ភេរវកម្មនៅថៃ៖តុលាការលើកពេលកាត់ទោសជនសង្ស័យអ៊ុយហ្គួរដោយខ្វះអ្នកបកប្រែ
នៅក្នុងប្រទេសថៃ តុលាការសឹកដែលត្រូវបើកសវនាការកាត់ទោសជនជាតិភាគតិចអ៊ុយហ្គួរកាន់សាសនាអ៊ីស្លាមចំនួនពីរនាក់ក្នុងថ្ងៃអង្គារ ទី២៣សីហានេះបានប្រកាសឲ្យដឹងថា ខ្លួននឹងលើកសវនាការកាត់ទោសនេះទៅពេលក្រោយវិញដោយគ្មានអ្នកបកប្រែភាសាអ៊ុយហ្គួរ។ សូមជម្រាបជូនថា ជនជាតិអ៊ុយហ្គួរទាំងពីរនាក់បានជាប់សង្ស័យពីបទរៀបចំអំពើភេរវកម្មក្នុងទីក្រុងបាងកកកាលពីខែសីហា ឆ្នាំ ២០១៥ ដែលបណ្តាលឲ្យមានមនុស្សស្លាប់ ២០នាក់។ តែការលើកថ្ងៃសវនាការរបស់តុលាការពេលនេះបានទទួលរងការរិះគន់យ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
នៅទីបំផុត សវនាការដែលគ្រប់គ្នាបានទន្ទឹងរង់ចាំជាយូរមកហើយនោះត្រូវបានតុលាការសឹកក្នុងក្រុងបាងកកប្រកាសលើកពេលទៅធ្វើនៅថ្ងៃទី១៥ កញ្ញាខាងមុខនេះវិញ។ មូលហេតុនៃការលើកពេលត្រូវបានចៅក្រមបញ្ជាក់ថា មកពីគ្មានអ្នកបកប្រែភាសាអ៊ុយហ្គួរ ព្រោះជនជាប់សង្ស័យទាំងពីររូបមិនអាចនិយាយភាសាអ្វីផ្សេងក្រៅពីភាសាអ៊ុយហ្គួរទេ។ រូបចៅក្រមនៃតុលាការសឹកបានបន្ថែមថា តុលាការគ្មានពេលនឹងរកអ្នកបកប្រែថ្មី ព្រោះអ្នកបកប្រែមុនឈ្មោះ Sirojiddin Bakhodirov ជាជនជាតិអ៊ូសបេគីស្ថាន និងដែលកំពុងជាប់សង្ស័យក្នុងរឿងជួញដូរគ្រឿងញានបានរត់គេចខ្លួនបាត់។
តែកន្លងមក អ្នកបកប្រែជនជាតិអ៊ូសបេគីស្ថានរូបនេះធ្លាប់បានចោទប៉ូលិសថា បានយកគ្រឿងញានទៅដាក់លើខ្លួនគេក្នុងបំណងចោទប្រកាន់ពីបទបានជួយជនជាតិអ៊ុយហ្គួរដោយយល់ព្រមធ្វើជាអ្នកបកប្រែឲ្យជនជាតិអ៊ុយហ្គួរទាំងពីរនាក់។ យ៉ាងណាក៏ដោយ អវត្តមានអ្នកបកប្រែក្នុងថ្ងៃបើកសវនាការបានបង្កឲ្យមានប្រតិកម្មវាយប្រហារលើប្រព័ន្ធតុលាការថៃដែលខ្វះសមត្ថភាព ឬមួយមានឆន្ទៈចង់ពន្យារដំណើរការកាត់ទោស។ អង្គការការពារសិទ្ធិមនុស្ស Human Rights Watch បានអះអាងថា អ្នកបកប្រែភាសាអ៊ុយហ្គួរមានច្រើនណាស់ និងអាចរកបានភ្លាមៗ តែបែរជាតុលាការថាមិនអាចរកបានទៅវិញ។
សូមជម្រាបជូនថា ជនជាតិអ៊ុយហ្គួរទាំងពីរនាក់ឈ្មោះ Yusufu Mieraili និងឈ្មោះ Bilal Mohammed បានជាប់សង្ស័យពីបទរៀបចំអំពើភេរវកម្មក្នុងក្រុងបាងកកកាលពីខែសីហា ឆ្នាំ ២០១៥ ដែលបណ្តាលឲ្យមានមនុស្សស្លាប់ចំនួន ២០នាក់។ នៅក្នុងសវនាការបឋមកាលពីប៉ុន្មានខែមុន ជនសង្ស័យអ៊ុយហ្គួរទាំងពីរនាក់បានឆ្លើយបដិសេធចំពោះការចោទប្រកាន់លើខ្លួន។ ជនសង្ស័យឈ្មោះ Bilal Mohammed ថែមទាំងបានអះអាងថា រូបគេបានទទួលគំនាប និងការធ្វើទារុណកម្មធ្ងន់ៗពីសំណាក់ប៉ូលិសដើម្បីសង្កត់រូបគេឲ្យសារភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ