មានវត្តមានករណីមេរោគហ្ស៊ីកាចំនួន ៤១ករណីនៅក្នុងទឹកដីសិង្ហបុរី
នៅក្នុងប្រទេសសិង្ហបុរី រដ្ឋាភិបាលបានប្រកាសឲ្យដឹងនៅថ្ងៃអាទិត្យ ទី២៨ សីហាថា គិតត្រឹមថ្ងៃសៅរ៍ ទី២៧ សីហា មានមនុស្សចំនួន ៤១នាក់កំពុងមានមេរោគហ្ស៊ីកាក្នុងខ្លួន។ នៅក្នុងចំណោមមនុស្សដែលមានមេរោគហ្ស៊ីកាក្នុងខ្លួន ភាគច្រើនជាកម្មករបរទេសធ្វើការនៅតាមការដ្ឋានសំណង់។ គួររម្លឹកជូនថា វត្តមានមេរោគហ្ស៊ីកាលើកដំបូងក្នុងទឹកដីសិង្ហបុរីបានរកឃើញកាលពីខែឧសភាលើខ្លួនបុរសម្នាក់ដែលបានរស់នៅក្នុងទឹកដីប្រេស៊ីលជាង ១ខែ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ដំណឹងស្តីពីកំណើនមេរោគហ្ស៊ីកាក្នុងទឹកដីសិង្ហបុរីត្រូវបានប្រកាសឲ្យដឹងតាមរយៈសេចក្តីប្រកាសព័ត៌មានរួមគ្នាមួយរវាងក្រសួងសុខាភិបាល និងទីភ្នាក់ងារជាតិដើម្បីបរិស្ថាន។ សេចក្តីប្រកាសព័ត៌មានបានបញ្ជាក់ជាផ្លូវការថា គិតត្រឹមចុងសប្តាហ៍កន្លងទៅនេះ មានមនុស្សសរុប ៤១នាក់រស់នៅសិង្ហបុរីកំពុងមានមេរោគហ្ស៊ីកាក្នុងខ្លួន។ ផ្អែកតាមសេចក្តីប្រកាសព័ត៌មានដដែល មនុស្សមានផ្ទុកមេរោគហ្ស៊ីកាទាំង ៤១នាក់បានរស់នៅ ឬមួយក៏បានធ្វើការនៅក្នុងតំបន់ឆ្ងាយពីក្រុង។
ម្យ៉ាងទៀត សេចក្តីប្រកាសព័ត៌មានបានបន្ថែមថា មនុស្សដែលមានផ្ទុកមេរោគហ្ស៊ីកាក្នុងខ្លួនទាំង ៤១នាក់មិនធ្លាប់បានធ្វើដំណើរចេញក្រៅទៅកាន់តំបន់ដែលមានវត្តមានមេរោគហ្ស៊ីកាទេ។ អ៊ីចឹងហើយបានជារដ្ឋអំណាចសិង្ហបុរីហ៊ានសន្និដ្ឋានច្បាស់ដោយមិនអាល់អែកថា ពួកគេពិតជាបានឆ្លងមេរោគហ្ស៊ីកានៅក្នុងស្រុកមែន។ នៅក្នុងចំណោមមនុស្សមានមេរោគហ្ស៊ីកាក្នុងខ្លួនទាំង ៤១នាក់ មាន ៣៦នាក់ជាពលករធ្វើការនៅការដ្ឋានសំណង់ក្នុងតំបន់ដូចគ្នា និងដែលសព្វថ្ងៃ មាន ៣៤នាក់ហាក់ដូចមានអាការៈគ្រាន់បើ ចំណែក ៧នាក់ទៀតកំពុងបន្តព្យាបាល ឃ្លាំមើលនៅក្នុងមន្ទីរពេទ្យ។
សូមរម្លឹកជូនថា សិង្ហបុរីបានរកឃើញករណីមេរោគហ្ស៊ីកាដំបូងកាលពីខែឧសភាលើបុរសម្នាក់ដែលទើបត្រឡប់ពីប្រទេសប្រេស៊ីល បន្ទាប់ពីបានរស់នៅជាង ១ខែ។ ឃើញថា តាំងពីខែឧសភាមកដល់ដំណាច់ខែសីហានេះ ករណីមេរោគហ្ស៊ីកានៅសិង្ហបុរីបានកើនចំនួន ៤០ករណី។ ក្រៅពីចម្លងតាមរយៈមូសខ្លាខាំ មេរោគហ្ស៊ីកាក៏អាចឆ្លងតាមការរួមភេទដែរ។ ជាទូទៅ ហ្ស៊ីកាជាមេរោគដែលគេមិនអាចមើលនឹងភ្នែកទទេឃើញ ហើយក៏ជាមេរោគដែលគេពិបាកចាប់បាននៅលើមនុស្សខ្លះដែរ។ តែក្តីបារម្ភមានខ្លាំងចំពោះស្រ្តីមានផ្ទៃពោះ ព្រោះមេរោគហ្ស៊ីកានៅលើស្រ្តីមានផ្ទៃពោះនឹងអាចធ្វើឲ្យទារកស្លាប់ក្នុងផ្ទៃ ឬមួយកើតមកមានទ្រង់ទ្រាយក្បាលតូចខុសពីធម្មតាជាដើម។
កាលពីដើមឆ្នាំ ២០១៦ នេះ ក្រុមអ្នកឯកទេសធ្លាប់បានទាញសញ្ញាអាសន្នពីភាពងាយស្រួលការឆ្លងមេរោគហ្ស៊ីកានៅអាស៊ី។ បច្ចុប្បន្ន នៅមិនទាន់មានថ្នាំវ៉ាក់សាំងការពារនៅឡើយទេ តែវិធានការបន្ទាន់នៅចំពោះមុខ គឺកំចាត់មូសខ្លា និងកុំរួមភេទជាមួយមនុស្សមានផ្ទុកមេរោគហ្ស៊ីកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ