ឥណ្ឌូណេស៊ី៖ អូស្ត្រាលីឲ្យលុយអ្នកបើកទូកដឹកជនអន្តោប្រវេសន៍
អ្នកបើកទូកដឹកជនអន្តោប្រវេសន៍បានទទួលលុយរាប់ពាន់ ដុល្លារ ពីអាជ្ញាធរអូស្ត្រាលី ជាថ្នូរនឹងការបង្វែរទិសដៅពីនូវែលហ្សេឡង់ ដោយបត់ក្បាលទូក ឲ្យត្រលប់ចូលដែនទឹកឥណ្ឌូណេស៊ីវិញ។ នេះបើតាមការអះអាងរបស់ប៉ូលិស ឥណ្ឌូណេស៊ី នៅថ្ងៃពុធទី ១០មិថុនា។ អ្នកបើក និងអ្នកដើរទូក ដែលជាសមាជិកចំនួន៥នាក់ ត្រូវបានប៉ូលិសឥណ្ឌូណេស៊ីចាប់ឃុំខ្លួន នៅលើកោះ Rote តាំងពីចុងខែឧសភា ពីបទរត់ពន្ធមនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
នៅក្នុងមន្ទីរឃុំខ្លួន មេឈ្មួញរត់ពន្ធមនុស្ស បានសារភាពប្រាប់ប៉ូលិសឥណ្ឌូណេស៊ី ថា ពួកគេបានទទួលទឹកប្រាក់ ម្នាក់ៗ ចំនួន ៥ពាន់ដុល្លារ ពីមន្រ្តីអន្តោប្រវេសន៍ អូស្ត្រាលី ជាថ្នូរនឹងការបត់ក្បាលទូក ចូលក្នុងដែនទឹកឥណ្ឌូណេស៊ី។ ប្រធានប៉ូលិសមូលដ្ឋានឥណ្ឌូណេស៊ីHihayat ដែលជាអ្នកបានឃើញលុយរបស់ក្រុមឈ្មួញរត់ពន្ធមនុស្ស បាននិយាយថា គាត់មានការភ្ញាក់ផ្អើលមែនទែន ព្រោះថា នេះជាលើកទីមួយ ដែលគាត់លឺថា អាជ្ញាធរអូស្ត្រាលីបង់លុយផ្ទាល់ ទៅឲ្យអ្នកបើកទូកដឹកជនអន្តោប្រវេសន៍។
ទូកដឹកជនអន្តោប្រវេសន៍ ប្រមាណ ៦៥នាក់ ដែលមានលាយឡំ គ្នា រវាងជនជាតិភូមា បង់ក្លាដែស និងស្រីលង្កា មានទិសដៅរបស់ខ្លួន ចង់ធ្វើដំណើរទៅប្រទេសនូវែលហ្សេឡង់ ដោយត្រូវឆ្លងកាត់ដែនទឹករបស់អូស្ត្រាលី។ ប៉ុន្តែ មិនទាន់ចូលក្នុងដែនទឹកអូស្ត្រាលីផង ទូកត្រូវបានកប៉ាល់ល្បាតអូស្ត្រាលីចាប់ឃាត់ទាន់ និងបញ្ជាឲ្យបត់ក្បាលទូក ចេញ ពីដែនទឹករបស់អូស្ត្រាលី។
ជនអន្តោប្រវេសន៍ នៅក្នុងទូក ដែលបច្ចុប្បន្ននេះ ត្រូវគេយកទៅដាក់នៅក្នុងសណ្ឋាគារតូចមួយក្នុងទីក្រុងគូប៉ាង ប៉ែកខាងកើតឥណ្ឌូណេស៊ីបានបញ្ជាក់ការអះអាងរបស់ប៉ូលិសឥណ្ឌូណេស៊ី ដោយថា ពួកគេបានដឹងថា អ្នកបើកទូកទទួលលុយ បន្ទាប់ពីឃើញ ទូកបកត្រលប់ក្បាលចេញពីដែនទឹកអូស្ត្រាលី។
នៅថ្ងៃពុធ នេះ រដ្ឋមន្រ្តីក្រសួងជនអន្តោប្រវេសន៍អូស្ត្រាលី បានបដិសេធមិនបកស្រាយអ្វីទាក់ទងនឹងដំណឹងសូកលុយពី អាជ្ញាធរអូស្ត្រាលី ទៅឲ្យឈ្មួញបើកទូកដឹកជនអន្តោប្រវេសន៍។ នៅក្នុងសេចក្តីថ្លែងការណ៍ ក្រសួងគ្រាន់តែបញ្ជាក់ថា រដ្ឋាភិបាលអូស្ត្រាលី មិនធ្វើអត្ថាធិប្បាយ ឬបញ្ចេញឲ្យដឹងជាសាធារណៈពីប្រតិបត្តិការលម្អិតរបស់អាជ្ញាធរអូស្ត្រាលី ឡើយ។ រដ្ឋាភិបាលអភិរក្សនិយមអូស្ត្រាលីបានរឹតបន្តឹងនយោបាយអន្តោប្រវេសន៍ តាំង ពីឆ្នាំ ២០១៣ ដើម្បី ទប់ស្កាត់ លំហូរ ទូកដឹកជនបរទេស ចូលទៅក្នុងទឹកដីអូស្ត្រាលី។ រដ្ឋាភិបាលអូស្ត្រាលីបានចំណាយលុយរាប់លានដុល្លារ ដើម្បីជួលកោះក្បែរទឹកដីអូស្ត្រាលី ដើម្បី ដាក់ជនអន្តោប្រវេសន៍ ដែលបានចូលរួចហើយ ទៅក្នុងដែនទឹកអូស្ត្រាលី។ ថ្មីៗនេះ រដ្ឋាភិបាលអូស្ត្រាលីក៏ទើបបានចុះកិច្ចព្រមព្រៀងផ្តល់ជំនួយជាង ៤១លានដុល្លារ ដើម្បីឲ្យកម្ពុជាទទួលយកជនភៀសខ្លួន ដែលអូស្ត្រាលីមិនចង់ទទួលឲ្យរស់នៅក្នុងទឹកដីរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ