ភូមា និងបង់ក្លាដែសចុះកិច្ចព្រមព្រៀងដើម្បីធ្វើមាតុភូមិនិវត្តរបស់ជនជាតិរ៉ូហ៊ីងយ៉ា
រដ្ឋាភិបាលភូមា និងបង់ក្លាដែស នៅថ្ងៃព្រហស្បតិ៍ទី២៣វិច្ឆិកា បានចុះហត្ថលេខាលើកិច្ចព្រមព្រៀងមួយ ដែលនឹងបើកផ្លូវឲ្យជនភៀសខ្លួន រ៉ូហ៊ីងយ៉ា ក្នុងទឹកដីបង់ក្លាដែស អាចធ្វើដំណើរត្រលប់ចូលទឹកដីភូមា។ នេះបើតាមការប្រកាសរបស់អ្នកទទួលខុសត្រូវក្នុងរដ្ឋាភិបាលភូមា។ កិច្ចព្រមព្រៀងនេះធ្វើឡើងនៅមួយថ្ងៃក្រោយ ទីក្រុងវ៉ាស៊ីនតោន នៅថ្ងៃពុធម្សិលមិញ បានចោទកងទ័ពភូមាថា បានបើកប្រតិបត្តិការបោសសម្អាតជាតិសាសន៍ នៅក្នុងរដ្ឋរ៉ាឃីន ភាគខាងលិចភូមា។
ចុះផ្សាយនៅថ្ងៃ៖ កែប្រែថ្ងៃទី៖
ភូមា និងបង់ក្លាដែស បានចុះហត្ថលេខាលើអនុស្សរណៈនៃការយោគយល់គ្នា ស្តីពីមាតុភូមិនិវត្តរបស់ជនជាតិរ៉ូហ៊ីងយ៉ា រាប់សែន ដែលបានរត់ភៀសខ្លួនទៅជ្រកកោននៅទឹកដីបង់ក្លាដែស។ តាមអគ្គលេខាធិការនៃក្រសួងការងារ និងអន្តោប្រវេសន៍ភូមា រដ្ឋាភិបាលត្រៀមខ្លួនរួចហើយ ដើម្បីទទួលយកជនភៀសខ្លួន។ នៅពេលនេះ គេនៅរង់ចាំតែឯកសាររបស់អាជ្ញាធរបង់ក្លាដែស ដែលនឹងបញ្ជាក់ពីអត្តសញ្ញាណពិតប្រាកដរបស់ជនភៀសខ្លួនតែប៉ុណ្ណោះ។
កិច្ចព្រមព្រៀង ស្តីពីការបញ្ជូនជនជាតិរ៉ូហ៊ីងយ៉ា ពីជំរំភៀសខ្លួន បង់ក្លាដែស ធ្វើឡើងខណៈ ដែលរដ្ឋមន្រ្តីការបរទេសបង់ក្លាដែស ចូលជួបពិភាក្សាជាមួយលោកស្រីអ៊ុងសាន ស៊ូជី ប្រមុខរដ្ឋាភិបាលភូមា នៅទីក្រុងរ៉ង់ហ្គូន។ តាមកិច្ចព្រមព្រៀង ដែលចុះហត្ថលេខាដោយរដ្ឋមន្រ្តីការបរទេសអ៊ុងសាន ស៊ូួជី និងសមភាគីបង់ក្លាដែស ជនភៀសខ្លួនរ៉ូហ៊ីងយ៉ានឹងអាចធ្វើមាតុភូមិនិវត្តទៅភូមា យ៉ាងយូរ នៅពីរខែខាងមុខ។
កន្លងមក ភាគីទាំងពីរនៅមិនទាន់ចុះសមុ្រងគ្នាពីចំនួន ជនជាតិរ៉ូហ៊ីងយ៉ាដែលអាចវិលត្រលប់ចូលភូមា។ អង្គការសហប្រជាជាតិបានវាយតម្លៃថា មានជនជាតិរ៉ូហ៊ីងយ៉ា ៦សែននាក់កំពុងកកកុញ ក្នុងជំរំភៀសខ្លួន នៅបង់ក្លាដែស បន្ទាប់ពីរត់គេចចេញពីអំពើហិង្សា ដែលចាប់ផ្តើមឡើង នៅខែសីហា ឆ្នាំនេះ នៅរដ្ឋរ៉ាឃីន។ រដ្ឋាភិបាលបង់ក្លាដែសវិញបានទាមទារឲ្យភូមាទទួលយកផងដែរ ជនជាតិរ៉ូហ៊ីងយ៉ាជាច្រើនម៉ឺននាក់ផ្សេងទៀត ដែលធ្លាប់បានរត់ភៀសខ្លួនទៅបង់ក្លាដែស ដោយសារតែការធ្វើទុក្ខបុកម្នេញ និងអំពើហិង្សា នៅប៉ុន្មានឆ្នាំចុងក្រោយនេះ នៅភូមា។
ភូមា និងបង់ក្លាដែសបានយល់ព្រមព្រៀងគ្នាក្នុងការធ្វើមាតុភូមិនិវត្តរបស់ជនជាតិរ៉ូហ៊ីងយ៉ា ប៉ុន្តែ មន្រ្តីការពារសិទ្ធិមនុស្សរបស់អង្គការសហប្រជាជាតិនៅតែមិនទាន់ទុកចិត្ត ព្រោះថា កងទ័ពភូមា ដែលមិនស្ថិតនៅក្រោមអំណាចរបស់រដ្ឋាភិបាលស៊ីវិល នៅតែអរិភាព និងប៉ុនប៉ងរារាំងការវិលត្រលប់របស់ជនជាតិរ៉ូហ៊ីងយ៉ា។ នៅសប្តាហ៍មុន មេទ័ពភូមា លោកឧត្តមសេនីយ៍ មីន អ៊ុងឡាំងធ្លាប់បាននិយាយថា ភូមាមិនអាចទទួលយកចំនួនជនភៀសខ្លួន ដែលស្នើឡើងដោយបង់ក្លាដែសនោះទេ។ ឧត្តមសេនីយ៍ភូមា ដែលធ្លាប់បានចាត់ទុកជនជាតិរ៉ូហ៊ីងយ៉ា ថា ជាជនជាតិ មួយ ក្នុងទឹកដីបង់ក្លាដែស នៅបានរំលឹកទៀតថា ការទទួលយកជនភៀសខ្លួន ពីបង់ក្លាដែស ត្រូវធ្វើឡើង ក្នុងក្របខ័ណ្ឌច្បាប់ស្តីពីពលរដ្ឋភូមា នៅឆ្នាំ ១៩៩២ ដែលនៅក្នុងនោះ មានចែងជាផ្លូវការពីជនជាតិភាគតិច នៅភូមា ប៉ុន្តែ គ្មានទេ ជនជាតិរ៉ូហ៊ីងយ៉ា។
អំពើរបស់កងទ័ពភូមា ទៅជនជាតិរ៉ូហ៊ីងយ៉ា នៅរដ្ឋរ៉ាឃីន ត្រូវបានរដ្ឋាភិបាលអាមេរិកចាត់ទុកជាប្រតិបត្តិការបោសសម្អាតជាតិសាសន៍។ នៅក្នុងសេចក្តីថ្លែងការណ៍ នៅថ្ងៃពុធម្សិលមិញ ប្រមុខការបរទេសអាមេរិក លោករេច ធីល័រសុន ដែលបានជួបពិភាក្សាជាមួយ មេទ័ពភូមា កាលពីថ្ងៃព្រហស្បតិ៍សប្តាហ៍មុន នៅបានបញ្ជាក់ថា អាមេរិកនឹងអនុវត្តទណ្ឌកម្ម ទៅលើជនដែលប្រព្រឹត្តអំពើឃោឃៅ ដែលនៅក្នុងនោះមានទាំងទាហាន និងក្រុមប្រជាជនភូមា នៅថ្នាក់មូលដ្ឋាន។ សម្រាប់អ្នកជំនាញ កិច្ចការអាស៊ី ទណ្ឌកម្មរបស់អាមេរិក មិនត្រឹមតែមានផលប៉ះពាល់ តិចតួចទៅលើកងទ័ពភូមាតែប៉ុណ្ណោះទេ ប៉ុន្តែ វារឹតតែជំរុញឲ្យកងទ័ពភូមា ខិតចូលកាន់តែស្និទ្ធនឹងម៉ូស្គូ និងប៉េកាំង ដែលបានបញ្ជាក់ជាថ្មី សប្តាហ៍មុន ចង់ពង្រឹងចំណងមិត្តភាពជាមួយកងទ័ពភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ