ប៉ាគីស្ថាននិងឥណ្ឌា បានបាញ់តបតគ្នាជាថ្មីនៅតំបន់កាស្មៀរនៅថ្ងៃចន្ទម្សិលមិញ
កងទ័ពប៉ាគីស្ថាននិងឥណ្ឌា បានបាញ់ផ្លោងដាក់គ្នាទៅវិញទៅមកនៅតំបន់កាស្មៀរ ក្រោយពីមានការវាយប្រហារមួយរបស់ក្រុមឧទ្ទាមផ្តាច់ទឹកដីនិយមប្រឆាំងមូលដ្ឋានយោធាឥណ្ឌាមួយនៅពេលយប់-នេះជាការគូសបញ្ជាក់របស់កងទ័ពប៉ាគីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ការបាញ់តបតគ្នាទៅវិញទៅមករវាងកងទ័ពឥណ្ឌានិងប៉ាគីស្ថានជាថ្មីនេះ ពុំបានបណ្តាលឲ្យមានជនរងគ្រោះទេនិងបានបិទបញ្ចប់ទៅនៅព្រឹកព្រលឹមនេះដែរ តែមានការវាយប្រហារខ្លះៗនៅមានតាមតំបន់មួយចំនួន-នេះបើយោងតាមសេចក្តីជូនដំណឹងរបស់កងទ័ពប៉ាគីស្ថាន។
យោងតាមប៉ាគីស្ថាន ហេតុការណ៍ថ្មីនេះ ត្រូវបានប្រព្រឹត្តទៅ ៥ថ្ងៃក្រោយពីឥណ្ឌាបានជូនដំណឹងពីការវាយប្រហាររបស់ខ្លួនប្រឆាំងទៅលើទីតាំងនានារបស់ក្រុមឧទ្ទាមផ្តាច់ទឹកដីនៅតំបន់កាស្មៀរខាងប៉ាគីស្ថាន។ ទីក្រុងអ៊ីស្លាមម៉ាបាត បានបរិហារថាការវាយប្រហារបស់ឥណ្ឌានេះ គឺជាការឈ្លានពានមួយមកលើទឹកដីខ្លួននិងបានសម្លាប់ជីវិតទាហានប៉ាគីស្ថានចំនួន២នាក់។
ម្យ៉ាងទៀត យោងតាមប៉ូលីសប៉ាគីស្ថាន" ភាពតានតឹងរវាងឥណ្ឌានិងប៉ាគីស្ថាន បានធ្លាក់ចុះយ៉ាងដុនដាប ក្រោយពីមានការវាយប្រហារមួយរបស់ក្រុមឧទ្ទាមប្រឆាំងទៅលើមូលដ្ឋានរបស់ឥណ្ឌាមួយដែលស្ថិតនៅក្នុងតំបន់កាស្មឿរ កាលពីថ្ងៃទី១៨កញ្ញាមុន។ ការវាយប្រហារនាពេលនោះ បានសម្លាប់ជីវិតទាហានឥណ្ឌាចំនួន១៩នាក់។
គួររំលឹកថា តំបន់កាស្មៀរដែលស្ថិតនៅក្រោមការកាន់កាប់របស់ឥណ្ឌា ជាទីលានប្រយុទ្ធគ្នាមួយអស់រយៈពេលជាច្រើនទស្សវត្សន៍កន្លងមកហើយ រវាងកងទ័ពឥណ្ឌានិងក្រុមឧទ្ទាមផ្តាច់ទឹកដីនិយមនានាដែលគាំទ្រដោយប្រទេសប៉ាគីស្ថាន-នេះបើយោងតាមទីក្រុងញូដែលី។
ស្ថានការណ៍នៅតំបន់កាស្មឿរនេះ បានចាប់ផ្តើមវឹកវរកាន់តែខ្លាំងឡើងៗនៅខែកក្កដា បន្ទាប់ពីការស្លាប់មេដឹកនាំរបស់ក្រុមឧទ្ទាមមួយរូបរួចមក ហើយជាបន្ទាប់មកទៀត មានបម្រាមគោចរអស់រយៈពេលជាច្រើនសប្តាហ៍នៅក្នុងប្រទេសនិងបាតុកម្មយ៉ាងគគ្រឹកគគ្រេងដែលបានសម្លាប់ជីវិតមនុស្សយ៉ាងសាហាវនៅក្នុងប្រទេសឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ