រលកតវ៉ារបស់ប្រជាជន និងអ្នកតំណាងរាស្រ្តដែលប្រឆាំងនឹងច្បាប់ការពារជាតិថ្មីរបស់លោកអាបេ
គណៈកម្មការសភាជាតិជប៉ុន នៅថ្ងៃពុធទី ១៥កក្កដា ២០១៥ បានបោះឆ្នោតអនុម័ត សេចក្តីព្រាងច្បាប់ឈ្មោះ សន្តិសុខ ដែលស្នើឡើងដោយលោកនាយករដ្ឋមន្រ្តីជប៉ុន ស៊ីនហ្សូ អាបេ។ សេចក្តីព្រាងច្បាប់ថ្មី ដែលនឹងបើកភ្លើងខៀវឲ្យកងទ័ពជប៉ុនមានសិទ្ធិចេញទៅធ្វើប្រតិបត្តិការអន្តរាគមន៍ ក្នុងជម្លោះ អន្តរជាតិ ត្រូវរងទទួលការរិះគន់ ពីក្រុមអ្នកស្រឡាញ់សន្តិភាព នៅជប៉ុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ចលនាប្រឆាំងនឹងនយោបាយការពារជាតិនិយមរបស់លោកនាយករដ្ឋមន្រ្តីស៊ីនហ្សូ អាបេ មានកាន់តែច្រើន នៅក្នុងប្រទេសជប៉ុន។ នៅទីក្រុងតូក្យូ ប្រជាជនជប៉ុន ដែលមានតាំងពីនិស្សិត និងមនុស្សចាស់ ប្រមាណ ២ម៉ឺននាក់បានធ្វើបាតុកម្ម ប្រឆាំងនឹងកំណែទម្រង់ច្បាប់ការពារជាតិ ដែលលោក នាយករដ្ឋមន្រ្តី ជប៉ុនបានដាក់ស្នើឲ្យគណៈកម្មការសភាជាតិអនុម័ត នៅថ្ងៃពុធនេះ។
សេចក្តីព្រាងច្បាប់ការពារជាតិថ្មី មាននិយាយពីការបកស្រាយរដ្ឋធម្មនុញ្ញសន្តិភាព ដើម្បីពង្រីកដែន តួនាទីកងទ័ពជាតិជប៉ុន ដែលបច្ចុប្បន្ន នេះ មានសិទ្ធិត្រឹមតែស្វ័យការពារប៉ុណ្ណោះ។ តាមសេចក្តីព្រាងច្បាប់ថ្មី ជប៉ុននឹងអាចបញ្ជូនកងទ័ពទៅជួយសម្ព័ន្ធមិត្ត ដូចជាអាមេរិក នៅក្នុងជម្លោះប្រដាប់អាវុធ ដែលស្ថិតនៅឆ្ងាយពីដែនដីជប៉ុន។ លោកស៊ីនហ្សូ អាបេមកពីក្រុមជាតិ និងអភិរក្សនិយម បាននិយាយការពារច្បាប់ការពារជាតិថ្មីថា មានសារៈសំខាន់ ដើម្បីទប់ទល់ ប្រឈមនឹងគ្រោះថ្នាក់ ជាពិសេស នៅក្នុងកាលៈទេសៈ ដែលចិន ដែលកំពុងបង្កើនអំណាចយោធាកាន់តែខ្លាំង នៅក្នុងតំបន់។
បន្ទាប់ពីភ្លើងខៀវរបស់គណៈកម្មការសភា សេចក្តីព្រាងច្បាប់ ថ្មី នឹងត្រូវដាក់ជូនទៅសភា ឲ្យបោះឆ្នោតអនុម័ត នៅសប្តាហ៍នេះ។ គេរំពឹងថា រដ្ឋាភិបាលចម្រុះ របស់លោកអាបេ ដែលមានសំឡេងភាគច្រើន ទាំងនៅរដ្ឋសភា និងព្រឹទ្ធសភា នឹងគ្មានជួបឧបសគ្គដើម្បីធ្វើឲ្យសេចក្តីព្រាងច្បាប់ការពារជាតិ ទទួលបានការអនុម័ត ពីអ្នកតំណាងរាស្រ្ត។
លោកអាបេទំនងគ្មានឧបសគ្គនៅក្នុងសភា ប៉ុន្តែ នយោបាយពង្រីកតួនាទីកងទ័ពជប៉ុន នៅក្រោមគោលការណ៍ “ការពារសមូហភាព” របស់លោក កំពុងប្រឈមនឹងចលនាប្រឆាំងកាន់តែច្រើន របស់ប្រជាជននៅតាមផ្លូវ។ ប្រជាជនជប៉ុន ដែលខ្លាចថា ជប៉ុននឹងធ្លាក់ជាថ្មី ទៅក្នុងអន្ទាក់ធ្វើសង្រ្គាមរបស់អាមេរិកបានធ្វើបាតុកម្ម ឈប់គាំទ្រនយោបាយរបស់លោកអាបេតទៅទៀត។ តាមកាសែតAsahi ប្រជាប្រិយភាពរបស់លោកអាបេ បានធ្លាក់ចុះជាបន្តបន្ទាប់។ ការស្រង់មតិបង្ហាញថា សំឡេងមិនសប្បាយចិត្តនឹងនយោបាយរបស់លោកអាបេ បានកើនឡើង ដល់៤២ភាគរយ។
អ្នកវិភាគនយោបាយមួយចំនួនចាប់ផ្តើមព្យាករថា លោកអាបេនឹងអាចមានវាសនាដូចជីតា របស់លោក។ កាលពី៥៥ឆ្នាំមុន គឺនៅថ្ងៃទី ១៥ កក្កដា ១៩៦០ កំហឹងរបស់ប្រជាជនជប៉ុនបានធ្វើឲ្យលោកKishi ជីតារបស់លោកអាបេ លាលែង ចេញពីតំណែងនាយករដ្ឋមន្រ្តី បន្ទាប់ពីលោកបានជំរុញឲ្យសភាបោះឆ្នោតអនុម័តលើសន្ធិសញ្ញាស្តីពីសហប្រតិបត្តិការ និងសន្តិសុខ អាមេរិក ជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ