អ្នកអវកាសចិន២រូប បានចុះមកដល់ដីវិញ ជាមួយក្បាលយានShenzhou-11
បណ្តាញព័ត៌មានចិន កំពុងអបអរសាទរ អំពីជោគជ័យនៃបេសកកម្មបញ្ជូនមនុស្ស ឡើងទៅលើលំហអាកាស រយៈពេលវែងមិនធ្លាប់មានសម្រាប់ចិន។ អ្នកអវកាសទាំងពីររូបរបស់ចិន បានចុះមកដល់ដីវិញ នៅថ្ងៃទី១៨ វិច្ឆិកានេះ តាមរយៈក្បាលកាប់ស៊ុលនៃយាន ឆិនជូទី១១(Shenzhou-11) បន្ទាប់ពីបានធ្វើបេសកកម្មរយៈពេល៣៣ថ្ងៃ នៅស្ថានីយ៍ពិសោធន៍អវកាសចិន ដែលស្ថិតនៅលើខ្សែអកប៊ីតផែនដី។
ចុះផ្សាយនៅថ្ងៃ៖ កែប្រែថ្ងៃទី៖
តក់តក់ពេញបំពង់។ ការប្រឹងប្រែងផ្នែកអវកាសរបស់ចិន កំពុងស្ថិតនៅលើចំណុចមួយគួរឲ្យកោតសរសើរ។ បេសកកម្មបញ្ជូនមនុស្សឡើងទៅធ្វើការស្រាវជ្រាវនៅក្នុងលំហ នៃខ្សែអកប៊ីតរបស់ផែនដី មិនមែនជារឿងងាយ ហើយអ្វីដែលលំបាកបំផុតនោះ គឺធ្វើយ៉ាងណាយកមនុស្សត្រលប់មកវិញ ប្រកបដោយសុវត្ថិភាព។
ក្បាលកាប់ស៊ុលនៃយានShenzhou-11 របស់ចិន បាននាំយកអ្នកអវកាសចិនពីររូបត្រលប់មកវិញ ដោយបានចុះមកដល់ដី នៅខេត្តម៉ុងហ្គោលីខាងក្នុង នៅថ្ងៃទី១៨វិច្ឆិកានេះ វេលាម៉ោង២រៀល ម៉ោងក្នុងប្រទេសចិន។ ទូរទស្សន៍ចិន បានផ្តិតយករូបភាពចុះចតនៃឆ័ត្រយោងដែលបានសណ្តោងក្បាលកាប់ស៊ុលនេះមកដល់ដី។ តែយ៉ាងណា គេពុំបានឃើញរូប អ្នកអវកាស ដើរចេញពីក្បាលកាប់ស៊ុលនេះទេ។ ប្រធានបេសកកម្មអវកាសនេះ បានថ្លែងប្រកាសថា នេះគឺជាជោគជ័យ និងជាមោទនភាពធំបំផុតរបស់ក្រុមអ្នកវិទ្យាសាស្ត្រចិន។
សូមរំលឹកថា អ្នកអវកាសចិនទាំងពីររូប ដែលមានឈ្មោះ Jing Haipeng និង Chen Dong បានចេញដំណើរកាលពីថ្ងៃទី១៧តុលា ដើម្បីធ្វើបេសកកម្មរយៈពេល៣៣ថ្ងៃ នៅក្នុងស្ថានីយ៍ពិសោធន៍អវកាសចិន ឈ្មោះTiangong-2 ។ ក្នុងរយៈពេលនេះ អ្នកអវកាស បានធ្វើការពិសោធន៍ ដូចជាការដាំរុក្ខជាតិ ការចិញ្ចឹមសត្វដង្កូវនាង និងបានចេញមកខាងក្រៅស្ថានីយ៍ ដើម្បីធ្វើការជួសជុល។ ក្នុងពេលបំពេញបេសកកម្មនេះ អ្នកអវកាសទាំងពីរ បានថែមទាំងនិយាយឆ្លើយឆ្លងជាមួយក្រុមគ្រូពេទ្យ ដើម្បីតាមដានពីស្ថានភាពសុខភាពរបស់ពួកគេ។ ជាងនេះទៅទៀត អ្នកអវកាសទាំងពីរ បាននិយាយឆ្លើយឆ្លងតាមទូរស័ព្ទជាមួយលោកស៊ី ជីនពីង ពីលើខ្សែអកប៊ីត ហើយដែលបណ្តាញសារព័ត៌មានចិន បានចុះផ្សាយយ៉ាងគគ្រិកគគ្រេង។
សូមបញ្ជាក់ថា ស្ថានីយ៍អវកាស Tiangong-2 នេះ គឺជាស្ថានីយ៍ពិសោធន៍របស់ចិន ដែលស្ថិតនៅកំពស់៣៩៣គីឡូម៉ែត្រក្នុងខ្សែអកប៊ីត។ ចំណែក ស្ថានីយអវកាសអន្តរជាតិISS របស់អាមេរិក ជប៉ុន អឺរ៉ុប និងរុស្ស៊ី វិញនោះ មិនមានការចូលរួមរបស់ចិនទេ ហើយស្ថានីយ៍នេះ និងឈប់ដំណើរការក្នុងរយៈពេល៦ឆ្នាំទៀត។ ចិនមានគម្រោងស្ថាបនាស្ថានីយអន្តរជាតិថ្មី ដោយខ្លួនឯង ក្នុងរវាង៦ឆ្នាំទៀត បន្ទាប់ពីស្ថានីយ៍ISSឈប់ដំណើរការ។
មហិច្ឆតាអវកាសរបស់ចិន កំពុងក្លាយជាការពិត។ រដ្ឋាភិបាលចិន បានចំណាយប្រាក់រាប់ពាន់លានដុល្លារក្នុងវិស័យនេះ ដើម្បីចង់ដើរតាមឲ្យទាន់សហរដ្ឋអាមេរិក រុស្ស៊ី និងអឺរ៉ុប។ ក្រសួងការពារជាតិចិនផ្ទាល់ គឺជាអ្នកចាត់ចែងការស្រាវជ្រាវ និងបេសកកម្មអវកាស។ ក្រៅពីបេសកកម្មបញ្ជូនមនុស្សទៅស្ថានីយ៍អវកាសក្នុងរយៈពេលវែង ចិនក៏មានបេសកកម្ម បញ្ជូនមនុស្សទៅស្រាវជ្រាវនៅឋានព្រះចន្ទផងដែរ។ កាលពីឆ្នាំ២០១៣ ចិនបានបញ្ជូនយានរ៉ូបូ Chang’e-3 របស់ខ្លួនទៅចុះចតលើឋានព្រះចន្ទបានសម្រេចរួចមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ