សភាចិនកំណត់យកថ្ងៃសម្លាប់រង្គាលដោយកងទ័ពជប៉ុន នៅណានជីងធ្វើជាថ្ងៃបុណ្យរំលឹកការចងចាំ
សភាប្រជាជនចិនបានបោះឆ្នោតកំណត់យកថ្ងៃទី ៣ កញ្ញា ជាថ្ងៃជ័យជំនះ និងថ្ងៃទី ១៣ធ្នូ ធ្វើជាថ្ងៃរំលឹកការចងចាំការសម្លាប់រង្គាលរបស់កងទ័ពជប៉ុន នៅណានជីង។ នេះបើតាមការចុះផ្សាយរបស់កាសែត ចិន កាលពីថ្ងៃព្រហស្បតិ៍ ទី ២៧ កុម្ភៈ។ ទីក្រុងតូក្យួមិនបានធ្វើការអត្ថាធិប្បាយអ្វីច្រើន ដោយលើកហេតុផលថា វាជាកិច្ចការផ្ទៃក្នុងរបស់ចិន។
ចុះផ្សាយនៅថ្ងៃ៖
ស្តាប់ - ០២:១៤
តាមមន្រ្តីជាន់ខ្ពស់របស់ជប៉ុន រដ្ឋាភិបាលជប៉ុនបដិសេធមិនធ្វើអត្ថាប្បាយអ្វីទាំងអស់ទៅលើនយោបាយផ្ទៃក្នុងរបស់ចិន ប៉ុន្តែ ជាមួយគ្នានោះ តូក្យូមិនបដិសេធទេ ពីចម្ងល់ទាំងឡាយ ដែលជប៉ុនកំពុងចោទសួរ។ នោះ គឺថា ហេតុអ្វីបានជាចិនទើបតែកំណត់យកថ្ងៃរំលឹកខួប ព្រឹត្តិការណ៍ដែលកើត នៅណានជីង នៅជាង៦០ឆ្នាំក្រោយសង្រ្គាមលោកលើកទីពីរ យ៉ាងដូច្នេះ។ ទោះជាយ៉ាងណា តូក្យូបញ្ជាក់ថា ជប៉ុន នៅតែមិនផ្លាស់ប្តូរជំហរនយោបាយសន្តិភាពរបស់ខ្លួន ដែលធ្វើឡើង នៅក្រោយចប់សង្រ្គាមលោកលើកទីពីរ។
យោងតាម កាសែតផ្លូវរដ្ឋចិន សមាជិកសភាចិនបានបង្កើតថ្ងៃបុណ្យជាតិចំនួនពីរ ដែលក្នុងនោះ ថ្ងៃទី ៣ កញ្ញា ជាថ្ងៃជ័យជំនះរបស់ចិនទៅលើកងទ័ពជប៉ុន។ ចំណែកថ្ងៃទី ១៣ធ្នូជាថ្ងៃរំលឹកការចងចាំ ដល់ជនរងគ្រោះ ដែលបានស្លាប់ នៅក្នុងអំពើសម្លាប់រង្គាលរបស់ទាហានជប៉ុន នៅខេត្តណានជីង។
នយោបាយបោះមួយជំហានទៅមុខរបស់ចិន កើតឡើងមិនមែនដោយចៃដន្យទេ។ វាកើតឡើង នៅក្នុងពេលចិន និងជប៉ុនកំពុងមានភាពតានតឹងនឹងគ្នា ដោយសារជម្លោះដែនកោះ។ ហើយវាកើតឡើង នៅបន្ទាប់ពីរដ្ឋាភិបាលជប៉ុន បានប្រកាសថា ខ្លួន កំពុងធ្វើការពិចារណា ផ្លាស់ប្តូរជំហរអំពើការសុំទោស ក្នុងរឿងទាសករផ្លូវភេទក្នុងសម័យសង្រ្គាម។ តាមអ្នកប្រវត្តិសាស្រ្តជាច្រើន មានស្រ្តីប្រមាណជា ២០ម៉ឺននាក់ ភាគច្រើនមកពីកូរ៉េ និងចិន ត្រូវបានជប៉ុនចាប់បង្ខំឲ្យធ្វើជាទាសករបម្រើផ្លូវភេទដល់ទាហានជប៉ុន នៅសម័យសង្រ្គាមលោកលើកទីពីរ។
គួររំលឹកថា ជប៉ុនបានចូលឈ្លានពានចិន នៅក្នុងទសវត្សរ៍ ឆ្នាំ ១៩៣០។ ប្រទេសទាំងពីរបានប្រយុទ្ធគ្នា តាំងពីឆ្នាំ ១៩៣៧ ដល់ឆ្នាំ ១៩៤៥។ រហូតមក ប្រទេសចិនបាននិយាយថា មានប្រជាជនចិនប្រមាណ ៣សែននាក់ ត្រូវបានទាហានជប៉ុន ចាប់រំលោភ សម្លាប់ រង្គាល តែរយៈពេល ៦សប្តាហ៍។ ប៉ុន្តែ អ្នកប្រវត្តិសាស្រ្តបរទេសបានវាយតម្លៃថា ជនរងគ្រោះចិនមានចំនួនតិចជាងនេះ ដោយមានប្រជាជនស៊ីវិលស្លាប់តែ ៤២ ០០០នាក់ និងមនុស្សស្រី២ម៉ឺននាក់ត្រូវទាហានជប៉ុនចាប់រំលោភ ដែលភាគច្រើនបានធ្លាក់ខ្លួនស្លាប់។
ព្រឹត្តិការណ៍សម្លាប់រង្គាលរបស់កងទ័ពជប៉ុនទៅលើប្រជាជនចិន នៅណានជីង ចាប់ផ្តើម នៅថ្ងៃទី ១៣ធ្នូឆ្នាំ ១៩៣៧។ យ៉ាងណាក៏ដោយ គេមិនច្បាស់ទេ ថ្ងៃបុណ្យជាតិទាំងពីរខាងលើ នឹងត្រូវរដ្ឋាភិបាលកំណត់យកធ្វើជាឈប់សម្រាកសម្រាប់ប្រជាជនចិននោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ