀតនៃការឃោសនាបោះឆ្នោត។ លោកស្រី ហ៊ីលឡារី គ្លីនតុន ក៏បានអំពាវនាវជាថ្មី ឱ្យបក្សប្រជាធិបតេយ្យរួបរួមគ្នា។ តែលោក សិនដឺ ជាគូប្រជែងក្នុងបក្សមិនបានធ្វើឮឡើយ។ លោកបានចេញបន្តឃោសនានៅរដ្ឋផ្សេងៗទៀត ដែលនឹងត្រូវធ្វើការបោះឆ្នោតបេក្ខជនប្រធានាធិបតីនៅខែឧសភា ដោយអះអាងថានឹងតស៊ូរហូតដល់នាទីចុងក្រោយ។
នៅខាងបក្សសាធារណរដ្ឋវិញ លោកដូណាល់ ត្រាំ កំពុងមានមោទនភាពយ៉ាងខ្លាំងនឹងជ័យជំនះដ៏ត្រចះត្រចង់នៅយប់មិញ ដែលអនុញ្ញាតឱ្យលោកនាំមុខខ្លាំងគូប្រជែងទាំងពីររបស់បក្ស។ ថ្វីបើមិនទាន់ប្រមូលសំឡេងគ្រប់គ្រាន់សម្រាប់ក្លាយជាបេក្ខជនប្រធានាធិបតីមែន ប៉ុន្តែគ្មានគូប្រជែងណាម្នាក់ ឬសម្ព័ន្ធគូប្រជែងណា អាចធ្វើឱ្យលោក ដូណាល់ ត្រាំ ព្រួយបារម្ភឡើយ។
នៅមានរដ្ឋចំនួន១៥ទៀត ត្រូវរៀបចំការបោះឆ្នោតជ្រើសរើសបេក្ខជនប្រធានាធិបតី នៅរវាងខែឧសភា និងមិថុនា។ ដូច្នេះ លោក ដូណាល់ ត្រាំ នៅពេល និងនៅមានលទ្ធភាពអាចប្រមូលការគាំទ្របាន ដើម្បីក្លាយជាបេក្ខជនប្រធានាធិបតីបាន។ ប៉ុន្តែគូប្រជែងក្នុងបក្សកំពុងប្រឹងធ្វើគ្រប់យ៉ាងដើម្បីផ្ចាញ់។ យុទ្ធនាការបោះឆ្នោតក្នុងបក្សសាធារណរដ្ឋ ត្រូវបន្តតានតឹងខ្លាំងដដែលនៅសប្តាហ៍ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ