ឥណ្ឌូណេស៊ីបានព្យួរកិច្ចសហប្រតិបត្តិការយោធាជាមួយអូស្រា្តលី
នៅថ្ងៃពុធ ទី៤ មករានេះ ប្រទេសឥណ្ឌូណេស៊ី តាមរយៈអ្នកទទួលខុសត្រូវយោធាម្នាក់បានបញ្ជាក់ឲ្យដឹងថា ឥណ្ឌូណេស៊ីបានព្យួរកិច្ចសហប្រតិបត្តិការយោធាជាមួយប្រទេសអូស្រា្តលី។ មូលហេតុ មកពីឥណ្ឌូណេស៊ីបានរកឃើញឯកសារហ្វឹកហ្វឺនយោធាមួយចំនួនដែលមានសរសេរអត្ថន័យប្រមាថដល់គោលការណ៍ជាមូលដ្ឋានរបស់ឥណ្ឌូណេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ព័ត៌មាននៃការព្យួរជាបណ្តោះអាសន្ននូវកិច្ចសហប្រតិបត្តិការយោធារវាងឥណ្ឌូណេស៊ី និងអូស្រា្តលីពេលនេះត្រូវបានថ្លែងបញ្ជាក់ដោយលោក Wuryanto អ្នកនាំពាក្យកងទ័ពឥណ្ឌូណេស៊ី។ តាមលោក Wuryanto កិច្ចសហប្រតិបត្តិការយោធាដែលរួមមាន ការធ្វើសមយុទ្ធ ការរៀនសូត្រ និងកម្មវិធីផ្តោះប្តូរព័ត៌មានត្រូវបានផ្អាកតាំងពីក្នុងខែធ្នូ ឆ្នាំ ២០១៦ មកម្ល៉េះ។ អ្នកនាំពាក្យកងទ័ពឥណ្ឌូណេស៊ីរូបនេះមិនបានលំអិតពីមូលហេតុដែលនាំឲ្យមានការព្យួរកិច្ចសហប្រតិបត្តិការយោធារវាងប្រទេសទាំងពីរពេលនេះទេ គ្រាន់តែបញ្ជាក់យ៉ាងខ្លីថា ដោយសារបញ្ហាបច្ចេកទេស។
តែបើតាមព័ត៌មានចុះផ្សាយដោយកាសែតប្រចាំថ្ងៃឥណ្ឌូណេស៊ីឈ្មោះ Kompas ឲ្យដឹងថា ការសម្រេចរបស់កងទ័ពឥណ្ឌូណេស៊ីបានធ្វើឡើង បន្ទាប់ពីគ្រូបង្រៀនយោធាឥណ្ឌូណេស៊ីម្នាក់បានរកឃើញឯកសារហ្វឹកហ្វឺនយោធារបស់អូស្រា្តលីដែលមានសរសេរអត្ថន័យក្នុងលក្ខណៈប្រមាថដល់គោលការណ៍ជាមូលដ្ឋានទាំង ៥ របស់រដ្ឋឥណ្ឌូណេស៊ី និងដល់កងទ័ពឥណ្ឌូណេស៊ី។ គោលការណ៍ជាមូលដ្ឋានទាំង ៥ នោះរួមមាន ជំនឿលើព្រះជាម្ចាស់តែមួយ ឯកភាពនៃប្រទេសឥណ្ឌូណេស៊ី ឬមួយយុត្តិធម៌សង្គមសម្រាប់ប្រជាជនឥណ្ឌូណេស៊ីគ្រប់រូបជាដើម។
ពីប្រទេសអូស្រ្តាលី ក្រសួងការពារជាតិបានបញ្ជាក់នៅក្នុងសេចក្តីជូនដំណឹងរបស់ខ្លួនថា ពិតជាបានទទួលព័ត៌មាននេះពីឥណ្ឌូណេស៊ីស្តីពីការផ្អាកកិច្ចសហប្រតិបត្តិការយោធា។ សូមជម្រាបជូនថា ឥណ្ឌូណេស៊ីធ្លាប់បានព្យួរកិច្ចសហប្រតិបត្តិការយោធាជាមួយអូស្រ្តាលីម្តងហើយក្នុងឆ្នាំ ២០១៣។ កាលណោះ ឥណ្ឌូណេស៊ីបានចោទអូស្រា្តលីពីបទចារកម្មដោយព្យាយាមលួចស្តាប់កិច្ចសន្ទនាតាមទូរស័ព្ទរបស់ប្រធានាធិបតីឥណ្ឌូណេស៊ីជំនាន់នោះ គឺលោក Susilo Bambang Yudhoyono៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ