ប៉ាគីស្ថានរងការវាយប្រហារជាថ្មីដោយអំពើភេរវកម្មអត្តឃាតរបស់ពួកតាលីបង់កាលពីព្រឹកម្សិលមិញនៅក្រុង Lahore
ប្រទេសប៉ាគីស្ថានបានរងការវាយប្រហារជាថ្មីម្តងទៀតកាលពីព្រឹកម្សិលមិញ បន្ទាប់ពីភេរវកម្មអត្តឃាតកាលពីថ្ងៃសុក្រមុនរួចមក។ ជាការវាយប្រហារមួយដែលសំដៅប្រឆាំងទៅលើក្រុមមន្ត្រីស៊ីវីលនិងយោធាដែលបានចូលរួមក្នុងប្រតិបត្តិការជំរឿនចំនួនប្រជាជនក្នុងទ្រង់ទ្រាយដ៏ធំមួយនៅក្រុងLahore។ ភេរវកម្មអត្តឃាតនេះដែលបានសម្លាប់ជីវិតមនុស្សយ៉ាងតិច៥នាក់ ត្រូវបានពួកអ៊ីស្លាមជ្រុលនិយមតាលីបង់បាគីស្ថានប្រកាសថាជាស្នាដៃរបស់ពួកគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
យោងតាមការអះអាងរបស់កងទ័ពប៉ាគីស្ថាន ជនអត្តឃាតម្នាក់ បានបំផ្ទុះគ្រាប់បែកប្រឆាំងទៅលើរថយន្តក្រុងមួយគ្រឿងដែលដឹកកងយោធានិងមន្ត្រីរដ្ឋការស៊ីវីលប៉ាគីស្ថានដែលត្រូវទទួលបន្ទុកក្នុងប្រតិបត្តិការជំរឿនចំនួនប្រជាជន។ ហេតុការណ៍នេះ បានកើតឡើងកាលពីព្រឹកម្សិលមិញនៅទីក្រុងLahore ភាគខាងកើតប្រទេសប៉ាគីស្ថាន។សូមបញ្ជាក់ថា ប៉ាគីស្ថាន បានធ្វើការជំរឿនចំនួនប្រជាជននេះ ជាលើកទីមួយដែរចាប់តាំងពីជិត២ទស្សវត្តន៍កន្លងមកនិងដែលបានចាប់ផ្តើមឡើងតាំងតែពីខែមីនាមុន។ គឺជាភារៈកិច្ចដ៏មហាសាលមួយដែលតម្រូវឲ្យមានការចូលរួមពីសំណាក់មន្ត្រីទទួលបន្ទុកធ្វើការជំរឿនចំនួនប្រជាជនទាំងខាងស៊ី
វីលនិងទាំងខាងយោធា ជាច្រើនម៉ឺននាក់។
សូមបញ្ជាក់ថាការផ្ទុះបានប្រព្រឹត្តទៅនៅម៉ោង៨ព្រឹកនៅលើរុក្ខវីថីមួយក្នុងក្រុងLahoreដែលជារដ្ឋធានីវប្បធម៌របស់ប៉ាគីស្ថាននិងបានសម្លាប់ជីវិតយោធា៣នាក់ក្នុងចំណោមជនរងគ្រោះយ់ាងតិច ចំនួន៥នាក់ ក្នុងនោះក៏មានជនស៊ីវីលម្នាក់និងមន្ត្រីទទួលខុសត្រូវខាងកងទ័ពអាកាសម្នាក់ផង។
ភ្លាមៗនោះ ពួកតាលីបង់ប៉ាគីស្ថាន បានប្រកាសថា គឺជាស្នាដៃរបស់ក្រុមខ្លួន ហើយក៏ជាការសងសឹកតបតវិញទល់នឹងកងទ័ពប៉ាគីស្ថានដែលនៅតែបន្តការសម្លាប់សមាជិកតាលីបង់ដែលកំពុងជាប់ឃុំឃាំងនៅក្នុងពន្ធនាគារ។
ភេរវកម្មបំផ្ទុះគ្រាប់បែកកាលពីម្សិលមិញនេះ ក៏បានបណ្តាលឲ្យមានអ្នករងរបួសចំនួន១៨នាក់ដែរ ក្នុងនោះមានអ្នកជិះកង់ពីររូបដែលកំពុងធ្វើដំណើរនៅក្បែរទីកន្លែងកើតហេតុក្នុងពេលដែលគ្រាប់បែកបានផ្ទុះ។
គួររំលឹកថាអំពើភេរវកម្មលើកចុងក្រោយនៅប៉ាគីស្ថាន បានកើតឡើងកាលពីថ្ងៃសុក្រមុននិងបានប្រហារជីវិតមនុស្សយ៉ាងតិច២២នាក់។ ជាការវាយប្រហារមួយដោយការបំផ្ទុះគ្រាប់បែកបង្កប់នៅក្នុងរថយន្តនៅលើទីផ្សារមួយក្នុងតំបន់កុលសម្ព័ន្ធ។ តំបន់ដែលមានប្រជាជនរស់នៅភាគច្រើន ជាអ្នកកាន់សាសនាអ៊ីស្លាមនិកាយ Chiite នៅប៉ែកពាយ័ព្យប៉ាគីស្ថាន។ ការវាយប្រហារបំផ្ទុះគ្រាប់បែកក្នុងរថយន្តនាពេលនោះ ក៏ត្រូវបានពួកតាលីបង់ប៉ាគីស្ថាន ប្រកាសថាជាស្នាដៃរបស់ពួកគេដែរ។
សូមបញ្ជាក់ថា អំពើហិង្សានៅប៉ាគីស្ថាន បានថមថយចុះឥទ្ធិពលបន្តិចនៅក្នុងរយៈពេលប៉ុន្មានឆ្នាំចុងក្រោយនេះដោយសារតែកងទ័ពប៉ាគីស្ថាន បានបើកប្រតិបត្តិការវាយលុកចាប់តាំងពីខែមិថុនាឆ្នាំ២០១៤មក។ ជាការវាយប្រហារមួយដើម្បីប្រឆាំងទៅលើមូលដ្ឋាននានាខាងក្រោយរបស់ក្រុមប្រដាប់អាវុធជ្រុលនិយមអ៊ីស្លាម រហូតទៅដល់តំបន់កុលសម្ព័ន្ធដែលស្ថិតនៅភាគពាយ័ព្យប៉ាគីស្ថានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ