ហ្វីលីពីន៖ប្រធានាធិបតីចប់តំណែង អំពាវនាវឲ្យប្រជាជនក្រោកឈរប្រឆាំងប្រធានាធិបតីថ្មី
នៅមិនដល់មួយខែទៀត លោកអាគីណូ ប្រធានាធិបតីហ្វីលីពីន ដែលត្រូវចប់អាណត្តិ នឹងត្រូវធ្វើការផ្ទេរតំណែងទៅឲ្យប្រធានាធិបតីថ្មី គឺលោក រ៉ូឌ្រីហ្គោ ឌុយទែតេ។ ក៏ប៉ុន្តែ នៅថ្ងៃអាទិត្យទី១២មិថុនានេះ លោកអាគីណូ បានធ្វើការអំពាវនាវ ឲ្យប្រជាជនហ្វីលីពីនទាំងអស់ ក្រោកឈរឡើង ដើម្បីការពារសិទ្ធិសេរីភាព តទល់នឹងលោកប្រធានាធិបតីថ្មី ដែលជាមនុស្សផ្តាច់ការ និងនិយមអំពើហិង្សាកាប់សម្លាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ថ្ងៃទី៣០មិថុនា គឺជាថ្ងៃដែលលោក បេនីកណូ អាគីណូ ត្រូវផ្ទេរតំណែងប្រធានាធិបតីហ្វីលីពីន ទៅឲ្យលោក រ៉ូឌ្រីហ្គោ ឌុយទែតេ។ លោករ៉ូឌ្រីហ្គោ ឌុយទែតេ បានឈ្នះការបោះឆ្នោតយ៉ាងសន្ធឹកសន្ធាប់ កាលពីដើមខែឧសភា ដោយសារតែបានសន្យាថា និងចំណាយពេលតែ៦ខែប៉ុណ្ណោះ ដើម្បីកំចាត់អំពើឧក្រិដ្ឋកម្ម ព្រមទាំងសម្លាប់ពួកជនទុច្ចរិតឲ្យអស់ពីហ្វីលីពីន។
ប៉ុន្តែសម្រាប់លោក អាគីណូ ប្រធានាធិបតីចប់អាណត្តិ លោកឌុយទែតេ គឺជាមនុស្សហិង្សាផ្តាច់ការ ដែលនឹងធ្វើឲ្យហ្វីលីពីនជួបគ្រោះថ្នាក់។ នៅថ្ងៃនេះ លោកអាគីណូ បានអំពាវនាវឲ្យប្រជាជនហ្វីលីពីន ក្រោកឈរឡើង ដើម្បីតស៊ូ ប្រយុទ្ធនឹងសកម្មភាពផ្តាច់ការ ហិង្សារបស់អនាគតប្រធានាធិបតីថ្មី ដែលមិនគោរពទៅលើសិទ្ធិសេរីភាពរបស់ប្រជាពលរដ្ឋ។ លោកអាគីណូ បានថ្លែងនៅចំពោះមុខ ប្រមុខការទូតបរទេសជាច្រើននាក់ ប្រចាំនៅក្រុងម៉ានីលថា ហ្វីលីពីនធ្លាប់ឆ្លងកាត់បទពិសោធន៍ ដោយបានជាប់ក្នុងក្រញ៉ាំ របស់មេដឹកនាំផ្តាច់ការ គឺលោក Marcos ដូច្នេះហ្វីលីពីន ត្រូវតែប្រយត្ន័ប្រយែង ដើម្បីកុំឲ្យប្រវត្តិសាស្ត្រដើរជាន់ដាន។ ក្នុងន័យនេះ លោកអាគីណូ បានសំដៅដោយចំៗថា លោកឌុយទែតេ អនាគតប្រធានាធិបតីថ្មី គឺជាមនុស្សផ្តាច់ការបំផុត ហើយប្រជាជនហ្វីលីពីន នឹងពិតជារងទុក្ខ។
គួរបញ្ជាក់ថា លោកឌុយទែតេ បានសន្យាថា និងសម្លាប់មេក្លោងជួញគ្រឿងញៀន ព្រមទាំងក្រុមឧក្រិដ្ឋកម្មទាំងអស់ ក្នុងរយៈពេល៦ខែ។ លោកថែមទាំងបានសន្យាថានឹងឲ្យរង្វាន់ ដល់អាជ្ញាធរនគរបាល រឺក៏ប្រជាជនសាមញ្ញណា ដែលបានសម្លាប់ពួកជនទុច្ចរិត។ បន្ថែមពីនេះ លោកអនាគតប្រធានាធិបតីរូបនេះ បានទាំងនិយាយគំរាមថា នឹងបិទសភាចោល បើសិនជាសភារារាំងកិច្ចការងាររបស់គាត់ ហើយគាត់នឹងធ្វើរដ្ឋធម្មនុញ្ញបដិវដ្តន៍ថ្មីមួយ សម្រាប់ហ្វីលីពីន។
យ៉ាងណាមិញ ក្នុងរយៈពេល២សប្តាហ៍ចុងក្រោយនេះ អាជ្ញាធរហ្វីលីពីន បានសម្លាប់ជនសង្ស័យជាបក្សពួកជួញដូរគ្រឿងញៀន ចំនួន២០នាក់។ ក្រុមអាជ្ញាធរបានបញ្ជាក់ថា ពួកគេបានទទួលការជំរុញពីលោកប្រធានាធិបតីថ្មី បើទោះបីជាលោក ពុំទាន់ចូលកាន់មុខតំណែងជាផ្លូវការក៏ដោយ។ ដោយឡែក ភ្នាក់ងារយកព័ត៌មានបារាំង បានរាយការណ៍អំពីសកម្មភាព តាមប្រម៉ាញ់ នឹងចាប់មនុស្សនៅតាមតំបន់អាណាធិបតេយ្យ ក្នុងក្រុងម៉ានីល ដោយមានចាប់ទាំងក្មេងៗ ដោយឥតរើសមុខ។
ក្រុមអង្គការនិងសកម្មជនសិទ្ធិមនុស្សនៅហ្វីលីពីន បានបរិហារពីចំណាត់ការបែបសាហាវព្រៃផ្សៃ របស់អនាគតប្រធានាធិបតី ដោយលោកបានបើកដៃឲ្យមានការបាញ់សម្លាប់កាត់ទោស ក្រៅប្រព័ន្ធតុលាការ។ នៅទីក្រុងDavao ដែលលោកឌុយទែតេធ្លាប់ជាអភិបាល ត្រូវបានសកម្មជនសិទ្ធិមនុស្សចោទថាលោកម្នាក់នេះ បានបញ្ជាឲ្យមានប្រតិបត្តិការចុះបង្រ្កាបនិងសំលាប់ឆៅៗ ទៅលើជនសង្ស័យ ដោយពុំមានការស៊ើបអង្កេត រកសខ្មៅអ្វីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ