អាស្រាហ្វ ហ្កានីលើកសរសើរគុណូបការៈទ័ពអាមេរិក នៅអាហ្វហ្កានីស្ថាន
នៅអាហ្វហ្កានីស្ថាន ជនប្រដាប់អាវុធមួយក្រុមបានបាញ់សម្លាប់អ្នកដំណើរ ចំនួន ១៣នាក់ ក្នុងរថយន្តក្រុងមួយ ក្បែរក្រុងកាប៊ូល នៅថ្ងៃអង្គារទី ២៤ មីនា។ អំពើភេរវកម្មសម្លាប់ប្រជាជនស៊ីវិល កើតឡើង នៅចំពេលដែលប្រធានាធិបតី អាហ្វហ្កានីស្ថាន លោកអាស្រាហ្វ ហ្កានី កំពុងបំពេញទស្សនកិច្ច ផ្លូវរដ្ឋជាលើកទីមួយ នៅអាមេរិក។ លោកហ្កានីត្រូវគេរំពឹងថា នឹងជួបពិភាក្សាជាមួយលោកប្រធានាធិបតីអាមេរិក បារ៉ាក់ អូបាម៉ា អំពីវត្តមានទ័ពអាមេរិកនៅអាហ្វហ្កានីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៥៣
ទស្សនកិច្ចរបស់ប្រមុខរដ្ឋអាហ្វហ្កានីស្ថាន នៅទឹកដីអាមេរិកបានបើកទំព័រថ្មី ក្នុងទំនាក់ទំនងអាមេរិក និងអាហ្វហ្កានីស្ថាន ដែលធ្លាប់ចុះល្អក់កករ ក្នុងអាណត្តិប្រធានាធិបតីលោក អាមីត កាហ្សៃ។ វាក៏ជាទស្សនកិច្ចយុទ្ធសាស្រ្តរបស់រដ្ឋាភិបាលអាហ្វហ្កានីស្ថានដែរ។ គេជឿថា លោកអាស្រាហ្វ ហ្កានី ទៅអាមេរិក ដើម្បីនិយាយបញ្ចុះបញ្ចូលឲ្យភាគី អាមេរិក បន្ថយល្បឿនក្នុងការកាត់បន្ថយចំនួនទ័ពអាមេរិក នៅអាហ្វហ្កានីស្ថាន នៅក្រោយ ឆ្នាំ ២០១៦។
កាលពីខែមិថុនា ឆ្នាំមុន នៅក្នុងកិច្ចព្រមព្រៀងចុះ ជាមួយប្រធានាធិបតីថ្មីរបស់អាហ្វហ្កានីស្ថាន លោកបារ៉ាក់ អូបាម៉ា បានប្រកាសរក្សាចំនួន ទ័ព មួយម៉ឺននាក់ ឲ្យនៅបន្តឈរជើង នៅអាហ្វហ្កានីស្ថាន តទៅទៀត រហូតដល់ឆ្នាំ ២០១៦ ពោលគឺនៅក្រោយ ទ័ព បរទេសត្រូវដកចេញឲ្យអស់ពីអាហ្វហ្កានីស្ថាន នៅចុងឆ្នាំ ២០១៤។
នៅខែធ្នូ ឆ្នាំ ២០១៤ ទ័ពបរទេសទាំងអស់របស់អង្គការអូតង់ ប្រមាណ ជាង ១សែន ៣ពាន់ ៥ពាន់នាក់ (មានទ័ពអាមេរិកប្រមាណ ១សែននាក់) ដែលបានអន្តរាគមយោធា ប្រយុទ្ធប្រឆាំងនឹងពួកតាលីបង់ នៅអាហ្វហ្កានីស្ថាន ១៣ឆ្នាំ មកហើយនោះ បានបញ្ចប់ការប្រយុទ្ធលើសមរភូមិ និងទម្លាក់កិច្ចការទាំងស្រុង ទៅលើទាហានអាហ្វហ្កានីស្ថាន។
តាមគម្រោង កងទ័ពអាមេរិក ជាងមួយម៉ឺននាក់ នៅបន្តរហូតដល់ចុងឆ្នាំ ២០១៦ ត្រូវមានតួនាទី ប្រយុទ្ធប្រឆាំងនឹងអំពើភេរវកម្ម និង ទទួលបន្ទុកបណ្តុះបណ្តាលកងទ័ពអាហ្វហ្កានីស្ថាន ប្រមាណ បីសែននាក់។ ចំនួនទ័ពអាមេរិកប្រមាណ ១ម៉ឺននាក់ នឹងត្រូវថយចុះ ចំនួន ពាក់កណ្តាល នៅចុងឆ្នាំ ២០១៥។ ប៉ុន្តែ ស្ថិតនៅក្នុងស្ថានភាពដែលកងទ័ពអាហ្វហ្កានីស្ថាន នៅមិនទាន់រឹងមាំដៃជើង ហើយ រដូវវាយប្រហារភេរវកម្មរបស់ពួកតាលីបង់ កាន់តែខិតចូលមកដល់ ដែលជាការគំរាមកំហែង សន្តិសុខអាហ្វហ្កានីស្ថាន ប្រធានាធិបតីរបស់ប្រទេសនេះ គិតថា វាសំខាន់ណាស់ ដែលអាមេរិកត្រូវដកទ័ពដោយសន្សឹមៗ ពោល គឺធ្វើយ៉ាងណា ឲ្យទ័ពអាមេរិកអាចនៅបន្តមានទៀត នៅ អាហ្វហ្កានីស្ថាន នៅក្រោយឆ្នាំ ២០១៦។ នៅថ្ងៃចន្ទ នៅក្នុងសន្និសីទកាសែត ជាមួយលោកប្រមុខការបរទេសអាមេរិក ចន ឃេរី លោកអាស្រាហ្វបាននិយាយប្រគល់សិទ្ធិឲ្យលោកអូបាម៉ា ជាអ្នកសម្រេចថា តើអាមេរិកនឹងអាចមានទ័ពចំនួនប៉ុន្មាននៅអាហ្វហ្កានីស្ថាន។
លោកប្រធានាធិបតីអាហ្វហ្កានីស្ថាន ថ្លែងអំណរគុណមិនឈប់ ដល់អាមេរិក
នៅអាមេរិក លោកអាស្រាហ្វ ហ្កានី មិនត្រឹមតែចង់និយាយបញ្ចុះបញ្ចូលលោកប្រធានាធិបតីអាមេរិកតែម្នាក់ទេ ប៉ុន្តែ លោកចង់អូសទាញផងដែរប្រជាជនអាមេរិកាំង។ លោកអូបាម៉ាលែងចង់ធ្វើសង្រ្គាម នៅអាហ្វហ្កានីស្ថាន ក៏ដោយសារតែមតិសាធារណៈរិះគន់ពីការចំណាយលុយរាប់ពាន់លានរបស់ប្រជាជនអាមេរិកាំង។
នៅថ្ងៃពុធ ទី ២៥ មីនា នៅចំពោះមុខសភាអាមេរិក ដែលជាអ្នកបោះឆ្នោត ផ្តល់លុយឲ្យអាហ្វហ្កានីស្ថាន ប្រមាណ ៦០ពាន់លានដុល្លារ សម្រាប់ ឆ្នាំ ២០១៥ លោកមេដឹកនាំអាហ្វហ្កានីស្ថានត្រូវលើកនិយាយពីសារៈសំខាន់នៃវត្តមានទ័ពអាមេរិក នៅអាហ្វហ្កានីស្ថាន។ សុន្ទរកថា របស់លោកអាស្រាហ្វ ហ្កានី នៅចំពោះមុខសមាជិកសភាអាមេរិក នឹងអាចជួយឲ្យសំណើសុំថវិការបស់មន្ទីរបញ្ចកោណកាន់តែមានទម្ងន់។ ក្រសួងការពារជាតិអាមេរិកបាននិយាយថា គេនឹងស្នើសុំថវិកា ជាង ៣ពាន់៨រយលានដុល្លារ បន្ថែមទៀត សម្រាប់បណ្តុះបណ្តាលទ័ព អាហ្វហ្កានីស្ថាន នៅឆ្នាំ២០១៦។
នៅថ្ងៃចន្ទ នៅក្នុងអំឡុងជំនួបជាមួយក្រុមគ្រួសារទាហានអាមេរិក ដែលចេញទៅធ្វើសង្រ្គាម នៅអាហ្វហ្កានីស្ថាន លោកអាស្រាហ្វ ហ្កានីក៏បានប្រើសារទាក់ទាញ មតិសាធារណៈ អាមេរិក ដូចជា ជាជាងប្រើពាក្យនិយាយចំៗ សុំឲ្យអាមេរិករក្សាទ័ពឲ្យបន្តស្ថិតនៅអាហ្វហ្កានីស្ថាន ប្រមុខដឹកនាំអាហ្វហ្កានីស្ថាន បាននិយាយលើកសរសើរពីស្នាដៃ ការចូលរួមចំណែករបស់អាមេរិក ដើម្បីជួយអាហ្វហ្កានីស្ថានឲ្យស្គាល់សេរីភាព និងប្រជាធិបតេយ្យ។
ខុសពី ប្រធានាធិបតីមុន គឺលោកអាមីត កាហ្សៃ ដែលតែងនិយាយបណ្តុះបង្អាប់ថា ទាហានអាមេរិកជាអ្នកសម្លាប់ប្រជាជនស៊ីវិល និងនាំសង្រ្គាមឲ្យអាហ្វហ្កានីស្ថាន លោកប្រធានាធិបតីអាហ្វហ្កានីស្ថានថ្មី បានលើកសរសើរ ដឹងគុណ ទីក្រុងវ៉ាស៊ីនតោន ដែលបានបូជាទាំងទាហាន និងចំណាយប្រាក់រាប់លានដុល្លារ ដើម្បីជួយស្រោចស្រង់អាហ្វហ្កានីស្ថាន ពីដៃរបស់ពួកតាលីបង់ និងស្តាហេដ្ឋារចនាសម្ព័ន្ធរបស់អាហ្វហ្កានីស្ថាន រួមទាំងប្រព័ន្ធអប់រំដ៏ខ្សត់ខ្សោយរបស់ប្រទេសនេះផង។ សម្រាប់លោកហ្កានី អាហ្វហ្កានីស្ថាន នឹងមិនស្ថិតនៅជាបន្ទុកជារៀងរហូតរបស់អាមេរិកនោះទេ។ អាហ្វហ្កានីស្ថាននឹងរៀបចំសន្តិសុខផ្ទៃក្នុងរបស់ខ្លួនឡើងវិញ ប៉ុន្តែ នៅត្រូវការជំនួយចាំបាច់ ពីអាមេរិក។
អាហ្វាហ្កានីស្ថាននឹងអាចក្លាយជាសំបុករបស់ក្រុមជីហាត នៃអង្គការរដ្ឋអ៊ីស្លាម
មិនថា អាហ្វហ្កានីស្ថានទេមិនចង់ឃើញអាមេរិកដកទ័ពចេញឲ្យអស់ពី អាហ្វហ្កានីស្ថាន ចិន រុស្ស៊ី ឥណ្ឌា ក៏សុទ្ធតែបារម្ភពី អសន្តិសុខ ដែលអាហ្វហ្កានីស្ថាននឹងអាចជួប នៅក្រោយទ័ពអាមេរិកត្រូវដកចេញអស់ពីអាហ្វហ្កានីស្ថាន។ រហូតមកដល់ពេលនេះ គ្មានប្រទេសណាមួយ ចង់ចំណាយលុយ ធ្វើសង្រ្គាម ជំនួសអាមេរិក នៅអាហ្វហ្កានីស្ថាន ទេ។ មេដឹកនាំអាហ្វហ្កានីស្ថាន ក៏បានមើលឃើញតថភាពហ្នឹងដែរ។ រដ្ឋាភិបាលថ្មី របស់អាហ្វហ្កានីស្ថាន បានបន្ទន់ជំហរមួយ អាមេរិក ព្រោះថា គ្មានអាមេរិក អាហ្វហ្កានីស្ថានមិនសង្ឃឹម អាចទប់ទល់ជាមួយ ក្រុមតាលីបង់ ដែលត្រូវបានអាមេរិកផ្តួលចេញពីអំណាច កាលពី១៤ឆ្នាំមុននោះទេ។
មួយវិញទៀត មេដឹកនាំអាហ្វហ្កានីស្ថាន មើលឃើញថា ការរក្សាមូលដ្ឋានរបស់អាមេរិក នៅអាហ្វហ្កានីស្ថាន ក៏អាចជាប្រយោជន៍យុទ្ធសាស្រ្តមួយរបស់អាមេរិកដែរដើម្បីប្រយុទ្ធប្រឆាំងនឹងក្រុមជីហាតនៃអង្គការរដ្ឋអ៊ីស្លាម។ គេបារម្ភថា ក្រុមជីហាត នៃអង្គការរដ្ឋអ៊ីស្លាម ដែលកំពុងពង្រីកអំណាច នៅស៊ីរី និងនៅអ៊ីរ៉ាក់ អាចលូកដៃ ចូលក្នុងទឹកដីអាហ្វហ្កានីស្ថាន នៅពេលដែលក្រុមអាល់កៃដា នៅអាហ្វហ្កានីស្ថាន កំពុងចាប់ផ្តើមចុះខ្សោយដៃ និងឥទ្ធិពលនោះ។ ជាក់ស្តែង ក្រុមតាលីបង់មួយចំនួនបានប្រកាសភ្ជាប់ខ្លួនជាមួយ ក្រុមជីហាត នៅស៊ីរី។ ក្រុមនេះ នឹងអាចគ្រោះថ្នាក់ ជាងអាល់កៃដា ឬតាលីបង់ទៅទៀត ព្រោះក្រុមនេះសម្លាប់មិនរើសមុខ មិនថា ប្រជាជនស៊ីវិល ឬទាហាន ដែលខ្លួនចាត់ទុកជាសត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ