អ៊ុង សាន់ស៊ូជី ប្រឆាំងនឹងច្បាប់ ហាមស្ត្រីរៀបការជាមួយបុរសដែល មានសាសនាផ្សេងគ្នា
ជម្លោះសាសនាក៏កាន់តែឡើងកម្ដៅ នៅប្រទេសភូមា ដែលវាជាប្រធានបទ មួយចោទឡើងរវាង អ្នកដែលកាន់សាសនាព្រះពុទ្ធ និងសាសនាឥស្លាម។ លោកស្រី អ៊ុងសានស៊ូជី (Aung San Suu Kyi) ប្រធានគណបក្សប្រឆាំង នៅភូមាបានបដិសេធគម្រោងច្បាប់ ថ្មីស្តីអំពីការហាមឃាត់ស្រ្តីភូមា ដែលកាន់ព្រះពុទ្ធសាសនា រៀបការជាមួយបុរស ដែលកាន់សាសនាផ្សេងទៀត។
ចុះផ្សាយនៅថ្ងៃ៖
ស្តាប់ - ០២:២២
លោកស្រី អ៊ុង សានស៊ូជី បានប្រកាសប្រឆាំងចំពោះសេចក្តីស្នើអនុម័តច្បាប់ថ្មីមួយ ដែលហាមឃាត់ស្រ្តីកាន់ព្រះពុទ្ធសាសនា រៀបការជាមួយបុរសដែលកាន់សាសនាផ្សេងគ្នា។ បច្ចុប្បន្ន នៅប្រទេសភូមា កម្ដៅជម្លោះសាសនា កំពុងតែមានការកើនឡើង រវាងអ្នកដែលកាន់សាសនាព្រះពុទ្ធ និងឥស្លាម។ នេះបើតាម ការប្រកាសរបស់លោកស្រី កាលពីព្រឹកមិញ នៅតាមវិទ្យុអាស៊ីសេរីក្នុងប្រទេសភូមា។
សេចក្តីស្នើ ច្បាប់នេះ គឺបានរៀបចំដោយក្រុមថ្នាក់ដឹកនាំព្រះសង្ឃព្រះពុទ្ធសាសនា នៅប្រទេស ភូមា ដែលគេដឹងថាក្រុមនេះ បានធ្វើឱ្យមានការប៉ះទង្គិចគ្នាមួយ រវាងអ្នកកាន់សាសនាឥស្លាម កាលពីខែមុន។ ក្រុមខាងលើចង់ឱ្យ មានការអុនម័តច្បាប់នេះឡើង ដោយតម្រូវឱ្យបុរសកាន់សាសនាផ្សេង ដែលចង់រៀបការជាមួយ ស្រ្តីសាសនាព្រះពុទ្ធ ប្តូមកកាន់សាសនាព្រះពុទ្ធវិញដែរ។ ដោយបុគ្កលនោះ ត្រូវស្មើសុំ ការអនុញ្ញាតជាមុនសិន ទៅឪពុក ម្តាយខាងស្រី។ បើអ្នកដែលល្មើស អាចប្រឈមនឹងការជាប់ពន្ធាគាចំនួន ១០ឆ្នាំ។
ប្រធានគណៈបក្សប្រឆាំងភូមារូបនេះ បានប្រឆាំងដាច់ខាត ដោយលោកស្រី យល់ថា វាហាក់ដូចជាមានភាព អយុត្តិធម៌ចំពោះស្ត្រី។ ដោយលោកស្រី មិនចង់ឱ្យមានការបែងចែកគ្នារវាងស្រ្តី និងបុរសឡើយ។
សូមបញ្ជាក់ថា មួយរយៈក្រោយនេះ លោកស្រី អ៊ុង សាន់ស៊ូជី ត្រូវបានទទួល ការរិះគន់ ពីសំណាក់អ្នក ក្នុងស្រុក ក៏ដូចជាបរទេស ថាលោកស្រីហាក់ដូចជាបន្ទន់ឥរិយាបទរបស់ខ្លួនជាមួយរដ្ឋាភិបាលភូមាបច្ចុប្បន្ន ទាក់ទងនឹងរឿងជម្លោះសាសនា។ ក្នុងនោះ មតិភាគច្រើនយល់ថា នេះជាចេតនាសម្ចៃមាត់ ក្នុងការបញ្ចេញមតិ ដោយមិនចង់ឱ្យមានការអន់ចិត្ត ពីសំណាក់ប្រជាជនភូមាភាគច្រើន ដែលកាន់ព្រះពុទ្ធសាសនា សម្រាប់ការបោះឆ្នោត ឆ្នាំ២០១៥ខាងមុខ។
លើកនេះ លោកស្រីចេញមុខប្រតិកម្ម ដោយថា គម្រោងច្បាប់នេះមិនមែនស្ថិតក្នុងច្បាប់របស់ប្រទេសឡើយ វាគ្រាន់តែជាការប្រតិបត្តរបស់អ្នកកាន់សាសនាព្រះពុទ្ធមួយចំនួន ប៉ុណ្ណោះ។ ទាំងនេះ គឺជាការមិនគោរពដល់សិទ្ធិស្ត្រី និងសិទ្ធិមនុស្ស។
គួររម្លឹកថា នៅក្នុងជម្លោះហិង្សាមួយ រវាងក្រុមជនជាតិភាគតិច ខាឃិន(Rakhine) ដែលកាន់សាសនាព្រះពុទ្ធ និងក្រុមអ្នកកាន់សាសនាឥស្លាម រ៉ូហ៊ីនយ៉ា(Rohingyas) កាលពីឆ្នាំមុន បានបណ្តាលឱ្យមានមនុស្សស្លាប់ប្រមាណជាង ២០០នាក់ នៅភាគខាងលិចនៃប្រទេសភូមា។
កាលពីសប្តាហ៍មុននេះដែរ ក្រុមអ្នកដឹកនាំចលនាសាសនាព្រះពុទ្ធ ដែលហៅថាចលនា ៩៦៩ ប្រមាណជាង២០០នាក់ នៅទីក្រុង រ៉ង់ហ្គូន(Rangoun) បាននាំគ្នាឃោសនាឱ្យប្រជាជន ធ្វើពហិការចំពោះអ្នកជំនួញជនជាតិឥស្លាម។ ក៏ប៉ុន្តែគេសង្កេតថាពុទ្ធសាសនិកភាគច្រើន ហាក់ដូចមានទំនោរប្រកាន់កណ្តាល រវាងជម្លោះទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ