ថៃប្រកាសមានហ្ស៊ីកា ក្នុងពេលOMSទាញអាសន្នថ្នាក់ពិភពលោក
អាជ្ញាធរថៃ បានប្រកាស នៅថ្ងៃអង្គារទី ២កុម្ភៈ ២០១៦នេះ រកឃើញមានករណីកើតហ្ស៊ីកា លើបុរសម្នាក់ នៅក្នុងប្រទេស ប៉ុន្តែថៃបានធានាអះអាងមិនមែនជាការរាតត្បាតឡើយ។ ហ្ស៊ីកាជំងឺឆ្លងតាមរយៈមូសខាំ អាចបង្កឱ្យទារកក្នុងផ្ទៃស្លាប់ឬកើតមកមានក្បាលតូចខុសប្រក្រតី ទើបត្រូវបានអង្គការសុខភាពពិភពលោកប្រកាសអាសន្នអំពីការរាតត្បាត និងអំពីការបង្កគ្រោះថ្នាក់កំរិតពិភពលោក កាលពីថ្ងៃចន្ទទី ១កុម្ភៈ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
អាជ្ញាធរថៃមិនបានបញ្ជាក់ថា តើបុរសអាយុ២២ឆ្នាំ មានកើតជំងឺហ្ស៊ីកានោះ រស់នៅតំបន់ណាភាគណានៃប្រទេសទេ។ ប៉ុន្តែភ្នាក់ងារសុខាភិបាលថៃ បានអះអាងថា បន្ទាប់ពីធ្វើការវិភាគឈាម អ្នកជំងឺថៃពីជាមានផ្ទុកជាវីរ៉ុសតែមួយ មានប្រភពដូចគ្នានឹងវីរ៉ុសហ្ស៊ីកានៅតំបន់អាមេរិកខាងត្បូង។
សម្រាប់អាជ្ញាធរថៃ នេះមិនមែនជាករណីថ្មី ដែលគួរឱ្យព្រួយបារម្ភ និងផ្អើលឆោឡាថាជាការរាតត្បាតនៃហ្ស៊ីកាទេ ព្រោះជារៀងរាល់ឆ្នាំតាំងពីឆ្នាំ២០១២មក ថៃមានរកឃើញករណីកើតហ្ស៊ីកា ជាមធ្យម៥ករណីក្នុងមួយឆ្នាំ។
ដូចជាជំងឺគ្រុនឈាម បង្កឡើងដោយមូសខ្លា និងជំងឺគ្រុនឈីគុនហ្គុនយ៉ាដែរ ហ្ស៊ីកា ចម្លងមកមនុស្សតាមរយៈមូលខ្លាខាំ និងគ្មានការចម្លងពីមនុស្សទៅមនុស្សទេ។ ហ្ស៊ីកា មានប្រភពនៅអាហ្វ្រិក និងទើបបានផ្ទុះឡើងខ្លាំងឡើងវិញនៅឆ្នាំ២០១៥ នៅប្រេស៊ីល និងតំបន់អាមេរិកខាងត្បូង។ ប្រឈមនឹងស្ថានការណ៍បែបនេះ អាជ្ញាធរប្រេស៊ីលបានណែនាំឱ្យស្ត្រីប្រេស៊ីលកុំពរក្នុងអំឡុងមានការរាតត្បាតខ្លាំង។
ចំណែកអង្គការសុខភាពពិភពលោក OMS ដែលបានកោះប្រជុំបន្ទាន់ កាលពីថ្ងៃចន្ទ បានចេញក្រិត្យប្រកាសអាសន្ន ចាត់ទុកជំងឺហ្ស៊ីកានេះថាមានលក្ខណៈគំរាមកំហែងរាតត្បាតបន្ទាន់ថ្នាក់ពិភពលោក។ ជាការទាញសញ្ញាអាសន្នដើម្បីបញ្ចេញសកម្មភាពលឿននិងខ្លាំង ប៉ុន្តែអង្គការមានការប្រុងប្រយ័ត្នក្នុងការចេញអនុសាសន៍ទាក់ទងនឹងការធ្វើដំណើរទៅកាន់តំបន់មានមូសខ្លាចម្លងហ្ស៊ីកា ព្រោះខ្លាចប៉ះពាល់ដល់សេដ្ឋកិច្ច។ អង្គការមិនចង់រងការរិះគន់់ ដូចករណីពិភពលោករងការរាតត្បាតជំងឺអេបូឡា នៅអាហ្វ្រិក កាលពីថ្មីៗកន្លងទៅនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ