កូរ៉េខាងជើងថា លោកដូណាល់ ត្រាំ មកអាស៊ី ដើម្បី “បបួលគេឲ្យធ្វើសង្រ្គាម”
លោកប្រធានាធិបតីដូណាល់ ត្រាំ កំពុងតែបិទបញ្ចប់ដំណើរទេស្សនកិច្ច ពេញមួយសប្តាហ៍នៅតំបន់អាស៊ីប៉ាស៊ីហ្វិក នៅថ្ងៃអាទិត្យទី១២ វិច្ឆិកា នាទីក្រុងម៉ានីល ប្រទេសហ្វីលីពីន។ នៅឯកូរ៉េខាងត្បូង លោកដូណាល់ បាននិយាយផ្ញើរសារគំរាមធ្ងន់ៗ ទៅកូរ៉េខាងជើង។ ស្រាប់តែកាលពីថ្ងៃសៅរ៍ កូរ៉េខាងជើង បានប្រកាសថា ដំណើរទស្សនកិច្ចរបស់លោកត្រាំ នៅក្នុងតំបន់អាស៊ីប៉ាស៊ីហ្វិកនេះ គឺជាដើម្បីដើរកកូរកកាយបង្កើតសង្រ្គាម តែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
តាមរយៈប្រព័ន្ធឃោសនាព័ត៌មានតែមួយគត់របស់ខ្លួន អ្នកនាំពាក្យក្រសួងការបរទេសកូរ៉េខាងជើង បានប្រកាស កាលពីថ្ងៃសៅរ៍ ទី១១ វិច្ឆិកាថា លោកប្រធានាធិបតីអាមេរិក កំពុងតែដើរកកូរកកាយ នៅតំបន់អាស៊ីប៉ាស៊ីហ្វិក ដើម្បីបបួលគេឲ្យ ឲ្យធ្វើសង្រ្គាម ជាមួយកូរ៉េខាងជើង។ អ្នកនាំពាក្យរូបនេះបន្តថា សម្តីគំរាមរបស់ប្រធានាធិបតីអាមេរិក ទាំងប៉ុន្មាន មិនអាចធ្វើឲ្យកម្លាំងនុយក្លេអ៊ែររបស់កូរ៉េខាងជើងចុះថយបានទេ គឺមានតែរឹតតែខ្លាំងឡើង ព្រោះកូរ៉េខាងជើង បានប្តេជ្ញាចិត្តរួចហើយ ថាត្រូវតែអភិវឌ្ឍន៍អាវុធនុយក្លេអ៊ែរឲ្យខ្លាំងក្លា ទុកជាការការពារខ្លួន។
សូមបញ្ជាក់ថា ការប្រកាសរបស់ក្រសួងការបរទេសកូរ៉េខាងជើងនេះ គឺធ្វើឡើង ប៉ុន្មានថ្ងៃ ក្រោយពេលដែលលោកដូណាល់ ត្រាំ បានទៅដល់ទីក្រុងសេអ៊ូល។ នៅទីនោះ លោកត្រាំ បានថ្លែងសន្ទរកថា នៅចំពោះមុខសភាកូរ៉េខាងត្បូង ដោយបានគំរាមថា របបគីម ជុងអ៊ុន កុំចង់មើលស្រាលសមត្ថភាព និងការតាំងចិត្តរបស់អាមេរិកឲ្យសោះ។
ជុំវិញវិបត្តិកូរ៉េខាងជើងនេះ លោកដូណាល់ ត្រាំ ដែលបានធ្វើទស្សនកិច្ចជុំវិញតំបន់អាស៊ីប៉ាស៊ីហ្វិក ក្នុងសប្តាហ៍កន្លងទៅនេះ បានអូសទាញចិន ឲ្យចូលរួម ដាក់សំពាធ ឲ្យកានតែធ្ងន់ ទៅលើកូរ៉េខាងជើង។ ចិនគឺជាដៃគូពាណិជ្ជកម្ម និងជាប្រភពចំណូលសឹងតែទាំងស្រុង របស់កូរ៉េខាងជើង។ ទស្សនកិច្ចរបស់លោកត្រាំ នៅចិន នៅជប៉ុន និងនៅកូរ៉េខាងត្បូង ជាប់ៗគ្នាមកនេះ គឺផ្តោតសំខាន់ទៅលើគ្រោះថា្នក់នុយក្លេអ៊ែររបស់កូរ៉េខាជើងនេះតែម្តង។
ហើយកាលពីថ្ងៃសុក្រ ទី ១០ វិច្ឆិកា នៅចំពោះមុខអង្គជំនួបកំពូល នៃអង្គការសហប្រតិបត្តិការសេដ្ឋកិច្ច អាស៊ីប៉ាស៊ីហ្វិក លោកដូណាល់ ត្រាំ បានថ្លែងថា មេដឹកនាំផ្តាច់ការកូរ៉េខាងជើង កំពុងក្អេងក្អាងឆ្កួតលីលា ដែលអាចបង្កគ្រោះថ្នាក់ ដល់តំបន់អាស៊ីប៉ាស៊ីហ្វិកទាំងមូល។ ដូច្នេះ ប្រទេសទាំងអស់ ក្នុងតំបន់នេះ មិនអាចនៅស្ងៀម បណ្តោយឲ្យខ្លួនរងផលលំបាក ដោយសារកូរ៉េខាងជើងបានទេ។
ដោយឡែក កាលពីថ្ងៃសៅរ៍ទី ១១វិច្ឆិកា កងទ័ពកូរ៉េខាងត្បូួង និងកងទ័ពអាមេរិក បានបើកសមយុទ្ធយោធាជាមួយគ្នា ក្នុងទ្រង់ទ្រាយធំ ដោយបានប្រើនាវាផ្ទុកយន្តហោះដ៏ទំនើបរបស់អាមេរិក ចំនួន៣គ្រឿង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ