ចលនាប្រឆាំងនឹងច្បាប់ការពារជាតិជប៉ុនកាន់តែរីកធំធាត់
បណ្តាជនជប៉ុនរាប់សិបពាន់នាក់ បានប្រមូលផ្តុំគ្នាយ៉ាងច្រើនកុះករ នៅមុខសភាជាតិជប៉ុន នាទីក្រុងតូក្យូ និងតាមបណ្តាខេត្តផ្សេងៗទៀត នៅថ្ងៃអាទិត្យនេះ ដើម្បីបរិហារប្រឆាំងនឹងគម្រោងច្បាប់ការពារជាតិថ្មីរបស់រដ្ឋាភិបាលលោក ស៊ីនហ្សូ អាបេ ដែលចង់ពង្រីកសកម្មភាពយោធាជប៉ុន លើឆាកសមរភូមិអន្តរជាតិ។ គម្រោងច្បាប់ដែលពេលនេះ បានបញ្ជូនទៅដល់ដៃសភា ដើម្បីត្រួតពិនិត្យនិងអនុម័ត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
បាតុកម្មថ្ងៃអាទិត្យនេះ បានស្តែងឱ្យឃើញអំពីការប្រមូលផ្តុំកាន់តែធំឡើងៗក្នុងផ្ទៃប្រទេស ខណៈដែលនាយករដ្ឋមន្ត្រីអភិរក្សនិយម ស៊ិនហ្សូ អាបេ និងគណបក្សសេរីប្រជាធិបតេយ្យកំពុងបញ្ចុះបញ្ចូលសភាឱ្យអនុម័តសំណើច្បាប់ការពារជាតិ នាឱកាសសម័យប្រជុំសភាខែកញ្ញានេះ។
ទោះបីជាអាកាសធាតុមិនល្អ មានភ្លៀងធ្លាក់ឥតឈប់ស្ទើរពេញមួយថ្ងៃ ក៏បាតុករនៅតែមានចំនួនច្រើន មកប្រមូលផ្តុំគ្នាលើកបដាស្រែក “សុំសន្តិភាព” និងបដិសេធសង្គ្រាម” ព្រមទាំងបដាដ៏ធំព័ទ្ធជុំវិញដោយប៉េងប៉ោងខ្មៅស ទាមទារឱ្យលោក ស៊ីនហ្សូ អាបេ ចុះចេញពីតំណែង។
សកម្មជនបក្សប្រឆាំង មានជាអាទិ៍ប្រមុខដឹកនាំបក្សប្រជាធិបតេយ្យជប៉ុន បានចុះដើរជាមួយក្រុមនិស្សិត ដែលខ្លះបានធ្វើកូដកម្មអត់អាហារតាំងពីថ្ងៃព្រហស្បតិ៍មក ជនសាមញ្ញជាមេគ្រួសារ មនុស្សចាស់ និងសិល្បករ បាននាំគ្នាចេញធ្វើបាតុកម្ម ដោយសំអាងថាមិនអាចឈរអោបដៃស្ងៀមមើលជប៉ុនចេញធ្វើសង្គ្រាមជាថ្មីទៀតបាន។
នៅក្នុងគម្រោងកំណែទម្រង់ច្បាប់ការពារជាតិជប៉ុនថ្មីនេះ រដ្ឋាភិបាលចង់ពង្រីកសកម្មភាពយោធានៅក្រៅប្រទេស មិនមែនត្រឹមតែឈរជើងនៅក្នុងរង្វង់បូរណភាពជាតិឡើយ។ មិនតែប៉ុណ្ណោះ យោធាជប៉ុនអាចនឹងមានលទ្ធភាពចេញធ្វើប្រតិបត្តិការអន្តរជាតិដើម្បីជួយសម្ព័ន្ធមិត្តជួបការលំបាក ជាពិសេសនិងដំបូងគេគឺជួយសម្ព័ន្ធមិត្តអាមេរិក ក្នុងក្របខ័ណ្ឌការពារប្រយោជន៍សមូហភាព បើទោះបីជាជប៉ុនមិនប្រឈមនឹងការគំរាមកំហែងដោយផ្ទាល់ក៏ដោយ។
ប៉ុន្តែប្រជាពលរដ្ឋជប៉ុនភាគច្រើន ប្រឆាំងនឹងគំនិតផ្តួចផ្តើមពង្រីកសកម្មភាពទាហាន ដែលមានប្រវត្តិជាអ្នកសន្តិនិយម និងស្វ័យការពារ ដោយខ្លាចជប៉ុនធ្លាក់ក្នុងអន្ទាក់សង្គ្រាមនៅឆ្ងាយៗពីប្រទេស។ សម្រាប់លោកអាបេ និងសកម្មជនការកែប្រែច្បាប់នេះដែលអាមេរិកគាំទ្រយ៉ាងពេញទំហឹង ជាប្រការចាំបាច់ បើមើលទៅលើមហិច្ឆតាយោធាចិន និងឥរិយាបថមិនប្រាកដប្រជារបស់កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ