កូរ៉េខាងត្បូង៖ សវនាការកាត់ក្តីលោកស្រី ប៉ាក់ គុនហេ ចាប់ផ្តើមបើក
លោកស្រី ប៉ាក់ គុនហេ អតីតប្រធានាធិបតីកូរ៉េខាងត្បូង ដែលបានបាត់បង់តំណែង ដោយសារតែរឿងអាស្រូវពុករលួយនេះ ត្រូវបានបញ្ជូនខ្លួន ទៅបំភ្លឺនៅចំពោះមុខតុលាការ ដែលបានចាប់ផ្តើមបើកសវនាការជំនុំជំរះ ចាប់ពីថ្ងៃអង្គារទី២៣ ឧសភានេះទៅ។ តាមការរំពឹងទុក សវនាការនេះ នឹងបន្តអូសបន្លាយជាច្រើនខែទៅមុខ ដើម្បីលាតត្រដាងរាល់ការពិត ស្តីពីសកម្មភាពពុករលួយ ដែលគេចោទប្រកាន់ទៅលើរូបលោកស្រី។ សវនាការនេះ ត្រូវបានប្រជាជនកូរ៉េខាងត្បូង ចាត់ទុកថា ជាសវនាការប្រចាំសតវត្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
លោកស្រី ប៉ាក់ គុនហេ ដែលគេធ្លាប់តែឃើញ តុបតែងខ្លួនយ៉ាងស្អាត អស្ចារ្យ ជាមួយនឹងគ្រឿងសំអាង គ្រឿងអល្លង្ការ ថ្លៃៗ នោះ នៅថ្ងៃអង្គារទី ២៣ ឧសភានេះ លោកស្រីបានបង្ហាញខ្លួន នៅចំពោះមុខសវនាការ ក្រុងសេអ៊ូល ក្នុងសំលៀកបំពាក់សាមញ្ញ ប្រកបដោយទឹកមុខស្រង៉ូតស្រង៉ាត់ មិនមានលាបក្រែមម្សៅអ្វីឡើយ។ រថយន្តមន្ទីរឃុំឃាំង បានដឹកលោកស្រី មកដល់តុលាការ អមដំណើរដោយមន្ត្រីនគរបាលជាច្រើននាក់។
លោកស្រី បានងាកមុខ បែរចេញ មិនឲ្យប៉ះនឹងក្រសែរភ្នែក របស់លោកស្រី ឆយ ស៊ុនស៊ីល ដែលមានវត្តមាននៅក្នុងសវនាការព្រមគ្នាដែរ។ គឺលោកស្រី ឆយ ស៊ុនស៊ីល មិត្តស្និទស្នាលរយៈពេល៤០ឆ្នាំ របស់លោកស្រីប៉ាក់ គុនហេ នេះហើយ ដែលជាដើមប្រភព នៃរឿងអាស្រូវ ពុករលួយដ៏ធំនេះ។ លោកស្រី ឆយ ស៊ុនស៊ីល ត្រូវបានតុលាការចោទប្រកាន់ពីបទប្រើប្រាស់អំណាច ឥទ្ធិពលខុសច្បាប់ ដោយបានប្រើឈ្មោះជាមិត្តរបស់ប្រធានាធិបតី ទៅប្រមូលប្រាក់ពីក្រុមហ៊ុននានា សរុបប្រមាណជា៧០លានដុល្លារ។ យ៉ាងណាមិញ មេដឹកនាំក្រុមហ៊ុន Sumsung និង ក្រុមហ៊ុន Lotte របស់កូរ៉េខាងត្បូង ក៏បានជាប់ចោទពីបទចូលរួមប្រព្រឹត្តិអំពើពុករលួយដែរ។
ចំណែកលោកស្រី ប៉ាក់ គុនហេ ត្រូវបានតុលាការចោទប្រកាន់ ពីបទចូលរួមប្រព្រឹត្តិអំពើពុករលួយ និងប្រើប្រាស់ឥទ្ធិពលខុសច្បាប់ ជាមួយនឹងលោកស្រីឆយ ស៊ុនស៊ីល។ បទចោទប្រកាន់មួយទៀតដ៏ធ្ងន់នោះ គឺលោកស្រីប៉ាក់ គុនហេ ត្រូវបានគេចោទថា បានយកកិច្ចការដឹកនាំប្រទេស កិច្ចការសំងាត់ជាតិ យកទៅលាតត្រដាង និងស្តាប់បង្គាប់លោកស្រី ឆយ ស៊ុនស៊ីល ទាំងដែល លោកស្រីនេះ ពុំមានមុខងារអ្វីសោះ។
តាមការរំពឹងទុក សវនាការដែលចាប់ផ្តើមនៅថ្ងៃនេះ នឹងត្រូវបន្តអូសបន្លាយ ជាច្រើនខែ ដោយសារតែភាពស្មុគស្មាញសាំញ៉ាំនៃសំណុំរឿង។ នៅព្រឹកថ្ងៃអង្គារ នេះ មានមនុស្សជាច្រើនរយនាក់ ដែលបានឈររង់ចាំ នៅខាងមុខតុលាការ ក្រុងសេអ៊ូល ដើម្បីរងចាំស្តាប់ឈ្មោះ ដែលគេចាប់ឆ្នោត សម្រេចឲ្យចូលទៅស្តាប់ អង្គជំនំជំរះ។ បុរសចំណាស់ម្នាក់ ដែលឈរចាំនៅខាងមុខតុលាការ បាននិយាយថា លោកស្រី ប៉ាក់ គុនហេ ត្រូវតែទទួលទោស ឲ្យសមនឹងទង្វើរបស់គាត់ ហើយវាគឺជាមេរៀន សម្រាប់មេដឹកនាំផ្សេងៗទៀត។ តែក៏មានមនុស្សមួយចំនួន នៅខាងមុខតុលាការ មកទាមទារឲ្យតុលាការដោះលែងលោកស្រី ប៉ាក់ គុនហេដែរ។
សារព័ត៌មានក្នុងស្រុក របស់កូរ៉េខាងត្បូង បានចាត់ទុក សវនាការនេះ គឺជាសវនាការប្រចាំសតវត្ស។ ប្រជាជនកូរ៉េខាងត្បូង បានតាមដានរឿងរ៉ាវនេះ ប្រៀបដូចជាការតាមដានរឿងភាគកូរ៉េ ដែលផ្សាយតាមទូរទស្សន៍ដូច្នោះដែរ។ គេសង្ឃឹមថា សវនាការនេះ នឹងលាតត្រដាងឲ្យឃើញកាន់តែច្បាស់ អំពីសកម្មភាពស្មោគគ្រោក ដែលអ្នកនយោបាយ និងអ្នករកស៊ីធំៗ នៅកូរ៉េខាងត្បូងឃុំឃិតគ្នា ដើម្បីប្រាក់ និងអំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ