ឃាតកម្មសម្លាប់លោកគីម ជុងណាម៖ម៉ាឡេស៊ីគ្រោងចេញដីការចាប់ខ្លួនមន្រ្តីការទូតកូរ៉េខាងជើង
នៅក្នុងប្រទេសម៉ាឡេស៊ី សំណុំរឿងឃាតកម្មសម្លាប់លោកគីម ជុនណាមដែលជាបងប្រុសម្តាយទីទៃលោកគីម ជុនអ៊ុនកំពុងបន្តបំពុលទំនាក់ទំនងរវាងទីក្រុងគូឡាឡាំពួ និងទីក្រុងព្យុងយ៉ាង។ នៅថ្ងៃសៅរ៍ ទី២៥ កុម្ភៈនេះ ប៉ូលិសម៉ាឡេស៊ីបានប្រកាសឲ្យដឹងពីបំណងស្នើឲ្យមានដីការចាប់ខ្លួនមន្រ្តីការូទូតកូរ៉េខាងជើងម្នាក់ដែលមិនព្រមបង្ហាញខ្លួនតាមការកោះហៅរបស់ប៉ូលិសម៉ាឡេស៊ី។ ទន្ទឹមគ្នានេះ រដ្ឋអំណាចម៉ាឡេស៊ីបានប្រាប់ពីយុទ្ធនាការសំអាតព្រលានយន្តហោះនៅគូឡាឡាំពួដើម្បីកម្ទេចកាកសំណល់ជាតិគីមីដែលគេប្រើសម្លាប់លោកគីម ជុងណាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
លោក Abdul Samah Mat មេប៉ូលិសនៃរដ្ឋ Selangor ក្នុងប្រទេសម៉ាឡេស៊ីបានបញ្ជាក់នៅថ្ងៃសៅរ៍ ទី២៥ កុម្ភៈនេះថា បើរូបមន្រ្តីការទូតកូរ៉េខាងជើងដែលកំពុងតាមចាប់ខ្លួនមិនព្រមចូលបង្ហាញមុខនៅប៉ូលិសទេ លោកនឹងស្នើទៅតុលាការឲ្យចេញដីការចាប់ខ្លួនមន្រ្តីការទូតកូរ៉េខាងជើងរូបនោះ។ កាលពីថ្ងៃពុធ ទី២២ កុម្ភៈ រដ្ឋអំណាចម៉ាឡេស៊ីបានប្រកាសឲ្យដឹងពីការតាមចាប់ខ្លួនមន្រ្តីការទូតកូរ៉េខាងជើងឈ្មោះ Hyon Kwang-song ដែលជាលេខាទី២ នៅស្ថានទូតកូរ៉េខាងជើងប្រចាំម៉ាឡេស៊ីឲ្យចូលឆ្លើយបំភ្លឺក្នុងរឿងឃាតកម្មសម្លាប់លោកគីម ជុងណាម តែលោក Kwang-song កំពុងបន្តគេចខ្លួនមកទល់ពេលនេះ។
រូបមេប៉ូលិសម៉ាឡេស៊ីដដែលបានបញ្ជាក់បន្ថែមថា តាំងពីក្រោយព្រឹត្តឹការណ៍សម្លាប់លោកគីម ជុងណាមនៅព្រលានយន្តហោះក្នុងទីក្រុងគូឡាឡាំពួកាលពីថ្ងៃទី១៣ កុម្ភៈមក មានជនជាតិកូរ៉េខាងជើងចំនួន ៨នាក់បានជាប់សង្ស័យនៅក្នុងឃាតកម្មនេះ ក្នុងនោះ មានម្នាក់កំពុងស្ថិតក្នុងដៃប៉ូលិសម៉ាឡេស៊ី ៤នាក់ ប្រហែលជាបានរត់គេចខ្លួនទៅកូរ៉េខាងជើង និង ២នាក់កំពុងគេចខ្លួនសំងំក្នុងទឹកដីម៉ាឡេស៊ី ក្នុងនោះក៏មានមន្រ្តីការទូតលោក Kwang-song ដែរ។ តែគេគ្មានដំណឹងអ្វីចំពោះមនុស្សទី៨ ឈ្មោះ Ri Ji-u ទេ។
ដោយឡែក ស្រ្តីពីរនាក់ គឺជនជាតិវៀតណាមម្នាក់ និងឥណ្ឌូណេស៊ីម្នាក់ដែលបានសម្លាប់លោកគីម ជុងណាមផ្ទាល់ និងកំពុងជាប់ឃុំឃាំងបានទទួលការសួរសុខទុក្ខពីមន្រ្តីការទូតរបស់គេនាថ្ងៃសៅរ៍ ទី២៥ កុម្ភៈនេះ។ រូបស្រ្តីឥណ្ឌូណេស៊ីបាននិយាយប្រាប់មន្រ្តីការទូតឥណ្ឌូណេស៊ីថា ខ្លួនបានទទួលលុយចំនួន ៨៥អឺរ៉ូដើម្បីចូលរួមនៅក្នុងព្រឹត្តិការណ៍ដែលខ្លួនគិតថា ជាឆាកល្ខោនលេងសើចធម្មតា។ រីឯមន្រ្តីការទូតវៀតណាមមិនបានធ្វើអត្ថាធិប្បាយអ្វីទាំងអស់ បន្ទាប់ពីបានជួបស្រ្តីជនជាតិខ្លួន។
នៅថ្ងៃសៅរ៍ ទី២៥ កុម្ភៈនេះដែរ រដ្ឋអំណាចម៉ាឡេស៊ីបានប្រាប់ឲ្យដឹងពីការបើកយុទ្ធនាការលាងសំអាតព្រលានយន្តហោះនៅគូឡាឡាំពួនាពេលខាងមុខដើម្បីកម្ទេចកាកសំណល់ជាតិគីមីដែលគេប្រើសម្លាប់លោកគីម ជុងណាមកាលពីថ្ងៃទី១៣ កុម្ភៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ