តៃប៉ិខឹងកេនយ៉ានិងចិនរឿងបណ្តេញពលរដ្ឋតៃវ៉ាន់ទៅចិនដីគោក
នៅថ្ងៃចន្ទនេះ តៃវ៉ាន់ បានសម្តែងការខឹងសម្បារយ៉ាងខ្លាំង ចំពោះទង្វើដដែលៗរបស់អាជ្ញាធរកេនយ៉ា ដែលសម្រេចបញ្ជូនពលរដ្ឋតៃវ៉ាន់ទៅឱ្យចិន។ ពលរដ្ឋតៃវ៉ាន់ទាំងនោះ ទើបត្រូវបានរួចខ្លួនពីចោទប្រកាន់ក្នុងបទប្រព្រឹត្តឧក្រិដ្ឋកម្មអ៊ីនធ័រនែត មិនត្រូវបានអនុញ្ញាត ឱ្យស្នាក់នៅក្នុងទឹកដីកេនយ៉ាទៀតទេ តែក៏មិនអាចត្រលប់មកកាន់កោះកំណើតបានដែរ។
ចុះផ្សាយនៅថ្ងៃ៖
កាលពីខែមេសា កេនយ៉ា បានបញ្ជូនម្តងរួចហើយ ពលរដ្ឋតៃវ៉ាន់ ៤៥នាក់ ទៅប្រទេសចិន ដែលកាលណោះតៃវ៉ាន់បានធ្វើការប្រឆាំងយ៉ាងខ្លាំង និងចោទប៉េកាំងថាបានចាប់ជំរិតពលរដ្ឋខ្លួន តាមរយៈការដាក់សម្ពាធដោយខុសច្បាប់លើរដ្ឋាភិបាលកេនយ៉ា។
នៅថ្ងៃសុក្រកន្លងទៅថ្មីៗនេះ តុលាការកេនយ៉ា បានសម្រេចលាងទោស ផ្តល់សេរីភាពដល់ជនជាតិចិន៣៥នាក់ និងតៃវ៉ាន់ ៥នាក់ ដែលត្រូវចាប់ខ្លួនតាំងពីឆ្នាំ២០១៤ ពីបទប្រើប្រាស់ដោយខុសច្បាប់ប្រព័ន្ធទូរគមនាគមន៍ និងពីបទជាប់សង្ស័យជាបណ្តាញឧក្រិដ្ឋកម្មតាមអ៊ីនធ័រនែត។
ត្រូវជាប់ឃុំឃាំងបណ្តោះអាសន្ន ជនទាំង៤០នាក់សុទ្ធតែអះអាងថាគ្មានប្រព្រឹត្តខុស។ តុលាការកេនយ៉ា ក៏ចេញសាលក្រមបណ្តេញចេញពីកេនយ៉ា រួចបញ្ជូនឱ្យត្រលប់ទៅស្រុកកំណើតវិញ។ អង្គការការពារសិទ្ធិមនុស្ស Amnesty International បានធ្វើការអំពាវនាវភ្លាមឱ្យអាជ្ញាធរកេនយ៉ា អនុវត្តទោស ទៅច្បាប់ដោយសមស្រប ដោយត្រូវបញ្ជូនពលរដ្ឋតៃវ៉ាន់ ទៅតៃវ៉ាន់។ ប៉ុន្តែ នៅយប់ថ្ងៃអាទិត្យឆ្លងមកថ្ងៃចន្ទនេះ ពលរដ្ឋតៃវ៉ាន់ទាំង៥នាក់ បែរជាត្រូវបញ្ជូនទៅប្រទេសចិនទៅវិញ។
ក្រៅអំពីបានតវ៉ានឹងអាជ្ញាធរកេនយ៉ា ក្រសួងការបរទេសតៃវ៉ាន់ ក៏បានសម្តែងការប្រឆាំងនឹងទង្វើដដែលរបស់ចិនដែលចាប់ឃុំឃាំងនិងដាក់ទោសពលរដ្ឋគេ។
កាលពីខែមេសា ម៉ាឡេស៊ី ក៏បានបញ្ជូនពលរដ្ឋតៃវ៉ាន់៣២នាក់ ទៅឱ្យចិនក្នុងសំណុំរឿងទូរគមនាគមន៍ដូចគ្នា។ កម្ពុជាក៏បានធ្វើដូច្នេះដែរ។ ទំនាក់ទំនងចិននិងតៃវ៉ាន់ មានប្រវត្តិតឹងតែងជាប្រវត្តិសាស្ត្រស្រាប់ទៅហើយ។ អ្នកសង្កេតការណ៍ជាច្រើនមើលឃើញ សំណុំរឿងចាប់បញ្ជូនតៃវ៉ាន់ទៅចិនដីគោក ជាវិធីមួយដែលចិនចង់បំភ័យប្រធានាធិបតីតៃវ៉ាន់ថ្មី លោកស្រី ត្សៃ អ៊ីងវែន។ ប៉េកាំងតែងចាត់ទុកតៃវ៉ាន់ជាខេត្តមួយរបស់ខ្លួន ចង់ក្រសោបយកពេលណាក៏បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ