ឃាតកម្មលើគីម ជុងណាម៖ ស្រ្តីសង្ស័យនិយាយថា ខ្លួន ត្រូវគេបោកប្រើក្នុងតម្លៃ៩០ដុល្លារ
អាជ្ញាធរម៉ាឡេស៊ី នៅថ្ងៃអាទិត្យនេះបាននិយាយធានាថា ព្រលានយន្តហោះអន្តរជាតិនៅគូឡាឡាំពួរ ស្អាត មានសុវត្ថិភាព គ្មានស្នាម VX អាវុធគីមី ដែលគេបានប្រើដើម្បីសម្លាប់លោកគីម ជុងណាម បងប្រុសម្តាយទីទៃរបស់មេដឹកនាំកូរ៉េខាងជើង។ ស្រ្តីឥណ្ឌូណេស៊ី ហើយនិងវៀតណាម ដែលជាប់សង្ស័យបាញ់សារធាតុពុលសម្លាប់លោកគីម ជុងណាម អះអាងថា ពួកគេមិនស្គាល់គីម ជុងណាម និងគិតស្មានថា បានចូលរួមសំដែង ក្នុងកម្មវិធីកំសាន្តរបស់ទូរទស្សន៍។
ចុះផ្សាយនៅថ្ងៃ៖ កែប្រែថ្ងៃទី៖
រដ្ឋមន្រ្តីក្រសួងសុខាភិបាលម៉ាឡេស៊ីបាននិយាយនៅថ្ងៃអាទិត្យ ថា លោកគីម ជុងណាមបានស្លាប់ យ៉ាងវេទនា នៅ២០នាទីក្រោយរងសារធាតុពុលVX។ នៅថ្ងៃសុក្រ អាជ្ញាធរម៉ាឡេស៊ី បានប្រកាសថា លោកគីម ជុងណាម បានស្លាប់ ដោយសារសារធាតុពុល VXដែលជាអាវុធគីមី សម្លាប់មនុស្សដ៏កាចសាហាវ និងដែលហាមបិទខ្ទប់ដោយអង្គការសហប្រជាជាតិ។ កូរ៉េខាងត្បូងបានចោទប្រកាន់របបកុម្មុយនិស្តកូរ៉េខាងជើង ថា ជាអ្នករៀបចំឲ្យមានឃាតកម្មទៅលើគីម ជុងណាម បងប្រុសម្តាយទីទៃរបស់លោក គីម ជុងអ៊ុន។
រូបភាពវីដេអូរបស់កាម៉េរ៉ាសុវត្ថិភាពនៅព្រលានយន្តហោះគូឡាឡាំពួរបានបង្ហាញថា លោកគីម ជុងណាម ដែលកំពុងរង់ចាំប្តូរយន្តហោះ ទៅម៉ាកាវ ត្រូវបានស្រ្តីពីររូប បាញ់វត្ថុរាវនៅលើមុខ។ គីម ជុងណាមបានដាក់ខ្យល់ស្លាប់ក្នុងរថយន្ត ដឹកទៅមន្ទីរពេទ្យនៅគូឡាំឡាំពួរ។
ស្រ្តីជាប់សង្ស័យទាំងពីរដែលម្នាក់ជាជនជាតិ ឥណ្ឌូណេស៊ី និងម្នាក់ទៀត ជាជនជាតិវៀតណាម ត្រូវបានប៉ូលិសម៉ាឡេស៊ី ចាប់ខ្លួន នៅបីថ្ងៃក្រោយឃាតកម្ម។ Siti Aisyah ស្រ្តីសង្ស័យឥណ្ឌូណេស៊ី បាននិយាយប្រាប់អ្នកតំណាងទូតរបស់ខ្លួន នៅប្រទេសម៉ាឡេស៊ី នៅថ្ងៃសៅរ៍ថា រូបនាងត្រូវបានគេជួលក្នុងតម្លៃលុយ៩០ដុល្លារ ដើម្បីចូលរួមក្នុងព្រឹត្តិការណ៍ ដែលនាងគិតថា ជាកម្មវិធីកំសាន្ត របស់ទូរទស្សន៍។ តាមមន្រ្តីទូតឥណ្ឌូណេស៊ី Siti Aisyah និយាយថា នាងមិនស្គាល់ស្រ្តីសង្ស័យវៀតណាម ហើយដបទឹក ដែលគេឲ្យទៅនាង មានរូបរាងដូចជាដបប្រេងលាបកូនក្មេង។ Doan Thi Huong ស្រ្តីសង្ស័យ ម្នាក់ទៀត បានប្រាប់មន្រ្តីទូតវៀតណាម នៅម៉ាឡេស៊ីដែរថា នាងជឿថា បានចូលរួមក្នុងកម្មវិធីកំប្លែងរបស់ទូរទស្សន៍។ នេះបើតាមសេចក្តីថ្លែងការណ៍របស់ក្រសួងការបរទេសវៀតណាម។
ការបកស្រាយរបស់ជនសង្ស័យស្ត្រីទាំងពីរ ផ្ទុយស្រឡះ រូបភាពវីដេអូ និងការអះអាងរបស់ប៉ូលិសម៉ាឡេស៊ី ដែលបាននិយាយប្រាប់អ្នកកាសែតថា ស្រ្តីទាំងពីរបានស្គាល់ច្បាស់ពីគ្រោះថ្នាក់នៃវត្ថុរាវ ព្រោះថា នៅក្រោយបាញ់ទៅលើមុខគីម ជុងណាម ស្រ្តីម្នាក់បានរត់ទៅលាងដៃ នៅក្នុងបន្ទប់ទឹកក្នុងព្រលានយន្តហោះ។ តាមប៉ូលិស ស្រ្តីជាប់សង្ស័យម្នាក់ក្អួតចង្អោរដោយសារឥទ្ធិពលសារធាតុគីមី ក្នុងពេលមន្រ្តីទូតឥណ្ឌូណេស៊ី និងវៀតណាមបញ្ជាក់រៀងៗខ្លួនជនជាតិរបស់ខ្លួន មានសុខភាពល្អក្នុងមន្ទីរឃុំខ្លួនរបស់ប៉ូលិស។
តាមលោកAbdul Samah Mat មេប៉ូលិសរដ្ឋSelangor ក្នុងប្រទេសម៉ាឡេស៊ី គេបានបញ្ជូនបញ្ជូនទៅមន្ទីរពិសោធន៍ នូវស្លាកគំរូដែលគេរកឃើញនៅក្នុងផ្ទះ ដែលជនជាតិកូរ៉េខាងជើង ៤នាក់ ស្នាក់នៅ មុននឹងរត់គេចខ្លួន។ ក្រៅតែពីចាប់ឃុំខ្លួន ជនសង្ស័យ ស្រ្តីពីររូប និងជនជាតិកូរ៉េខាជើងម្នាក់ ប៉ូលិសម៉ាឡេស៊ីកំពុងតាមរកចាប់ជនសង្ស័យ៧រូបផ្សេងទៀត ដែលទាំងអស់គ្នាសុទ្ធតែជាជនជាតិកូរ៉េខាងជើង។ នៅថ្ងៃសៅរ៍ មេប៉ូលិសម៉ាឡេស៊ី បានប្រកាសពីបំណងចង់ឲ្យមានដីកាចាប់ខ្លួន មន្រ្តីជាន់ខ្ពស់របស់ទូតកូរ៉េខាងជើង នៅម៉ាឡេស៊ី ដែលគេជឿថា មានជាប់ពាក់ព័ន្ធក្នុងការប្រព្រឹត្តឃាតកម្មលើលោក គីម ជុងណាម។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ