ជម្លោះអ៊ីស្រាអែល-ប៉ាឡេស្ទីន ៖ លោកអូបាម៉ា នឹងមានគំនិតផ្តួចផ្តើមថ្មីជាចុងក្រោយ ?
ជម្លោះរ៉ាំរ៉ៃរវាងអ៊ីស្រាអែលនិងប៉ាឡេស្ទីន គឺជាសំណុំរឿងអាទិភាពមួយរបស់លោកបារ៉ាក់ អូបាម៉ា នៅពេលបានឡើងកាន់អំណាចជាប្រធានាធិបតីអាមេរិកភ្លាម។ នៅពេលនេះ ពេលត្រូវចប់អាណត្តិ ចាកចេញពីសេតវិមាន តើលោកអូបាម៉ា មានគំនិតផ្តួចផ្តើមអ្វីជាចុងក្រោយ យ៉ាងហោចជានិម្មិតរូប សម្រាប់ផ្តល់សន្ទុះឡើងវិញ ដល់ដំណើរការចរចាស្វែងរកសន្តិភាពឱ្យអ៊ីស្រាអែលនិងប៉ាឡេស្ទីនទេ ? លោកអូបាម៉ា ត្រូវជួបពិភាក្សាជាមួយនាយករដ្ឋមន្ត្រីអ៊ីស្រាអែល នេតាន់យ៉ាហ៊ូ នៅថ្ងៃនេះ នៅអង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០២:០០
សេតវិមានមិនបដិសេធគំនិតផ្តួចផ្តើមចង់នាំអ៊ីស្រាអែលនិងប៉ាឡេស្ទីនចូលចរចាសន្តិភាពវិញទេ ប៉ុន្តែនៅប្រុងប្រយ័ត្នខ្លាំង។ កម្មវត្ថុរបស់អាមេរិកពេលនេះ មិនមែនជាការសាកល្បងភ្ជាប់ទូត ចាប់ប្រមុខដឹកនាំអ៊ីស្រាអែល និងប៉ាឡេស្ទីនឱ្យមកអង្គុយចរចាគ្នាវិញបានភ្លាមភ្លែតទេ។ គម្លាតមានខ្លាំង ហើយការមិនទុកចិត្តគ្នាមានកំរិតខ្ពស់ណាស់នៅពេលនេះ។
អាមេរិករបស់លោកអូបាម៉ា មិនរំពឹងថាការចរចាអាចចាប់ផ្តើមជាថ្មីឡើយ តែអាមេរិកចង់បញ្ជាក់ឱ្យច្បាស់ និងដោយក្តែងៗ អំពីកត្តានៃការដោះស្រាយជម្លោះនិងដំណោះស្រាយសម្រាប់រដ្ឋពីរ។ នេះមានន័យថា លោកអូបាម៉ា ចង់បន្សល់ទុកនូវស្លាកស្នាមខ្លះ លើសំណុំរឿងដែលលោកមានជំនាក់ចិត្តខ្លាំងចង់ដោះស្រាយ តែមិនប្រកាសជំហរខ្លាំងដែលអាចធ្វើឱ្យបេក្ខជនប្រធានាធិបតីបក្សប្រជាធិបតីរងបន្ទុកឡើយ។
នៅថ្ងៃទី ២២ មករា ២០០៩ ពីរថ្ងៃក្រោយបានស្បថចូលកាន់តំណែង ប្រធានាធិបតីវ័យក្មេងអូបាម៉ា បានតែងតាំងឥស្សរជនម្នាក់ ជាអន្តរការីពិសេស ទទួលបន្ទុកស្វែងរកសន្តិភាពឱ្យតំបន់ដើមបូព៌ា ជានិរន្តមួយ។ ៨ឆ្នាំក្រោយ គ្មានលទ្ធផល ! ជម្លោះអ៊ីស្រាអែលនិងប៉ាឡេស្ទីន ត្រូវមូរទុកម្តុំ ក្នុងផ្ទៃនៃភាពស្ងប់ស្ងាត់ការទូត តែអំពើហិង្សានៅបន្តកើតមានឥតដាច់លើដែនដីប៉ាឡេស្ទីន និងហ្សេរ៉ុយសាឡិម។ កិច្ចខិតខំប្រឹងប្រែងចុងក្រោយ ដែលស្ថិតក្រោមបន្ទុកលោកចនឃែរី ត្រូវបានងាប់ស្តូកស្តឹង តាំងពីខែមេសាឆ្នាំ២០១៤ និងបានរុញច្រានទំនាក់ទំនងរវាងលោកអូបាម៉ា និងលោកនេតាន់យ៉ាហ៊ូ នាយករដ្ឋមន្ត្រីអ៊ីស្រាអែល ឱ្យអាប់អួរអាក្រក់ក្រៃ។
ប៉ុន្តែនៅថ្ងៃពុធនេះ លោកអូបាម៉ា ត្រូវទទួលជួបលោកនេតាន់យ៉ាហ៊ូ នៅទីក្រុងញូវយ៉ក នៅក្រៅក្របខ័ណ្ឌនៃមហាសន្និបាតអង្គការសហប្រជាជាតិ ដោយសង្ឃឹមថា នឹងអាចល្បួងចិត្តអ៊ីស្រាអែលឱ្យលង់នឹងការព្រមព្រៀងបានខ្លះ ព្រោះថ្មីៗនេះអាមេរិកទើបព្រមព្រៀងផ្តល់ជំនួយយោធា ចំនួន៣៨ពាន់លានដុល្លារដល់អ៊ីស្រាអែលសម្រាប់រយៈពេល១០ឆ្នាំ។ ជំនួយដែលបញ្ជាក់ថាអាមេរិកជានិច្ចជាកាលគិតគូរឥតងាករេអំពីសុវត្ថិភាពនិងសន្តិសុខរបស់អ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ