កម្លាំងប្រដាប់អាវុធម៉ាឡេស៊ីការពារទីកន្លែងតម្កល់សពលោកគីម ជុងណាមនៅមន្ទីរពេទ្យ
នៅក្នុងប្រទេសម៉ាឡេស៊ី សពលោកគីម ជុងណាមដែលជាបងប្រុសម្តាយទីទៃរបស់លោកគីម ជុងអ៊ុនកំពុងត្រូវបានរដ្ឋអំណាចម៉ាឡេស៊ីបន្តរក្សាទុកនៅកន្លែងតម្កល់សពក្នុងមន្ទីរពេទ្យមួយស្ថិតក្នុងទីក្រុងគូឡាឡាំពួ។ នាព្រលឹមស្រាងៗថ្ងៃអង្គារ ទី២១ កុម្ភៈនេះ រដ្ឋអំណាចម៉ាឡេស៊ីបានបញ្ជូនកម្លាំងប្រដាប់អាវុធមួយក្រុមបានចូលក្នុងបរិវេណមន្ទីរពេទ្យដើម្បីការពារសពលោកគីម ជុងណាម។ វត្តមានកម្លាំងប្រដាប់អាវុធម៉ាឡេស៊ីក៏ដោយសារមានព័ត៌មានលេចឮថា កូនប្រុសរបស់សពលោកគីម ជុងណាមបានទៅម៉ាឡេស៊ីដើម្បីទាមទារយកសពឱពុករបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
គឺនៅព្រលឹមស្រាងៗព្រឹកថ្ងៃអង្គារ ទី២១ កុម្ភៈនេះដែលគេឃើញមានក្បួនរថយន្តចំនួន ៤គ្រឿងបិទកញ្ជក់ខ្មៅបានបរចូលក្នុងមន្ទីរពេទ្យដែលមានរក្សាទុកសពលោកគីម ជុងណាម។ ក្បួនរថយន្តទាំង ៤គ្រឿងត្រូវបានការពារយ៉ាងតឹងរឹងពីកម្លាំងពិសេសម៉ាឡេស៊ីប្រមាណជា ៣០នាក់ តែគេមិនអាចដឹងថា តើជាក្បួនរថយន្តដឹកនរណាទេ។ អ្វីដែលគេដឹង ប្រភពព័ត៌មានពីទីភ្នាក់ងារស៊ើបការណ៍សម្ងាត់ម៉ាឡេស៊ី និងកាសែតក្នុងស្រុកមួយចំនួនឲ្យដឹងថា លោកគីម ហានស៊ុលដែលជាកូនប្រុសរបស់សពលោកគីម ជុងណាមបានចេញពីទឹកដីម៉ាកាវទៅដល់ទឹកដីម៉ាឡេស៊ីកាលពីយប់ថ្ងៃចន្ទ ទី២០ កុម្ភៈក្នុងគោលដៅទាមទារយកសពឱពុកខ្លួន។
តែពេលនេះ នៅមិនទាន់មានព័ត៌មានណាមួយដែលអាចបញ្ជាក់ពីវត្តមានលោកគីម ហានស៊ុលនៅលើទឹកដីម៉ាឡេស៊ីទេ។ សូមរម្លឹកជូនឡើងវិញថា ជិត ១០ថ្ងៃក្រោយឃាតកម្មសម្លាប់លោកគីម ជុងណាមនៅព្រលានយន្តហោះក្នុងទីក្រុងគូឡាឡាំពួក្នុងថ្ងៃទី១៣ កុម្ភៈមក ទីក្រុងព្យុងយ៉ាងបន្តទទូចសុំឲ្យទីក្រុងគូឡាឡាំពួបញ្ជូនសពលោកគីម ជុងណាមទៅឲ្យខ្លួន និងបានជំទាស់នឹងការធ្វើកោសល្យវិច័យ។ តែម៉ាឡេស៊ីមិនព្រម និងបញ្ជាក់ជាថ្មីថា ដរាបណាក្រុមគ្រួសារសពលោកគីម ជុងណាមមិនយក ADN ទៅផ្ទៀងផ្ទាត់ជាមួយ ADN របស់សពទេ នោះម៉ាឡេស៊ីមិនអនុញ្ញាតឲ្យយកសពលោកគីម ជុងណាមចេញទេ។
នៅថ្ងៃចន្ទ ទី២០ កុម្ភៈ លោកកាង ចុល ឯកអគ្គរដ្ឋទូតកូរ៉េខាងជើងប្រចាំម៉ាឡេស៊ីបានយល់ឃើញថា ការសុំយក ADN ពីក្រុមគ្រួសារសពលោកគីម ជុងណាម ជារឿងមិនទំនង និងថា ស្ថានទូតមានសិទ្ធិយកសពជនជាតិខ្លួនដែលមានកាន់លិខិតឆ្លងដែនផ្លូវការ។ ទន្ទឹមគ្នានេះ លោកកាង ចុលបានចោទការស៊ើបអង្កេតរបស់ម៉ាឡេស៊ីថាមានលក្ខណៈនយោបាយ។ តែលោករដ្ឋមន្រ្តីការទូតម៉ាឡេស៊ីបានឆ្លើយបកវិញថា ការចោទរបស់មន្រ្តីការទូតកូរ៉េខាងជើងរូបនេះគ្មានមូលដ្ឋានច្បាស់លាស់ និងជាការប្រមាថ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ