ចិនបន្ទន់ឥរិយាបថ នៅចំពោះមុខភាពតានតឹងក្នុងឧបទ្វីបកូរ៉េ
បន្ធូរបន្ថយសម្ពាធនៅក្នុងឧបទ្វីបកូរ៉េ ជាមហិច្ឆតារបស់ប៉េកាំង ! តាមរយៈសំឡេងរបស់លោករដ្ឋមន្ត្រីការបរទេស ចិនបានអំពាវនាវ នៅថ្ងៃពុធទី ៨ មីនានេះ ឱ្យកូរ៉េខាងជើងផ្អាកកម្មវិធីនុយក្លេអ៊ែរ និងការបាញ់មីស៊ីល ហើយទន្ទឹមគ្នានេះ ចិន ក៏បានស្នើឱ្យអាមេរិក និង កូរ៉េខាងត្បូង បញ្ឈប់សមយុទ្ធយោធា។
ចុះផ្សាយនៅថ្ងៃ៖
ស្តាប់ - ០១:៤២
ម្ខាងត្រូវផ្អាកកម្មវិធីនុយក្លេអ៊ែរ និងការបាញ់មីស៊ីល ម្ខាងទៀតត្រូវបញ្ឈប់សមយុទ្ធយោធា ! មានតែការដោះដូរគ្នាបែបនេះទេ ដែលអាចនាំគ្រប់ភាគីឱ្យចូលតុចរចាបាន។ នេះជាការពន្យល់របស់លោករដ្ឋមន្ត្រីការបរទេសចិន Wang Yi ក្នុងអត្ថន័យបន្ធូរបន្ថយភាពតានតឹងនៅក្នុងឧបទ្វីបកូរ៉េ។ ប៉ុន្តែសំណើរបស់ចិន ទំនងជាមិនបានភាគីបក្សដិបក្សទាំងពីរធ្វើឮទេ។ កាលពីខែមករា២០១៥ កូរ៉េខាងជើង ធ្លាប់បានទាមទារឱ្យអាមេរិកនិងកូរ៉េខាងត្បូងបញ្ឈប់សកម្មភាពធ្វើសមយុទ្ធជាថ្នូរនឹងការផ្អាកកម្មវិធីនុយក្លេអ៊ែរ តែវ៉ាស៊ីនតោននិងសេអ៊ូលបដិសេធ។
សូមបញ្ជាក់ថា ភាពតានតឹងក្នុងឧបទ្វីបបានឡើងសម្ពាធខ្លាំង ក្រោយពីកូរ៉េខាងជើងបានបាញ់មីស៊ីល បួនគ្រាប់ ក្នុងនោះមានបីគ្រាប់បានធ្លាក់ក្នុងដែនទឹកជប៉ុន កាលពីថ្ងៃចន្ទទី ៦ មីនា។ ជាចម្លើយតប សហរដ្ឋអាមេរិកបានដំឡើងនិងពង្រាយខែលមីស៊ីលប្រឆាំងមីស៊ីលThaad នៅក្នុងប្រទេសកូរ៉េខាងត្បូង។ ខែលមីស៊ីលដែលសម្រាប់ប៉េកាំង គឺជាតំណាងនៃការគំរាមកំហែងសន្តិសុខជាតិចិន និងតំបន់។
ចំណែកអង្គការសហប្រជាជាតិ ដែលបានប្រកាសថ្កោលទោសកូរ៉េខាងជើងភ្លាម ចំពោះទង្វើរំលោភបំពានសេចក្តីសម្រេចរបស់ក្រុមប្រឹក្សា ត្រូវជួបប្រជុំគ្នាជាបន្ទាន់ តាមសំណើរបស់អាមេរិកនិងជប៉ុន នៅល្ងាចថ្ងៃពុធនេះ។
ប្រឈមមុខនឹងស្ថានភាពបែបនេះ រដ្ឋមន្ត្រីក្រសួងការបរទេសអាមេរិក លោក Rex Tillerson ក៏នឹងធ្វើដំណើរទៅកូរ៉េខាងត្បូង ជប៉ុន និងចិន។ នេះបើតាមសេចក្តីប្រកាសរបស់ក្រសួងការបរទេសអាមេរិកនៅថ្ងៃអង្គារម្សិលមិញ។ ដំណើរទស្សនកិច្ច នឹងប្រព្រឹត្តទៅ ពីថ្ងៃទី១៥ ដល់ថ្ងៃទី១៩ ខែមីនា ដើម្បីជជែកគ្នាជាមួយនឹងប្រទេសទាំងនោះ ក្រោយពីសហរដ្ឋអាមេរិកបានដាក់ពង្រាយប្រព័ន្ធការពារមីស៊ីលនៅក្នុងទឹកដីកូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ