អង្គការមនុស្សធម៌អន្តរជាតិសុំរដ្ឋាភិបាលភូមាដើម្បីយកជំនួយទៅឲ្យពលរដ្ឋរ៉ូហ៊ីងយ៉ា
នៅក្នុងប្រទេសភូមា ក្រុមអង្គការមនុស្សធម៌អន្តរជាតិដែលមានទីស្នាក់ការក្នុងទីក្រុងរ៉ង់ហ្គូនកំពុងរង់ចាំភ្លើងខៀវពីរដ្ឋាភិបាលភូមាដើម្បីអាចដឹកជំនួយមនុស្សធម៌ទៅជួយពលរដ្ឋរ៉ូហ៊ីងយ៉ាក្នុងរដ្ឋរ៉ាក់ឃីន។ នៅយប់ថ្ងៃពុធ ទី២៧ កញ្ញា មានអង្គការមនុស្សធម៌អន្តរជាតិជាច្រើនដែលកំពុងបំពេញការងារក្នុងប្រទេសភូមាបានធ្វើសំណើរួមគ្នាតាមរយៈសេចក្តីប្រកាសព័ត៌មានមួយដោយបានអំពាវនាវរដ្ឋអំណាចភូមាឲ្យលើកចេញវិញនូវបំរាមដែលហាមពួកគេមិនឲ្យយកជំនួយទៅជួយពលរដ្ឋរស់ក្នុងរដ្ឋរ៉ាក់ឃីន ពិសេសពួករ៉ូហ៊ីងយ៉ា អ្នកកាន់សាសនាអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:១០
តាំងពីកងទ័ពភូមាបានបើកប្រតិបត្តិការសឹកលើក្រុមឧទ្ទាមរ៉ូហ៊ីងយ៉ាក្នុងរដ្ឋរ៉ាក់ឃីននាដំណាច់ខែសីហាមក រដ្ឋអំណាចភូមាបានហាមមិនឲ្យក្រុមអង្គការក្រៅរដ្ឋាភិបាល ទីភ្នាក់ងាររបស់អង្គការសហប្រជាជាតិ ឬមួយក្រុមអង្គការមនុស្សធម៌អន្តរជាតិធ្វើដំណើរទៅកាន់រដ្ឋរ៉ាក់ឃីនទេ។ តាំងពីពេលនោះមក និងនៅចំពោះមុខការរត់ភៀសខ្លួនរបស់ពួករ៉ូហ៊ីងយ៉ាជិតកន្លះលាននាក់ពេលនេះ អង្គការសហប្រជាជាតិធ្លាប់បានទាមទារច្រើនដងឲ្យមានការដឹកជំនួយទៅជួយពលរដ្ឋរស់ក្នុងរដ្ឋរ៉ាក់ឃីន ពិសេសពួករ៉ូហ៊ីងយ៉ា។ តែរដ្ឋអំណាចភូមាតែងបដិសេធ និងបានផ្តល់កិច្ចការបញ្ជូនជំនួយនេះទៅឲ្យកាកបាទក្រហមក្នុងស្រុកវិញ។
នៅក្នុងសេចក្តីប្រកាសព័ត៌មានរួមមួយចេញផ្សាយនាយប់ថ្ងៃពុធ ទី២៧ កញ្ញា ក្រុមអង្គការមនុស្សធម៌អន្តរជាតិឲ្យអំពាវនាវរដ្ឋអំណាចភូមាឲ្យលើកចេញវិញនូវបំរាមដែលហាមពួកគេមិនឲ្យយកជំនួយទៅជួយពលរដ្ឋរស់ក្នុងរដ្ឋរ៉ាក់ឃីន។ ក្រុមអង្គការមនុស្សធម៌អន្តរជាតិដែលមានមូលដ្ឋានក្នុងទីក្រុងរ៉ង់ហ្គូនបានយល់ឃើញថា ជំនួយដែលរៀបចំឡើងដោយកាកបាទក្រហមភូមាមិនគ្រប់គ្រាន់ និងមិនអាចឆ្លើយតបនឹងតម្រូវការជាក់ស្តែងទេ។ មកដល់ថ្ងៃព្រហស្បតិ៍ ទី២៨ កញ្ញានេះ រដ្ឋាភិបាលភូមានៅមិនទាន់បានផ្តល់ចម្លើយយ៉ាងណានៅឡើយទេ។
កន្លងមក រដ្ឋាភិបាលភូមាធ្លាប់បានរៀបចំឲ្យមានដំណើរទស្សនកិច្ចមានកម្រិតរបស់អ្នកទទួលខុសត្រូវមនុស្សធម៌ទៅកាន់តំបន់ជម្លោះដើម្បីវាយតម្លៃលើស្ថានការណ៍ជាក់ស្តែង។ តែអ្វីដែលក្រុមអង្គការមនុស្សធម៌ចង់បានពេលនេះ គឺការធ្វើដំណើរដោយសេរីទៅកាន់គ្រប់ទីកន្លែងទាំងអស់ដែលកំពុងមានជម្លោះ។ សំណើរបស់ក្រុមអង្គការមនុស្សធម៌អន្តរជាតិពេលនេះបានធ្វើឡើង ចំពេលដែលក្រុមប្រឹក្សាសន្តិសុខគ្រោងបើកកិច្ចប្រជុំថ្មីស្តីពីបញ្ហាភូមានាថ្ងៃព្រហស្បតិ៍ ទី២៨ កញ្ញា។
កិច្ចប្រជុំលើកនេះត្រូវធ្វើឡើងជាសាធារណៈ និងមានអន្តរាគមន៍របស់លោកអគ្គលេខាធិការអង្គការសហប្រជាជាតិ Antonio Guterres។ លោក Guterres ដែលធ្លាប់ស្គាល់ច្បាស់ពីភូមិសាស្រ្តរដ្ឋរ៉ាក់ឃីន ព្រោះលោកធ្លាប់បានទៅច្រើនដងក្នុងពេលដែលលោកកាន់តំណែងជាឧត្តមស្នងការសហប្រជាជាតិទទួលបន្ទុកជនភៀសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ