តុលាការកូរ៉េខាងជើងកាត់ទោសយុវនិស្សិតអាមេរកាំងម្នាក់ ឱ្យជាប់ពន្ធនាគារ១៥ឆ្នាំនិងធ្វើការជាទម្ងន់
នៅថ្ងៃពុធ១៦មីនានេះ តុលាការកូរ៉េខាងជើង បានកាត់ទោសនិស្សិតអាមេរិកាំងម្នាក់ ឈ្មោះ Otto Warmbier អាយុ២១ឆ្នាំ ឲ្យជាប់ពន្ធនាគារនិងធ្វើការជាទម្ងន់ចំនួន១៥ឆ្នាំពីបទ ធ្វើសកម្មភាពវិទ្ធង្សនាប្រឆាំងកូរ៉េខាងជើង បន្ទាប់ពីយុវជនអាមេរិករូបនេះ បានសារភាពថាខ្លួនបានលូចសម្ភារៈសំរាប់ធ្វើការឃោសនានៅក្នុងសណ្ឋាគារមួយនៅក្រុងព្យុងយ៉ាង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
យោងតាមទីភ្នាក់ងារព័ត៌មានផ្លូវរដ្ឋកូរ៉េខាងជើង KCNA” ការផ្តន្ទាទោស Otto Warmbier ដែលជានិស្សិតនៅសកលវិទ្យាល័យអាមេរិក Virginia ត្រូវបានប្រកាសដោយតុលាការកំពូលកូរ៉េខាងជើងនៅថ្ងៃចន្ទនេះ”។ « យុវនិស្សិតអាមេរកាំងនេះ ត្រូវបានចាប់ខ្លួនពីបទធ្វើសកម្មភាពវិទ្ធង្សនាប្រឆាំងកូរ៉េខាងជើងនិងត្រូវបានតុលាការផ្ទន្ទាទោសនៅក្រោមក្រមព្រហ្មទណ្ឌទាក់ទងនឹងវិទ្ធង្សនា »។
“ជនជាប់ចោទថែមទាំងបានទទួលស្គាល់បទល្មើសដ៏ធ្ងន់ធ្ងររបស់ខ្លួន”នេះជាការបញ្ជាក់បន្ថែមរបស់ទីភ្នាក់ងារព័ត៌មានកូរ៉េខាងជើង តែដោយពុំបានលម្អិតអ្វីទៀតទេ។
យោងតាមសាព័ត៌មានអាមេរិក The New York Times ការកាត់ទោសនេះ ត្រូវបានធ្វើឡើងប៉ុន្មានម៉ោងប៉ុណ្ណោះ ក្រោយពីអ្នកការទូតអាមេរិកលោក Bill Richardson បានជួបប្រាស្រ័យជាមួយអ្នកការទូតពីររូបនៅឯការិយាល័យកូរ៉េខាងជើងនៅទីស្នាក់ការអសបនៅក្រុងញូវយ៉ក ដើម្បីសុំការដោះលែងយុវនិស្សិតអាមេរិកាំង។
គួរំលឹកថា Otto Warmbier ត្រូវបានអាជ្ញាធរកូរ៉េខាងជើងចាប់ខ្លួនកាលពីខែមករានៅខណៈពេលដែលយុវជនអាមេរិកាំងរូបនេះហៀបចាកចេញពីកូរ៉េខាងជើង។ យុវនិស្សិតនេះ បានសារភាពដែរថាខ្លួនបានលួចយកបដាមួយដែលចារជាពាក្យស្លោកនយោបាយ នៅក្នុងតំបន់មួយដែលគេរក្សាទុកឲ្យតែបុគ្គលិកបំរើការងារនៅសណ្ឋាគារនៅក្រុងព្យុងយ៉ាង។ យោងតាមប្រព័ន្ធផ្សព្វផ្សាយកូរ៉េខាងជើង Otto Warmbier បានបន្លំខ្លួនជាអ្នកទេសចរធ្វើដំណើរទៅកូរ៉េខាងជើង តាមបញ្ជាររបស់ទីក្រុងវ៉ាស៊ីនតោន ដើម្បីធ្វើសកម្មភាពវិទ្ធង្សនានានាប្រឆាំងនឹងកូរ៉េខាងជើង។
ការចាប់ខ្លួនយុវជនអាមេរិកាំង នេះត្រូវបានប្រព្រឹត្តទៅនៅក្នុងបរិបទមួយដែលកូរ៉េខាងជើងកំពុងមានភាពតានតឹងជាមួយសហគមន៍អន្តរជាតិ ជាពិសេសជាមួយអាមេរិកាំងដែលបានដឹកនាំក្នុងការបញ្ចុះបញ្ចូលឲ្យសហគមន៍អន្តរជាតិដាក់ទណ្ឌកម្មជាទម្ងន់បន្ថែមទៀតទៅលើកូរ៉េខាងជើង ក្រោយពីរបបព្យុងយ៉ាង បានបាញ់សាកល្បងគ្រាប់បែកនុយក្លេអ៊ែរជាលើកទី៤កាលពីដើមខែមករាកន្លងមក។
សូមបញ្ជាក់ថា នារយៈពេលចុងក្រោយនេះ ក្រុងព្យុងយ៉ាងបានធ្វើការគំរាមទីក្រុងសេអ៊ូលនិងវ៉ាស៊ីតោនឥតលោះថ្ងៃ ថាកូរ៉េខាងជើងនឹងធ្វើការវាយប្រហារបកវិញដោយអាវុធនុយក្លេអ៊ែរ បើកូរ៉េខាងត្បូងនិងអាមេរិក នៅតែសំញែងធ្វើសមយុទ្ធក្នុងទ្រង់ទ្រាយធំដែលកូរ៉េខាងជើងចាត់ទុកថា ជាការធ្វើសមយុទ្ធមួយដើម្បីត្រៀមការលុកលុយចូលក្នុងទឹកដីរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ