លោកមូន ចែអ៊ីនដឹងច្បាស់ថា ចិនបារម្ភពីប្រព័ន្ធខែលមីស៊ីលរបស់អាមេរិក
លោកមូន ចែអ៊ីន ប្រធានាធិបតីថ្មីរបស់កូរ៉េខាងត្បូង នៅថ្ងៃព្រហស្បតិ៍ទី ១១ឧសភា បានជជែកតាមទូរស័ព្ទ រយៈពេល ៤០នាទី ជាមួយប្រធានាធិបតីចិន លោកស៊ី ជីនពីង។ ប្រមុខដឹកនាំទាំងពីរបាននិយាយយល់ស្របគ្នាថា ការជំរុញឲ្យកូរ៉េខាងជើងលះបង់ចោលអាវុធនុយក្លេអ៊ែរ គឺជាទិសដៅរួមរបស់ចិន និងកូរ៉េខាងត្បូង។
ចុះផ្សាយនៅថ្ងៃ៖
តាមអ្នកនាំពាក្យរបស់ប្រធានាធិបតីកូរ៉េខាងត្បូង កិច្ចសន្ទនាតាមទូរស័ព្ទ រយៈពេល ៤០នាទីរវាងប្រធានាធិបតីកូរ៉េខាងត្បូង និងប្រធានាធិបតីចិន ធ្វើឡើង នៅមួយថ្ងៃក្រោយ លោកមូន ចែអ៊ីន បាននិយាយទូរស័ព្ទជាមួយ លោកដូណាល់ ត្រាំ។ នៅថ្ងៃពុធ លោកដូណាល់ ត្រាំ ដែលបាននិយាយអញ្ជើញប្រធានាធិបតីថ្មីរបស់កូរ៉េខាងត្បូង ឲ្យទៅធ្វើទស្សនកិច្ចនៅទីក្រុងវ៉ាស៊ីនតោន។
លោកមូន ចែអ៊ីន មកពីក្រុមសេរីនិយម បាននិយាយទូរស័ព្ទដែរជាមួយនាយករដ្ឋមន្រ្តីជប៉ុននៅថ្ងៃពុធនេះ។ ជប៉ុនដែលកូរ៉េខាងត្បូងចោទប្រកាន់ថា ចង់សើរើ កែប្រែប្រវត្តិសាស្រ្តដែលនៅក្នុងនោះទាហានជប៉ុនបានចូលត្រួតត្រា និងធ្វើប្រជាជនកូរ៉េ តាំងពីមុនសង្រ្គាមលោកលើកទី ២។
បញ្ហានុយក្លេអ៊ែររបស់កូរ៉េខាងជើងជាសំណុំរឿងដែលប្រធានាធិបតីទាំងពីរបានលើក នៅក្នុងកិច្ចសន្ទនាតាមទូរស័ព្ទនៅព្រឹកថ្ងៃព្រហស្បតិ៍នេះ។ ប៉ុន្តែ សំណុំរឿងសំខាន់ ដែលស្ថិតនៅចំកណ្តាលបេះដូងនៃការជជែកទូរស័ព្ទ នៅថ្ងៃព្រហស្បតិ៍ គឺការតាំងប្រព័ន្ធខែលមីស៊ីល THAADរបស់អាមេរិកនៅកូរ៉េខាងត្បូង។
តាំងពីដើមមក ចិនប្រឆាំងដាច់ខាតនឹងវត្តមានរបស់ប្រព័ន្ធខែលមីស៊ីលអាមេរិក នៅកូរ៉េខាងត្បូង ព្រោះចិនយល់ច្បាស់ថា អាមេរិក មានបំណងប្រើប្រព័ន្ធខែលមីស៊ីល ដើម្បី ចង់យកការណ៍សម្ងាត់ពីកងទ័ពចិន។ អាមេរិកវិញ បាននិយាយម្តងហើយ ម្តងទៀតថា ប្រព័ន្ធខែលមីស៊ីល របស់ខ្លួន នៅកូរ៉េខាងត្បូង គឺដំឡើងឡើង ដើម្បីគ្រាន់តែសម្រាប់បាញ់ស្ទាក់ មីស៊ីលរបស់កូរ៉េខាងជើងតែប៉ុណ្ណោះក៏ដោយ។ សម្រាប់អាមេរិក មីស៊ីលរបស់កូរ៉េខាងជើងមិនត្រឹមគំរាមកំហែង កូរ៉េខាងត្បូង និងជប៉ុនដែលជាសម្ព័ន្ធមិត្តរបស់អាមេរិកតែប៉ុណ្ណោះទេ ប៉ុន្តែ កូរ៉េខាងជើងកំពុងមានមីស៊ីលដែលអាចបាញ់ទៅដល់ទឹកដីអាមេរិក។
ប្រព័ន្ធខែលមីស៊ីលដែលអន្តរាយដល់ទំនាក់ទំនងសេដ្ឋកិច្ចចិន និងកូរ៉េខាងត្បូង
គឺប្រព័ន្ធខែលមីស៊ីលនេះហើយ ដែលធ្វើឲ្យចិន ខឹងខ្លាំងកូរ៉េខាងត្បូង។ ដោយសារតែរឿងនេះ កូរ៉េខាងត្បូងបានខាតបង់ខ្លាំង ផ្នែកសេដ្ឋកិច្ច។ ប្រជាជនចិនបានពហិការមិនទៅដើរលេងនៅកូរ៉េខាងត្បូង ឬក៏ទិញផលិតផលកូរ៉េខាងត្បូង ដូចជារថយន្ត Hyundaiជាដើម ដែលកូរ៉េខាងត្បូងនាំចូលទៅប្រទេសចិន។
តាមអ្នកនាំពាក្យរបស់ប្រធានាធិបតីកូរ៉េខាងត្បូង លោកមូន ចែអ៊ីនបានលើកនិយាយពីការលំបាក និងការរើសអើងដែលក្រុមហ៊ុនវិនិយោគកូរ៉េខាងត្បូង បានជួបប្រទះ នៅប្រទេសចិន នៅក្រោយរដ្ឋាភិបាលចិន រិះគន់ ប្រឆាំងប្រព័ន្ធខែលមីស៊ីលនៅកូរ៉េខាងត្បូង។ តាមទូរស័ព្ទ លោកមូន ចែអ៊ីនបាន សុំឲ្យប្រមុខដឹកនាំចិន ជួយអន្តរាគមន៍ ដើម្បីបន្ធូរបន្ថយភាពតានតឹង និងក្តីកង្វល់របស់អ្នកវិនិយោគកូរ៉េខាងត្បូងនៅចិន។
ប្រព័ន្ធខែមីស៊ីលរបស់អាមេរិកTHAAD ត្រូវដំឡើង រួចហើយនៅកូរ៉េខាងត្បូងដោយរង់ចាំតែការដាក់ឲ្យដំណើរការតែប៉ុណ្ណោះ
ប្រព័ន្ធចាប់មីស៊ីលរបស់អាមេរិកមានវត្តមាននៅកូរ៉េខាងត្បូង ដោយសារមានភ្លើងខៀវរបស់លោកស្រីប្រធានាធិបតី ប៉ាក់ គុនហេ ដែរ។ លោកស្រីប៉ាក់ គុនហេ ដែលមកពីក្រុមអភិរក្សនិយម មាននយោបាយតឹងខ្លាំងជាមួយកូរ៉េខាងជើង។ ប៉ុន្តែ ទីក្រុងប៉េកាំងមានសង្ឃឹមច្រើន ថា កូរ៉េខាងត្បូងក្រោមការដឹកនាំរបស់ប្រធានាធិបតីថ្មី គឺលោក មូន ចែអ៊ីន នឹងដូរចិត្តទៅវិញ ដកចោលប្រព័ន្ធខែលមីស៊ីល អាមេរិក ព្រោះថា លោកមូន ចែអ៊ីន មកពីក្រុមសេរីនិយម គឺហាក់មិនសូវយល់ស្រប ទៅនឹងយុទ្ធសាស្រ្ត តាំងប្រព័ន្ធខែលមីស៊ីលរបស់អាមេរិក នៅកូរ៉េខាងត្បូងនោះទេ។ នៅក្នុងយុទ្ធនាការឃោសនាបោះឆ្នោត លោកធ្លាប់និយាយថា កូរ៉េខាងត្បូងត្រូវតែជាអ្នកសម្រេចចុងក្រោយ ពីរឿងដាក់ដំឡើងប្រព័ន្ធខែលមីស៊ីលTHAAD។ ហើយនៅក្នុងសៀវភៅមួយ ដែលលោកបានសរសេរ លោកមូន ចែអ៊ីនបាននិយាយថា កូរ៉េខាងត្បូងត្រូវតែចេះនិយាយថា ទេ ជាមួយអាមេរិក។
នៅក្នុងកិច្ចសន្ទនាតាមទូរស័ព្ទនៅថ្ងៃ ព្រហស្បតិ៍ ប្រធានាធិបតីកូរ៉េខាងត្បូង បាននិយាយប្រាប់សមភាគីចិនថា លោកយល់ពីក្តីបារម្ភរបស់ចិន និងយល់ពីជំហររបស់ចិន ទៅលើរឿងតាំងប្រព័ន្ធខែលមីស៊ីលអាមេរិក ក្នុងទឹកដីកូរ៉េខាងត្បូង។ លោកមូន ចែអ៊ីនបានសន្យាថា នឹងបញ្ជូនគណប្រតិភូពីរដាច់ដោយឡែក ទៅទីក្រុងប៉េកាំង ដើម្បីបើកកិច្ចប្រជុំទ្វេភាគី និយាយគ្នាឲ្យយល់ ពីរឿងលុបបំបាត់ចោលនុយក្លេអ៊ែរកូរ៉េខាងជើង ហើយនិងការតាំងប្រព័ន្ធខែលមីស៊ីលអាមេរិក។
ប៉ុន្តែ តាមអ្នកនាំពាក្យរបស់ប្រធានាធិបតីកូរ៉េខាងត្បូង លោកមូន ចែអ៊ីនបាននិយាយបញ្ជាក់ទៅលោកប្រធានាធិបតីចិនដែរថា ប្រព័ន្ធខែលមីស៊ីលTHAADនឹងអាចដោះស្រាយទៅរួច នៅពេលណាកូរ៉េខាងជើងលែងធ្វើនយោបាយញុះញង់ បែបដូចជាបាញ់មីស៊ីល ឬបាញ់សាកល្បង គ្រាប់បែកនុយក្លេអ៊ែរតទៅទៀត។
សម្រាប់ប្រយោជន៍ទាំងអស់គ្នា
ចិន និងកូរ៉េខាងត្បូងចុះសម្រុងគ្នា នឹងធ្វើភាគីទាំងពីរទទួលផលចំណេញទាំងអស់គ្នា ទាំងក្នុងវិស័យសេដ្ឋកិច្ច ហើយនិងយុទ្ធសាស្រ្តនយោបាយការបរទេស។ សម្រាប់កូរ៉េខាងត្បូង គេអាចនិយាយបានថា ត្រូវរ៉ូវគ្នាជាមួយចិន នឹងធ្វើឲ្យកូរ៉េខាងត្បូងបានប្រយោជន៍សេដ្ឋកិច្ច ព្រោះចិនជាដៃគូពាណិជ្ជកម្មសំខាន់ និងធំជាងគេបង្អស់របស់កូរ៉េខាងត្បូង។ ការដោះដូរពាណិជ្ជកម្មរវាងប្រទេសទាំងពីរ ដែលមានតម្លៃ ដល់ទៅ ៣០០ពាន់ លានដុល្លារ ក៏ជាហេតុផលសំខាន់ដែលធ្វើឲ្យចិនត្រូវព្យាយាមបន្តរក្សាទំនាក់ទំនងល្អជាមួយកូរ៉េខាងត្បូងវិញដែរ។
ចិនវិញដឹងថា ដំឡើងសំឡេង ដាក់សម្ពាធលើកូរ៉េខាងត្បូង ដោយរឿងដំឡើងប្រព័ន្ធខែលមីស៊ីល នឹងមិនអាចរារាំង ដំណើរការដំឡើងប្រព័ន្ធខែលមីស៊ីលរបស់អាមេរិកនៅកូរ៉េខាងត្បូង នោះទេ។ ផ្ទុយទៅវិញ គឺមានតែរុញបន្ថែម ឲ្យកូរ៉េខាងត្បូង រត់ទៅរកជំនួយយោធាពីអាមេរិក ដែលជាប្រការមិនប្រពៃ សោះឡើយ សម្រាប់ចិន ដែលប្រាថ្នាចង់បានតែស្ថិរភាព និងសន្តិសុខ ក្នុងតំបន់ សម្រាប់ការលូតលាស់សេដ្ឋកិច្ចរបស់ចិន។ ម្យ៉ាងទៀត គ្រប់គ្នាយល់ថា នៅពេលចិន កូរ៉េខាងត្បូង អាមេរិកដំឡើងសំឡេង ដាក់គ្នា គឺកូរ៉េខាងជើង ដែលជាអ្នកឈ្នះ សំងំយកសុខដើម្បី បន្តកម្មវិធីនុយក្លេអ៊ែរតទៅទៀត។
ចរចាការទូត គឺល្អជាងការពាក់មុខយក្សដាក់គ្នា។ វិបត្តិនុយក្លេអ៊ែរនៅកូរ៉េខាងជើង តាមពិតគឺមិនអាចដោះស្រាយចេញរួចទេ បើសិនគ្មានការលះបង់ ធ្វើសម្បទានរបស់ភាគីនីមួយៗ។ កូរ៉េខាងជើងអះអាងថា ការអភិវឌ្ឍ ផលិតគ្រាប់មីស៊ីល និងអាវុធនុយក្លេអ៊ែរជាបេះដូង សម្រាប់ការរស់រានរបស់ខ្លួន និងដើម្បីទប់ទល់នឹងការឈ្លានពានរបស់អាមេរិក។ អាមេរិកឯណោះវិញ ឥលូវនេះបានលើកឡើងថា អាមេរិក ត្រូវតែដំឡើងប្រព័ន្ធខែលមីស៊ីល ដើម្បីទប់ទល់នឹងការបាញ់ វាយប្រហារនុយក្លេអ៊ែររបស់កូរ៉េខាងជើង។ គឺការយកលេស ចោទ ដាក់គ្នាទៅវិញ ទៅមកនេះហើយដែលធ្វើឲ្យកូរ៉េខាងជើងរឹតតែរំកិល បោះជំហានទៅមុខ រហូត ក្នុងការផលិតគ្រាប់បែកនុយក្លេអ៊ែរ ក្នុងរយៈពេលប៉ុន្មានឆ្នាំចុងក្រោយនេះ។ អ្នករងគ្រោះមុនគេ គឺកូរ៉េខាងត្បូងនេះឯង។ រដ្ឋាភិបាលក្រុងសេអ៊ូលក្រោមការដឹកនាំរបស់លោកមូន ចែអ៊ីនមើលទៅ ទំនងមិនដើរនយោបាយរបស់រដ្ឋាភិបាលចាស់ នយោបាយរឹតបន្តឹង ដែលធ្វើឲ្យដាច់ខ្សែចាប៉ី នោះទេ។ លោកមូន ចែអ៊ីនដែលធ្លាប់ចូលរួមក្នុងការបង្កើតឲ្យមានកិច្ចប្រជុំកំពូល កូរ៉េទាំងពីរ នៅឆ្នាំ ២០០៧បាននិយាយនៅក្នុងពេលស្បថចូលកាន់តំណែងថា លោកត្រៀមខ្លួនទៅជួបមេដឹកនាំកូរ៉េខាងជើង លោកគីម ជុងអ៊ុន ដើម្បីដោះស្រាយសំណុំរឿងនុយក្លេអ៊ែរកូរ៉េខាងជើង។ គេមិនដឹងថា តើលោកមូន ចែអ៊ីនអាចធ្វើបានដូចសំដីដែរឬទេ។ យ៉ាងណាក៏ដោយ គេនៅតែសង្ឃឹមថា ភាពតានតឹងកូរ៉េ នឹងអាចថយចុះមួយកម្រិត មកវិញ បើសិន ភាគីម្ខាង ដូចជាកូរ៉េខាងត្បូង បានបោះដៃ ជាមុន ធ្វើសម្បទាន មានចេតនាចង់ដោះស្រាយវិវាទនឹងគ្នា ជាជាងការចង់យកតែឈ្នះរៀងៗខ្លួន៕
អាមេរិកដែលជាសម្ព័ន្ធមិត្តរបស់កូរ៉េខាងត្បូង បារម្ភដែលឃើញ ជំហរថ្មីរបស់រដ្ឋាភិបាលកូរ៉េខាងត្បូង។ សម្រាប់មន្រ្តីជាន់ខ្ពស់អាមេរិក ការដែលប្រធានាធិបតីកូរ៉េខាងត្បូងចង់ចរចាជាមួយកូរ៉េខាងជើង ឬមានអរិភាពជាមួយប្រព័ន្ធខែលមីស៊ីលTHAAD នឹងមិនឲ្យគេអាចដាក់គំនាប ទៅលើប្រទេសកុម្មុយនិស្តមួយនេះ ឲ្យលះបង់ចោលមហិច្ឆតាផលិតគ្រាប់បែកនុយក្លេអ៊េរនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ