លោកណេតាន់យ៉ាហ៊ូ លុបចោល ការណាត់ជួបជាមួយ លោកអូបាម៉ា
នាយករដ្ឋមន្ត្រីអ៊ីស្រាអ៊ែល លោក ណេតាន់យ៉ាហ៊ូ សម្រេចលុបចោលការណាត់ជួបជាផ្លូវការ ជាមួយលោក អូបាម៉ា នៅទីក្រុងវ៉ាស៊ីនតោន ដែលគេគ្រោងប្រព្រឹត្តទៅនៅថ្ងៃទី ១៨ មីនា ឆ្នាំ ២០១៦ ខាងមុខនេះ។ ទីក្រុង យេរូសាឡីម បានឲ្យដឹងថា លោក ណេតាន់យ៉ាហ៊ូ សម្រេចចិត្តដូច្នេះអគឺដោយហេតុថារូបលោកមិនចង់ចេញមុខ និង ចូលឡូកឡំ ជាមួយនិងដំណើការបោះឆ្នោតនៅអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
កាលពីថ្ងៃច័ន្ទម្សិលម៉ិញនេះ សេតវិមាន ទីក្រុងវ៉ាស៊ីនតោន បានឲ្យដឹងថា លោក ណេតាន់យ៉ាហ៊ូ បានសម្រេចច្រានចោល ការចូលជួបជាផ្លូវការ ជាមួយនិងលោកប្រធានាធិបតីអាមេរិក អូបាម៉ា ដែលគ្រោងធ្វើទៅនៅថ្ងៃទី ១៨ ខែមីនា ខាងមុខនេះ។ ការលុបចោលនេះ គឺធ្វើឡើង មិនបានមួយថ្ងៃផង នៅមុនដំណើរទស្សនកិច្ចជាផ្លូវរដ្ឋ របស់អនុប្រធានាធិបតីអាមេរិក លោក ចូ បាយដិន ទៅកាន់ប្រទេសអ៊ីស្រាអ៊ែល និងប៉ាឡេស្ទីន។
លោក ណេតាន់យ៉ាហ៊ូ សម្រេចចិត្តលុបចោលដំណើរទស្សនកិច្ចជាផ្លូវការ របស់លោក ទៅកាន់ទីក្រុងវ៉ាស៊ីនតោន ដែលអ៊ីស្រាអ៊ែលខ្លួនឯង បានស្នើសុំកាលពីពីរសប្តាហ៍កន្លងទៅ។ លោកបានពន្យល់ថា រូបលោក មិនចង់ចេញមុខ នៅក្នុងខណៈពេលដែលយុទ្ធនាការ បោះឆ្នោត ជ្រើសរើសបេក្ខជនប្រធានាធិបតីអាមេរិក កំពុងតែប្រព្រឹត្តទៅ ប្រកបដោយភាព ក្តៅគគុក នោះទេ។ នេះ បើយោងតាមការិយាល័យផ្ទាល់របស់លោក ណេតាន់យ៉ាហ៊ូ។
ចំណែកឯភាគីអាមេរិកវិញ បានសម្តែងការភ្ញាក់ផ្អើល និង សោកស្តាយ ទៅលើទង្វើនេះ ដែលនឹង បង្កភាពល្អក់កករសាជាថ្មី នៅក្នុងទំនាក់ទំនងទ្វេភាគី រវាងរដ្ឋាភិបាលអាមេរិក និង អ៊ីស្រាអ៊ែល ដែលហាក់ មានភាពធូរស្រាលវិញបន្តិចទៅហើយ នៅក្នុងអំឡុងពេល ប៉ុន្មានខែចុងក្រោយនេះ។ ដូចដែលយើងដឹងស្រាប់ហើយថា ទំនាក់ទំនងរវាង លោក ណេតាន់យ៉ាហ៊ូ និង លោក អូបាម៉ា តែងតែមានភាពតានតឹង តាំងពីដើមមក ដែលភាពតានតឹងនេះ ផ្តើមចេញពីសំណុំរឿង នុយក្លេអ៊ែរ របស់ប្រទេសអ៊ីរ៉ង់។
សូមរំលឹកថា កាលពីឆ្នាំ២០១០ លោកអនុប្រធានាធិបតីអាមេរិក ចូ បាយដិន ធ្លាប់បានធ្វើដំណើរទស្សនកិច្ចជាផ្លូវការទៅកាន់ប្រទេសអ៊ីស្រាអ៊ែល ម្តងរួចមកហើយ។ ប៉ុន្តែ ដំណើរទស្សនកិច្ចនេះ បានជាប់ដិតដាមទៅដោយភាពអវិជ្ជមាន ព្រោះថាពេលនោះ រដ្ឋាភិបាលអ៊ីស្រាអ៊ែល បានរាំងស្ទះគម្រោងសាងសង់លំនៅឋាន នៅក្នុងភាគខាងកើតនៃទីក្រុង យ៉េរូសាឡឹម ដែលពីមុនធ្លាប់ជាទឹកដី របស់ប៉ាឡេស្ទីន ហើយដែលអ៊ីស្រាអ៊ែល កាន់កាប់រហូតមកទល់បច្ចុប្បន្ន។
សូមបញ្ជាក់ទៀតដែរថា ដំណើរទស្សនកិច្ច ដែលត្រូវគេច្រានចោលនេះ គឺធ្វើឡើងនៅចំពេល សន្និសីទប្រចាំឆ្នាំ របស់ក្រុមអ្នកគាំទ្រអ៊ីស្រាអ៊ែល ដែលប្រព្រឹត្តទៅ នៅក្នុងសហរដ្ឋអាមេរិក។ រីឯ លោក ណេតាន់យ៉ាហ៊ូ ខ្លួងឯង ក៏ធ្លាប់បានមានវត្តមាន នៅក្នុងសន្និសីទនេះ កាលពីអតីតកាលផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ