ចិនបណ្តេញចេញ ស្រ្តីអាមេរិកាំងដែលជាប់ចោទពីបទធ្វើចារកម្ម
អាជ្ញាធរចិន នៅថ្ងៃសុក្រទី ២៨មេសា បានសម្រេចចាប់បញ្ជូនចេញស្រ្តីអាមេរិកាំងម្នាក់ ដែលតុលាការចិនទើបបានផ្តន្ទាទោស ពីបទធ្វើចារកម្មនៅក្នុងទឹកដីចិន។ តាមក្រុមការពារសិទ្ធិមនុស្ស លោកស្រី Sandy Phan Gillis បានទៅដល់អាមេរិករួចហើយ នៅថ្ងៃសុក្រ។
ចុះផ្សាយនៅថ្ងៃ៖
នៅថ្ងៃអង្គារដើមសប្តាហ៍នេះ លោកស្រី Sandy Phan Gillis ត្រូវបានតុលាការចិន នៅខេត្តណានីង ភាគខាងត្បូងប្រទេសចិន សម្រេចផ្តន្ទាទោសដាក់ពន្ធនាគាររយៈពេល ៣ឆ្នាំកន្លះ ក្នុងបទធ្វើចារកម្ម។ ប៉ុន្តែ តាមអង្គការការពារសិទ្ធិមនុស្ស ទីហួរ Dui Huaដែលមានទីស្នាក់ការនៅទីក្រុងសាន់ ហ្រ្វាន់ស៊ីស្កូ តុលាការបានសម្រេចផងដែរ បណ្តេញលោកស្រី Sandy ចេញពីប្រទេសចិន នៅថ្ងៃពុធ។
Sandy Phan Gillis ត្រូវបានចាប់ខ្លួន នៅខែមីនា ឆ្នាំ ២០១៥ នៅពេលលោកស្រីបានធ្វើដំណើរ ក្នុងនាមជាអ្នកជំនួញទៅទីក្រុងម៉ាកាវ។ ប៉ូលិសចិនបានចោទប្រកាន់លោកស្រីពីបទធ្វើចារកម្ម លួចព័ត៌មានសម្ងាត់រដ្ឋចិន និងប្រគល់ទៅឲ្យបុគ្គលទី៣។ តាំងពីខែមីនា ឆ្នាំ ២០១៥ លោកស្រី Sandyត្រូវបានអាជ្ញាធរចិនចាប់ដាក់ឃុំ នៅមន្ទីរឃុំឃាំងសម្ងាត់ មុននឹងត្រូវបានជំនុំជម្រះនៅថ្ងៃអង្គារ ប៉ុន្មានថ្ងៃមុននេះ។ យោងតាមប្រធានអង្គការការពារសិទ្ធិមនុស្សទីហួរ តុលាការចិនបាន ផ្តន្ទាទោសឲ្យជាប់គុក បីឆ្នាំកន្លះ ប៉ុន្តែ សម្រេចដោះលែងឲ្យមានសេរីភាពមុន កាលកំណត់ ក៏ដោយសារតែលោកស្រីSandy ធ្លាប់ត្រូវបានជាប់ឃុំអស់ពេល២ឆ្នាំរួចហើយ។ នៅឆ្នាំមុន ក្រុមការងាររបស់អង្គការសហប្រជាជាតិ ដែលធ្វើការទៅលើការចាប់ដាក់ឃុំ ដោយគ្មានការជំនុំជម្រះនៅចិន បានបរិហាររិះគន់ទីក្រុងប៉េកាំង ថាមិនបានគោរពច្បាប់អន្តរជាតិដែលទាមទារឲ្យមានគោរពសេរីភាព និងសន្តិសុខរបស់ជនជាប់សង្ស័យ ដូចជាលោកស្រីSandy។
ការដោះលែងលោកស្រីSandy ឲ្យមានសេរីភាពធ្វើឡើងនៅតែបីសប្តាហ៍ក្រោយ ជំនួបកំពូលរវាងប្រធានាធិបតីចិន និងអាមេរិកនៅដើមខែមេសានេះ។ អ្នកនាំពាក្យរបស់ក្រសួងការបរទេសចិន លោកGeng Shuang បាននិយាយប្រាប់អ្នកកាសែតនៅថ្ងៃសុក្រម្សិលមិញថា ចាប់តាំងពីជំនួបទល់មុខ នៅរដ្ឋហ្វ្លរីដា លោកស៊ី ជីនពីង បាននិយាយជាប់ទាក់ទងជានិច្ចជាមួយលោកប្រធានាធិបតីអាមេរិកដូណាល់ ត្រាំ។
អង្គការការពារសិទ្ធិមនុស្ស ទីហួរ វិញយល់ឃើញថា ការចរចាដើម្បីទាមទារឲ្យដោះលែងលោកស្រី Sandy បានបង្កើនល្បឿន តាំងពីដំណើរទស្សនកិច្ចរបស់លោកប្រមុខការទូតអាមេរិក ទៅទីក្រុងប៉េកាំង នៅខែមីនាកន្លងទៅ។ សេតវិមានបានជំរុញ រដ្ឋមន្រ្តីការបរទេសលោករេច ធីល័រសុន ឲ្យចរចាបានសម្រេច ដើម្បីឲ្យទីក្រុងប៉េកាំងយល់ព្រមដោះលែងលោកស្រីSandy Phan Gillis។
តាមឯកសារចុះផ្សាយនៅក្នុងវិបសៃតិ៍ បង្កើតឡើងដោយគ្រួសាររបស់លោកស្រី Sandy Phan Gillis លោកស្រី Sandy មានដើមកំណើតចេញពីភាគខាងត្បូងប្រទេសចិន។ លោកស្រីស្ថិតនៅក្នុងចំណោមប្រជាជនអន្តោប្រវេសន៍ ដែលធ្វើដំណើរតាមទូក សំដៅអាមេរិក ដើម្បីរត់គេចចេញពីរបបកុម្មុយនិស្តចិន នៅទសវត្សរ៍ឆ្នាំ ១៩៧០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ