កូរ៉េខាងត្បូង៖រដ្ឋាភិបាលប្រកាសពីជម្រើសទីតាំងដំឡើងខែលមីស៊ីលប្រឆាំងមីស៊ីល THAAD
នៅថ្ងៃពុធ ទី១៣ កក្កដានេះ រដ្ឋាភិបាលកូរ៉េខាងត្បូងបានប្រកាសឲ្យដឹងពីជម្រើសទីកន្លែងក្នុងការដាក់ពង្រាយខែលមីស៊ីលប្រឆាំងមីស៊ីលប្រភេទ THAAD របស់អាមេរិក។ ទីកន្លែងនោះស្ថិតនៅក្នុងតំបន់ដាច់ស្រយាលមួយ តែប្រព័ន្ធមីស៊ីលប្រឆាំងមីស៊ីលអាចនឹងជួយការពារដែនដីកូរ៉េខាងត្បូងបាន ២ភាគ៣ ប្រឈមទប់នឹងការវាយប្រហារដោយគ្រាប់មីស៊ីលជាយថាហេតុពីកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
គឺតំបន់ Seongju ដែលរដ្ឋាភិបាលកូរ៉េខាងត្បូងបានជ្រើសយកដើម្បីដាក់តាំងខែលមីស៊ីលប្រឆាំងមីស៊ីលប្រភេទ THAAD របស់អាមេរិក។ ជម្រើសយកតំបន់ Seongju នោះមិនមែនជាជម្រើសចៃដន្យទេ ព្រោះវាមានចម្ងាយប្រមាណតែ ២០០គីឡូម៉ែត្រប៉ុណ្ណោះពីទីក្រុងសេអ៊ូល និងដែលខែលមីស៊ីលប្រឆាំងមីស៊ីលនោះអាចការពារដែនដីកូរ៉េខាងត្បូងរហូតដល់ទៅ ២ភាគ៣ ប្រឈមទប់នឹងការគំរាមបាញ់គ្រាប់មីស៊ីលពីកូរ៉េខាងជើង។ ក្រៅពីការពារដែនដីកូរ៉េខាងត្បូង ខែលមីស៊ីលប្រឆាំងមីស៊ីលនោះក៏អាចការពារបណ្តារោងចក្រ សហគ្រាស មជ្ឈមណ្ឌលនុយក្លេអ៊ែរ ឬមួយក៏កន្លែងស្តុកប្រេងជាដើម។
ទន្ទឹមនឹងការប្រកាសឲ្យដឹងពីទីកន្លែង ក្រសួងការពារជាតិកូរ៉េខាងត្បូងក៏បានប្រាប់ឲ្យដឹងនៅថ្ងៃពុធ ទី១៣ កក្កដានេះថា ប្រតិបត្តិការដំឡើងខែលមីស៊ីលប្រឆាំងមីស៊ីលប្រភេទ THAAD របស់អាមេរិកនឹងត្រូវចប់សព្វគ្រប់នាដំណាច់ឆ្នាំ ២០១៧ ខាងមុខ។ ក្រសួងការពារជាតិបានបញ្ជាក់បន្ថែមដោយសង្ឃឹមថា ពលរដ្ឋកូរ៉េខាងត្បូងទូទៅ ពិសេសអ្នករស់នៅក្នុងតំបន់ Seongju នឹងជួយគាំទ្រគម្រោងដំឡើងខែលមីស៊ីលប្រឆាំងមីស៊ីលរហូតដល់ចប់ចុងចប់ដើម។
តែទោះជាយ៉ាងនេះក្តី ពលរដ្ឋរស់នៅក្នុងតំបន់ដាច់ស្រយាល Seongju ចំនួន ៤៥ ០០០នាក់ដែល ៦០% ជាអ្នកចំការដាំផ្លែត្រសក់ស្រូវបាននាំគ្នាចុះផ្លូវធ្វើបាតុកម្មជាថ្មីប្រឆាំងនឹងគម្រោងដំឡើងខែលមីស៊ីលប្រឆាំងមីស៊ីលក្នុងស្រុករបស់ខ្លួនដោយពួកគេយល់ថា ខែលមីស៊ីលប្រឆាំងមីស៊ីលនោះនឹងធ្វើឲ្យប៉ះពាល់ដល់បរិស្ថាន ពិសេសការងារធ្វើចំការដាំផ្លែត្រសក់ស្រូវរបស់ពួកគេ។ គួររម្លឹកជូនថា គម្រោងដាក់ពង្រាយខែលមីស៊ីលប្រឆាំងមីស៊ីលរបស់អាមេរិកក្នុងទឹកដីកូរ៉េខាងត្បូងត្រូវបានទីក្រុងវ៉ាស៊ីនតោន និងសេអ៊ូលចរចា និងសម្រេចតាំងពីខែកុម្ភៈកន្លងទៅ ពោលបន្ទាប់ពីកូរ៉េខាងជើងបានបាញ់សាកល្បងគ្រាប់មីស៊ីលអន្តរទ្វីប។
គម្រោងនេះបានធ្វើឲ្យរុស្ស៊ី និងចិនសប្បាយចិត្តឡើយ ពិសេសចិនដែលជាសម្ព័ន្ធមិត្តចាក់ទឹកមិនលេចរបស់កូរ៉េខាងជើង។ ចិនធ្លាប់បានចេញមុខបរិហារ និងទាមទារឲ្យអាមេរិកបញ្ឈប់គម្រោងនេះជាបន្ទាន់។ ចំណែកកូរ៉េខាងជើងបានបញ្ចេញប្រតិកម្មជាថ្មីនាថ្ងៃចន្ទ ទី១១ កក្កដាថា នឹងប្រើកម្លាំងកម្ទេចខែលមីស៊ីលប្រឆាំងមីស៊ីលនេះ នៅពេលណាវាត្រូវបានគេដាក់តាំងរួចរាល់ និងថា កូរ៉េខាងជើងនឹងវាយកម្ទេចកូរ៉េខាងត្បូងឲ្យនៅសល់តែផេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ