ចិនបង្កការភ្ញាក់ផ្អើល ដោយការបង្ហាញយន្តហោះចម្បាំង J-20 ថ្មីរបស់ខ្លួន
ក្នុងឱកាសពិព័ណ៌អាកាសចរណ៍ ដែលកំពុងប្រព្រឹត្តិទៅនៅទីក្រុងជូហៃ ប្រទេសចិន ចិនបានបង្កការភ្ញាក់ផ្អើលដ៏ធំមួយ ដោយបានបញ្ចេញយន្តហោះចម្បាំងថ្មីឈ្មោះ J-20 របស់ខ្លួនចំនួន២គ្រឿង មកហោះកាច់កុងលើមេឃបង្អួតអ្នកទស្សនាពិព័ណ៌។ យន្តហោះចម្បាំងស្នាដៃចិន ប្រកបដោយបច្ចេកវិទ្យាទំនើបនេះ បានកសាងឡើងដោយស្ងាត់ៗ ហើយវាបង្ហាញឲ្យកាន់តែច្បាស់ អំពីមហិច្ឆិតាយោធារបស់ចិន ក្នុងតំបន់អាស៊ីប៉ាស៊ីហ្វិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ព្រឹកថ្ងៃអង្គារទី១ វិច្ឆិកា ក្រោមផ្ទៃមេឃស្រលះ អមដោយរស្មីព្រះអាទិត្យចែងចាំង មនុស្សម្នាដែលចូលរួមពិព័ណ៌អាកាសចរណ៍នៅក្រុងជូហៃ ភាគខាងត្បូងប្រទេសចិន បាននាំគ្នាងើយមុខភ្នែកសំឡឹងទៅលើ ដើម្បីស្ញប់ស្ញែង ក្បួនយន្តហោះទាហានរបស់ចិន ដែលហោះដាំក្បាលចុះឡើង។ ស្រាប់តែហៀបនឹងចប់ យន្តហោះចម្បាំងពីរគ្រឿងថ្មីស្រឡាង បានហោះត្រង់ឆ្ពោះឡើងទៅលើ មុននឹងដាំក្បាលចុះមកវិញ បន្តដំណើរវិលចុះវិលឡើង។ អ្នកទស្សនាបានស្រែកអបអរហ៊ោរកញ្ជ្រៀក បន្ទាប់ពីបានដឹងថានេះគឺជាយន្តហោះចម្បាំងទំនើប ទើបបកពីកេស របស់ចិនមានឈ្មោះថា J-20។
ការស្ថាបនាយន្តហោះចម្បាំងស្នាដៃផលិតរបស់ចិននេះ ត្រូវបានលាក់ការសំងាត់យ៉ាងខ្ពស់បំផុត ហើយទើបបានប្រកាសនៅនាទីចុងក្រោយប៉ុណ្ណោះ មុនពេលហោះបង្ហាញ។ តាមរយៈយន្តហោះនេះ ចិនបានបង្ហាញឲ្យឃើញច្បាស់ អំពីសមត្ថភាពបច្ចេកវិទ្យាយោធាផ្លូវអាកាស ដែលចិនកំពុងតែព្យាយាមតាមឲ្យទាន់ ប្រទេសធំៗនានា ដូចជាសហរដ្ឋអាមេរិក និងបារាំង។ រដ្ឋាភិបាលចិន ធ្លាប់បានប្រកាសហើយ ថាចិន កំពុងធ្វើទំនើបភាវូបនីយកម្មនៃវិស័យកងទ័ពរបស់ខ្លួន ដើម្បីធានាការពារសន្តិសុខ មិនថាដែនគោក រឺដែនទឹក។ ដែនទឹក គឺចិន ចង់សំដៅដល់តំបន់សមុទ្រចិនខាងត្បូង ដែលចិនកំពុងមានជម្លោះជាមួយប្រទេសជិតខាងជាច្រើននាក់។
សូមបញ្ជាក់ផងដែរថា ពិព័ណ៌អាកាសចរណ៍ទីក្រុងជូហៃ ធ្វើឡើងពីរឆ្នាំម្តង គឺជាពិព័ណ៌ធំបំផុតនិងតែមួយគត់របស់ចិន ក្នុងវិស័យបច្ចេកវិទ្យាផ្លូវអាកាស។ ក្នុងឱកាសនេះ ចិនបានដាក់តាំងបង្ហាញសមិទ្ធិផលរបស់ខ្លួនជាច្រើន ដូចជាឧត្ថម្ភាគចក្រពាសដែកទំនើប ប្រព័ន្ធបាញ់គ្រាប់មីស៊ីលផ្លូវអាកាស ឧបករណ៍ដ្រូន និងយន្តហោះប្រដេញទំនើបផលិតនៅចិនជាច្រើនគ្រឿង។
ក្រុមហ៊ុនបរទេសក្នុងវិស័យបច្ចេកវិទ្យាផ្លូវអាកាសចំនួន៤២ ក៏មានមុខក្នុងពិធីតាំងពិព័ណ៌នេះដែរ។ ជាងនេះទៅទៀត ការតាំងពិព័ណ៌នេះ គឺជាឱកាសដែលក្រុមហ៊ុនបរទេសធំៗ ទាំងនេះ អាចបង្ហាញផលិតផលនិងសមត្ថភាពខ្លួន ដើម្បីវាយលុកទីផ្សារចិន។ យោងតាមការប៉ាន់ស្មានរបស់សមាគមដឹកជញ្ជូនផ្លូវអាកាសអន្តរជាតិIATA បានឲ្យដឹងថា នៅរវាងឆ្នាំ២០២៤ ចិននឹងមានទីផ្សារដឹកជញ្ជូនផ្លូវអាកាស ធំជាងគេបង្អស់ ក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ