ប្រជាជនហុងកុង ធ្វើបាតុកម្មប្រឆាំងនឹងការកាត់ទោស លើមេក្រុមយុវជនប្រជាធិបតេយ្យ៣រូប
កាលពីថ្ងៃអាទិត្យទី ២០ សីហា ប្រជាជនហុងកុង រាប់ពាន់នាក់ បាននាំគ្នាធ្វើបាតុកម្ម នៅខាងមុខតុលាការឧទ្ធរណ៍ហុងកុង ដើម្បីទាមទារឲ្យតុលាការ ដោះលែងសកម្មជនប្រជាធិបតេយ្យហុងកុង ៣នាក់ដែលតុលាការនេះ បានផ្តន្ទាទោសឲ្យជាប់ពន្ធនាគារ។ សកម្មជនទាំងបីនាក់នោះ គឺជាមេក្រុមបះបោរឆ័ត្រលឿង ដែលបានដឹកនាំការធ្វើបាតុកម្មទាមទារលិទ្ធិប្រជាធិបតេយ្យ កាលពីខែកញ្ញា ឆ្នាំ២០១៤។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
រូបភាពនៃការធ្វើបាតុកម្ម ជាមួយនឹងបាតុកររាប់ពាន់នាក់ មិនថាចាស់ឬក្មេង នៅតាមផ្លូវ ក្នុងទីក្រុងហុងកុង កាលពីរសៀលថ្ងៃអាទិត្យ ទី២០សីហា បានធ្វើឲ្យគេនឹកឃើញទៅដល់ មហាបាតុកម្មកាលពីខែកញ្ញា ឆ្នាំ២០១៤។ គឺក្នុងមហាបាតុកម្មនោះហើយ ដែលយុវជនហុងកុងបីរូប ត្រូវបានអាជ្ញាធរ ចាប់ឃាត់ខ្លួន បញ្ជូនទៅតុលាការ។
យុវជនទាំងបីមានឈ្មោះJoshua Wong Nathan Law និង Alex Chow ត្រូវបានតុលាការឧទ្ទរណ៍កោះហុងកុង សម្រេចផ្តន្ទាទោសឲ្យជាប់ពន្ធនាគារ ចន្លោះពី៦ ទៅ៨ខែ ពីបទដឹកនាំការបះបោរធ្វើបាតុកម្ម។ ប្រជាជនរាប់ពាន់នាក់ បានមកតវ៉ា នៅខាងមុខតុលាការឧទ្ធរណ៍ នៅថ្ងៃអាទិត្យ ដើម្បីបរិហារអំពីសាលក្រមនេះ ដែលពួកគេចាត់ទុកថាជាសារគំរាម កំញើញដល់ស្មារតីរបស់យុវជនហុងកុង ពីសំណាក់ រដ្ឋាភិបាលចិនប៉េកាំង។
បាតុករម្នាក់ ឈ្មោះ William Cheung បានលើកឡើងថា កាលពីតុលាការដំបូង ចៅក្រមគ្រាន់តែបានសម្រេចឲ្យយុវជនទាំងបីខាងលើ បំពេញពលកម្មដើម្បីប្រយោជន៍សាធារណៈ ពោលគឺមិនមានទោសជាប់ពន្ធនាគារទេ។ ក៏ប៉ុន្តែអាជ្ញាធរហុងកុង ដែលទទួលបញ្ជារពីប៉េកាំង បានដាក់ពាក្យប្តឹងឧទ្ធរណ៍ ដើម្បីទាមទារឲ្យតុលាការឧទ្ធរណ៍ ដាក់ទោសឲ្យធ្ងន់ជាងនេះ ទៅលើយុវជនប្រជាធិបតេយ្យទាំង៣។ សម្រាប់លោក នេះគឺជាភស្តុតាង យ៉ាងច្បាស់នឹងភ្នែក អំពីការប្រើអំណាចផ្តាច់ការរបស់ប៉េកាំង មកលើដែនដីស្វ័យ័តហុងកុង។
ចំណែក កញ្ញា Anne Lee និស្សិតវ័យ១៩ឆ្នាំម្នាក់ ដែលមានវត្តមានក្នុងបាតុកម្មនេះដែរ បានលើកឡើងថា សេចក្តីសម្រេចរបស់តុលាការឧទ្ធរណ៍នេះ គឺជាការគំរាម បំភិតបំភ័យ ពីសំណាក់គណបក្សកុម្មុនីស្តិចិន មកលើចលនាបះបោររបស់យុវជនហុងកុង ដែលស្រលាញ់ចង់បានលទ្ធិប្រជាធិបតេយ្យ។
គួររំលឹកថា មហាបាតុកម្មបះបោរឆ័ត្រលឿង ដែលមានអ្នកចូលរួម ភាគច្រើន ជាសិស្សនិស្សិត នោះ បានចាប់ផ្តើមឡើង នៅរវាងចុងខែកញ្ញាឆ្នាំ២០១៤ ហើយបានអូសបន្លាយ អស់រយៈពេល២ខែ។ ក្រុមបាតុករឆ័ត្រលឿង បានធ្វើការតវ៉ា ទាមទារឲ្យប្រជាជនហុងកុង បានទទួលសិទ្ធិបោះឆ្នោតជ្រើសរើសមេដឹកនាំខ្លួន ដោយសេរី និងតាមក្រឹត្យក្រមនៃលទ្ធិប្រជាធិបតេយ្យ មិនមែនជាមេដឹកនាំដែលប៉េកាំងជាអ្នកចាត់តាំងមកនោះទេ។ សូមបញ្ជាក់ថា បើតាមកិច្ចព្រមព្រៀងរវាងចិន និងអង់គ្លេសកាលពីឆ្នាំ១៩៩៧ ហុងកុងត្រូវស្ថិតនៅជាដែនដីស្វ័យ័ត “ប្រទេសតែមួយ ប្រព័ន្ធគ្រប់គ្រងពីរផ្សេងគ្នា” យ៉ាងហោចណាស់ រហូតដល់ឆ្នាំ២០៤៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ