ប៉ូលិសថៃតាមរកជនរួមគំនិត និងចេញដីកាអន្តរជាតិតាមចាប់ជនសង្ស័យ
អាជ្ញាធរថៃបានប្រកាសនៅថ្ងៃពុធនេះ ថាកំពុងតាមស្វែងរកចាប់ជនរួមគំនិតជួយជនសង្ស័យ បង្កភេរវកម្មបំផ្ទុះគ្រាប់បែកដ៏ធ្ងន់ធ្ងរមិនធ្លាប់មាននៅក្រុងបាងកកកាលពីថ្ងៃចន្ទទី១៧សីហា។ បើតាមភ្នាក់ងារប៉ូលិស ជនសង្ស័យបញ្ចេញសកម្មភាពជាបណ្តាញ។ រូបភាពរ៉ូបូត្រូវបានផ្សព្វផ្សាយ ដីការអន្តរជាតិក៏បានចេញដើម្បីតាមចាប់ជនសង្ស័យ ដែលទំនងជាជនបរទេស។
ចុះផ្សាយនៅថ្ងៃ៖ កែប្រែថ្ងៃទី៖
បន្ទាប់ពីបានចាក់ផ្សាយយ៉ាងទូលំទូលាយរូបភាពវីដេអូសុវត្ថិភាព បង្ហាញពីជនសង្ស័យ ពាក់អាវយឺតពណ៌លឿង យកកាបូបស្ពាយខ្នង សាក់កាដូ ទៅផ្លុងនៅទីសក្ការៈអេរ៉ាវ៉ាន់ មុនការផ្ទុះបន្តិចមក នៅថ្ងៃនេះ មេប៉ូលិសថៃ លោក Somyot Poompanmoung បានអះអាងទៅកាន់អ្នកកាសែតថា ជនឧក្រិដ្ឋមិនអាចធ្វើសកម្មភាពតែម្នាក់ឯងទេ គឺមានបណ្តាញ!។ ដូច្នេះហើយបានជាប៉ូលិសបានប្រកាសរកភស្តុតាង និងផ្តល់រង្វាន់មួយលានបាត ដល់ជនណាដែលបានផ្តល់ព័ត៌មាននាំដល់ការចាប់ខ្លួនជនសង្ស័យ ព្រមទាំងកំពុងស្វែងរកចាប់ជនសង្ស័យផ្សេងទៀត។
ប៉ូលិសថៃបានរកឃើញនិងចោទសួរអ្នកបើកបរម៉ូតូតាក់ស៊ី ដឹកជនសង្ស័យកាលពីល្ងាចថ្ងៃចន្ទ ប៉ុន្តែមិនបានបង្ហើបឱ្យដឹងអំពីខ្លឹមសារលម្អិតនៃសក្ខីកម្មនោះទេ។
មកទល់ពេលនេះ គ្មានជនឬក្រុមណាចេញមុខទទួលស្គាល់ភេរវកម្មទេ ! ប៉ូលិសថៃក៏មិនផ្តល់អាទិភាពលើដានមួយណាដែរ បើទោះបីជាគេសន្និដ្ឋានឃើញថារបៀបវាយប្រហារនៅបាងកកខុសពីការវាយប្រហារភេរវកម្មរបស់ពួកឧទ្ទាមអ៊ីស្លាមជ្រុលនិយមនៅភាគខាងត្បូងប្រទេស និងខុសពីសកម្មភាពរបស់ពួកអាវក្រហម សកម្មជនប្រឆាំងនឹងរដ្ឋាភិបាលសឹកក៏ដោយ។ ប៉ូលិសថៃ កំពុងផ្ចង់ចក្ខុទៅលើពួកអ៊ុយហ្គួរ។
ទាក់ទងនឹងគ្រាប់ផ្ទុះទីពីរ នៅថ្ងៃបន្ទាប់វិញ ប៉ូលិសថៃបានទទួលស្គាល់ថាមានលក្ខណៈស្រដៀងគ្នា ធ្វើពីធាតុផ្សំTNT ដូចគ្នា ប៉ុន្តែពុំទាន់អាចភ្ជាប់ហេតុការណ៍ទាំងពីរនេះបាននៅឡើយទេ។
ថ្ងៃនេះទីសក្ការៈអេរ៉ាវ៉ាន់ បានបើកទ្វារទទួលភ្ញៀវទេសចរវិញ ប៉ុន្តែវិធានការសន្តិសុខត្រូវបានពង្រឹងយ៉ាងខ្លាំង លើគ្រប់ទីតាំងទេសចរណ៍របស់ក្រុង និងមជ្ឈមណ្ឌលពាណិជ្ជកម្មធំៗជិតកន្លែររងគ្រោះ។ ថ្វីបើថៃធ្លាប់ឆ្លងកាត់វិបត្តិនយោបាយ និងហិង្សាអូសបន្លាយមែន ប៉ុន្តែមិនដែលជួបគ្រោះភេរវកម្មបំផ្ទុះគ្រាប់បែកដូច្នេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ